في تطور طبيعي للتخبط في القرارات الحكومية... وتأكيداً لكل الظنون في انفصال الأداء الحكومي عن الأحلام الشعبية... وتحطيماً لحبل الود بين المسؤولين والأغلبية الجماهيرية ... تم أيها السادة بدء العمل بالجباية الجديدة المسماه بالضريبة العقارية... لتكتمل بحمد الله منظومة السيد العبقري مسؤول المالية... في مصّ دم الناس وإظهار الولاء في الاداء للقيادة السياسية... وطمعاً في الفوز بلقب جديد بعد الفوز بلقب دورة ألعاب المال الافريقية... أو احراز لقب رجل العام في الاستفتاءات الهمايونية الحلمنتيشية....!! فعلاً من حق السيد مسؤول الجباية أن يكون رجل العام... مادام نازل طايح فينا والناس يادوب تمصمص شفايفها ولا حد لام... فاكرين الهوجة الشعبية نوبة وتنتهي زي أعراض الأنفلونزا والزكام... وتموت أحلامنا وننشغل بمواضيع الضريبة وأمانينا مجرد أوهام... ويكون الأمل في التغيير حلم أو كابوس يجيلنا في المنام... الضريبة العقارية مسلسل مرصود لينا وفكرة من تفكير اللئام... فاكرينها ضريبة وتعدي زي أي ضريبة والسلام... وفي الآخر حندفع غصب عن عنينا من غير اعتراض وكلام... جباية بالقهر وكله بالقانون الساكسوني بدون نقض أو ابرام... وعلى الشعب اللجوء لمحكمة العدل الإنسانية أو يروح ينام... خلاص وجود حكومة تحس بمشاكل الناس بقى تخاريف أحلام... !! السادة المسؤولين خلاص أدمنوا تعذيب الناس بالطوابير... وبيحبوا قوي منظرهم وعذابهم كل يوم وكأنهم طراطير... مساكين دمهم خلاص مالوش ثمن ولا عاد ليهم خفير... ولا حد براعي ظروفهم بقرار رحيم وقدير... ياترى ايه مستقبلهم ومين اللي في ايديه القرار والمصير... !! مسؤول الجباية اعلن عن مواعيد تقديم الضريبة العقارية... وحذر الناس الغلابة من التلاعب في الاقرارات الضريببة... لأن الحكومة حتجبيبك وحتفقس أي اساليب ملتوية... وحتفضحك وتتهمك بالخيانة في حق الوطن لو بس اكتشفت اي بيانات وهمية... حتى لو كانت عشه فوق سطوح أو بدروم في المناطق العشوائية... وكان فرحان ومبسوط وهو شايف الطوابير والناس ياعيني واقفة في عز الضهرية... وبتتصارع على تقديم كفنها بإيديها للي دبحوها بالقوانين القراقوشية... وبعدين قال ايه بيجوا ويمدوا مواعيد تقديم الاقرار علشان الناس ترتاح ياعيني منتهى الإنسانية... عمرك شفت ديب بيطبطب عالفريسة والضحية... !! والغريب اننا جربنا وخفنا كالعادة وقدمنا اقرار بكل اللي عندنا... وافتكرنا انه تعبير عن حسن النوايا للحكومة يمكن عندها يغفر لنا... وقلنا يمكن حكومتنا ترحمنا وتنسى بيوتنا اللي بتلمنا... زي ما بتنسى الهوامير اللي في بلادنا ملوك الاحتكار اللي بيمصوا دمنا... وتطنش عن التقديرات الحقيقية لضرائب ثرواتهم اللي حققوها غصب عننا... وياريت بعد كل ده يرحموا عذابنا وقهرنا... ويروحوا ويلغوا القرار اللي فرض علينا الذل وزود علينا همنا... الله يلعن الظلم عالهوان على اللي بيتحكم فينا ويذلنا... خلاص مفيش بعد بيوتنا اللي بنعيش فيها غير الهدوم اللي بتستر عرضنا... !! لكن ومن باب التفاؤل وتحت بند الإنسانية... ممكن نحلم يكون إلغاء الضريبة ورقة هامة ومصيرية... وكارت انساني رحيم في المسألة الانتخابية... وتعبير عن الاحساس بالناس والهموم الجماهيرية... ياريت يتدخل الكبير ويلغيها وتبقى لفتة كريمة تعبر عن رغبة شعبية... ياريت يوصله نبض الشعب ويلغيها ويحقق للناس الأمان والأمنية... أكيد هو عالم بحالنا وعارف ان الشعب منتظر قراره ويستاهل الهدية... !! وتقديراً مننا للسيد مسؤول الجباية وتعبيراً عن حسن النية... نتقدم باقتراح بريء يعوضه عن حرق دمنا والضريبة العقارية... ويخليه يعلو كمان وكمان في بورصة الترشيحات الحكومية... ويحل مشكلة المشاكل اللي بتهدد خططه وتعطل خطة التنمية... وتقلل التزامات الحكومة والدعم اللي بتعايرنا بيه في الصبح والضهرية... الحل يا سيادة العبقري هو فرض ضريبة جديدة على كل مواطن عنده أكثر من طفلين أنجبهم وهو عاقد العزم والنيه... ضريبة على الطفل الثالث فما فوق هو المقترح الجديد في الخطة القادمة الخمسية... يقلل الانفاق القومي ويحل المشكلة السكانية... ده غير الحق في التفكير بالضريبة على الشهيق والزفير وباقي المستلزمات الحياتية... ولو ما قدرتش تعمل ده ياريت تفكر في ضريبة كمان على هدومنا الداخلية... وساعتها مش حتنتهي بيها لأننا حنقلع هدومنا ونمشي بالمايوهات على الكورنيش أو شواطئ الاسكندرية... أو نعمل لكم فضيحة ونروح ونمشي بلا بيص على شواطئ حبايبك الهوامير في شرم الشيخ والغردقة ورواد القرى السياحية... وكمان قدام كاميرا الفضائيات وعدسات المحطات الاخبارية... علشان يكونوا شاهدين وشايفين ايه اللي بيعمله الغالي في ولاد شعب بهية... ياترى ايه رأيك حتلغي الضريبة وللا نروح عالبلاجات وتتحمل انت المسؤولية... !!