fiogf49gjkf0d
ألو أنت سامعنى؟
كلاكيت أول مرة فيلم ألو أنت سامعنى " نهار خارجى " أحد مواقع الأنتخابات طابور طويل تقف فية أم عبير بياعة الفجل والجرجير لتدلى بصوتها الأنتخابى.." داير" أكشن - ألو بتقول أية ؟ - أيوة يا أم عبير بتقولى هتنتخبى مين؟ مش سامعك؟ - يا بنى انت اطرش ولا أية؟ هنتخب أبو حسين الراجل الزين أبو ذقن طولها شبرين دة بيقول هينضف البلد من الوساخة اللى فيها وأموال الزكاة هتروح لأصحابها وهيطبق قانون دور العبادة وما عندوش فرق بين واحد والتانى واتسجن مرتين أيام مبارك عشان راجل شريف بيقول الحق ما انته عارفة ما علهوش غلطة ومش من اللى بيخوفوا وبيحللوا ويحرموا - يعنى مفيش منه خوف يا أم عبير ؟ - والله يا بنى انا ما أعرفش الغيب بس الراجل بيتكلم كويس أقولك أتصل بأم ميمى شوفها هتعمل اية سلام بقى .. (وتنتهى المكالمة) تنتقل الكاميرا فى مشهد أخر" نهار خارجى " مدرسة شبرا الثانوية أحد المواقع الأنتخابية وذات الطابور لكن ام ميمى تفترش أحد الأرصفة وتنتقل عبر الرصيف لتلحق بدورها فى الطابور ويقطع صوت الناخبين صوت رنه تليفون أم ميمى بأغنية يا حبييبتى يا مصر وصمت الجميع لسماع الرنة ثم ترد أم ميمى - ألو أيوة مين ؟ - فيرد الطرف الأخر معرفا نفسا ثم تستطرد أم ميمى - يا سيدى هنتخب عم نجيب أبو ميخا ما انت عارفة رجل محامى مهم وفاهم وواع ولسان أمة فالت ما بيهموش هو دة اللى ينفع عشان يحطولنا قوانين تمنع السرقة قدام لحسن نلاقى مبارك تانى طالعلنا فى البخت.. - ويرد الطرف الأخر على التليفون بس دة مسيحى يا ام ميمى - فترد ام ميمى والنبى انت واد عبيط مسيحى اية ومسلم اية المهم اللى يخدمنا ودايرتنا دة مفهاش غير ابو ميخا بقولك فكك منى وشوف عمك محمد هتلاقيه فى دايرة بولاق ابو العلا أصلى بطاقتة على هناك شى لله يا سلطان وتنتهى المكالمة.. - مشهد أخر " نهار خارجى " مركز شباب بولاق تتعالى الأصوات هنا وهناك والأعلانات الخاصة بالناخبين ويرن جرس التليفون وعم محمد الكهل الستينى لم يسمعه فيعاود المتصل الأتصال مرة أخرى فيسمع أحد الشباب جرس التليفون ويخبر الحاج أن يرد على التليفون.. - ألو أيوة مين ؟ - يا بنى مش سامعك أنت مين أتجه عم محمد بعيدا إلى داخل أحد مداخل العمارات ليستمع إلى المتصل وعندما سمع الطرف الأخر وفهم مايريد أجاب بالأتى - شوف يا بنى أحنا من زمان نفسنا شوف حرية وعدالة أجتماعية ومن زمان نفسنا نشوف خير بلدنا لينا مش لغيرنا ومن زمان نفسنا نبعد عن خط الفقر ومن زمان نفسنا نعيش فى بيئة نضيفة ومن زمان نفسنا نحس أن لينا كرامة ذى بقية الشعوب ومن زمان نفسنا نحلم أن مصر تكون أحسن بلد فى الدنيا ومن زمان نفسنا ناكل لقمة هنية ونعيش عيشة رضية ونلبس هدمة نضيفة ومن زمان نفسنا نكون راس براس مع دول تانية كتير سبقتنا والمسافة بينا بقت أكتر من مليون سنة من زمان نفسنا نبنى الأنسان المصرى ذى ما كان أيام الفراعنة علماء فى الفلك والهندسة والطب والمعمار من زمان كان نفسى أشوف الرئيس يتحاسب والمرؤس ما يخافش من رئيسة من زمان نفسى أحاسب مبارك اللى مش هيتحاسب عشان كدة أنا جيت أنتخب بس الحقيقة انى مش عارف أنتخب مين لأنى مش عارف مين يقدر على اللى نفسى فيه !!! وينزل تتر النهاية وعم محمد يعود للصف فيلم من تأليف وإخراج وائل سرور