حكايات عفيفي 
زكي عثمان قال له : ماتمسك انت مكاني احسن واقعد أنا أشرب شاى ع القهوة 
فاورق جعفر : مش من حق المدرب يقوللي أنا تحديدا العب فين وازاى!
شوفوا .. تتفقوا تختلفوا في اللي حاقوله انتوا أحرار .. بس هى دي الحقيقة .. فاروق جعفر نجم الزمالك ومنتخب مصر زمان ملك النص ومحدش قدر ياخد منه اللقب ده لحد النهارده .. اناعلى المستوى الشخصي بحبه جدا .. صحيح هو بتاع مصلحته بالجامد ويبيع اى حاجةعشان المصلحة دي .. بس كان زملكاوى من شعر راسه لحد رجليه .
انا اشتغلت كتير اوي في مجال الصحافة الرياضية .. مش ناقد رياضي ، بس بفهم في الكورة كويس اوي .. وكنت وانا طالب بتدرب في الجرايد كلها .. ومن أمتع تجاربي في الوقت ده تجربتي مع الاستاذ حمدي النحاس رئيس تحرير الكورة والملاعب ورئيس القسم الرياضي في المساء .. واذا كنت بقول على جعفرملك النص ..فحمدي النحاس كان ملك المانشيتات الصحفية الرياضية بلا منازع .. عايز تغيظوا هاتله زيزو .. حسن شحاته يامعلم لي خلّي الشبكة تتكلم ، عايز اقولكم ان الجورنال الوحيد في مصر اللي كان بيتباع بضهره هو جورنال المساء .. بمعنى ان الجرايد كلها اخبار أهرام جمهورية بتبقى محطوطة عند البياع بوشها ، يعني بالصفحةالاولى .. انما المساء فكان بيتعرض بصفحته الاخيرة عشان المانشيت الرياضي .. والله العظيم بتكلم جد.. المهم ان في الوقت ده كنت ماسك نادي الزمالك وكنت رايح جي عليه يوميا .. وبفرح اوي وانا شايف الخواجة وطه بصري وحسن شحاته ومحمد توفيق واحمد رفعت وجعفر طبعا .. وحصل مرة ان كان فيه ماتش بين الاهلي والزمالك .. وفوجئنا كلنا ان جعفر في الماتش ده بيلعب قلب دفاع .. مش في النص بتعليمات خاصة من مدرب الزمالك في الوقت ده زكي عثمان .. المهم ان الزمالك كعادته دايما اتغلب منا لاهلي 2 – صفر .. والجونين جم عن طريق خطأ دفاعي جامد من حعفر .. وكانت تعليقات النقاد بعدها ازاى جعفر يلعب ستوبر قلب دفاع .. فلا هو أجاد في المكان ده ولا حدغيره ملا فراغه في خط النص.
.............................. 
مكدبتش خبر ورحت مقابل فاروق جعفر في النادي بعد التمرين .. ودي كانت اول مرة اقابله .. هو على المستوى الشخصي انسان مؤدب وظريف .. بس الأنا عنده عالية حبيتن .. ومن حقه بصراحة .. فسألته : ايه اللي حصل ياكابتن؟
طيب نشرب حاجة الاول .. ولا حد قاللك عني اني بخيل وبموت ع القرش " ده جعفر اللي بيقوللي " .. رديت : العفو يا ابو الكباتن .. ده انت ابو الكرم كله .. فراح قايل : بيني وبينك احنا الاتنين ناكل ونشرب على حساب زكي عثمان المدرب .. ربنا يسامحه .. هو السبب ومحدش غيره في نتيجة الماتش ده.
إزاى ياكابتن؟
رد : فوجئت في التدريب الاخير قبل المباراة انه بيطلب مني العب الماتش ده قلب دفاع عشان امسك الخطيب وامنعه انه يجيب جون .. فقلت له ياكابتن انا ماليش في الحتة دي خالص .. وبعدين زيزو " يقصد عبد العزيز عبد الشافي " في نظري أخطر من الخطيب .. وزيزو بيميل دايما للنص وبيرمي ثروهات ملهاش حل .. وبعدين بيسرق الدفاع وفي لحظة تلاقيه في التمنتاشر .. فخليني مكاني وانا تبقى عينه منه وعليه ، فراح قايل لي بشخطة ونرفزة : ماتمسك انت مكاني احسن واقعد انا اشرب شاى ع القهوة .. عشنا وشوفنا اللاعبين بيعدّلوا على المدرب ويضبطوا له شغله .. نفّذ اللي بقولك عليه ومش عايز كلام كتير .
اضطريت مرغما ان اسمع كلامه بضغوط من شحاته وعلى خليل .. واتغلبنا يومها 2 – صفر .. والجونين جم بغلطة مني .. خاصة الجون التاني اللي جابه زيزو .. الكورة اترفعت من اليمين وانا كانت عيني ع الخطيب ، فنطيت لها ونزلت قبل ماتوصل .. تقديري مكنش مضبوط لانها مش حتّتي ، قامت الكورة نزلت على راس زيزو فحطها بمعلمة على شمال اشرف ابو النور .. وخلص الماتش ، وبعده دبيت خناقة لرب السما مع زكي عثمان وهو بيلومني بعنف ع الجون التاني بالخصوص .. ، مش قلت لك ماليش انا في المكان ده؟ فسخّف معايا في الكلام ، وكان ردي : بعد كده لو انطبقت السما على الارض مش حالعب في المكان ده تاني.
.................................... 
.. يومها سألت جعفر : وانت كلاعب مش مفروض تنفذ تعليمات المدرب؟
رد : طبعا بس في مكاني .. هو انت كمدرب مثلا ممكن تطلب من الخطيب يقف جون .. واذا رفض توقفه او تجازيه ؟ .. صاحب العقل يميز .. بعدين انا نجم ومعروف وعارف امكانياتي استثمرها ازاى وفين .. فمتجيش انت تعملي فيها ابو العريف .. وتخترع لي اختراع يجيبنا الارض وتقوللي انا المدرب ولازم تسمع الكلام .. لأ .. مش حاسمع الكلام ومطرح ماتحط راسك حط جليك .. ناس دماغها زلط .
يومها واحنا قاعدين على حمام السباحة والكلام سخن اوي سألته عن الخطيب ومين الأخطر في نظره : هو ولا زيزو .. فرد بدون تفكير : طبعا الخطيب لاعب مهاري كبير جدا .. بس لو حتقوللي مين الأخطر حقولك عبد العزيز عبد الشافي .. بس جماهيرية الخطيب طاغية جدا ، فجمهور الاهلي مش شايف غيره .. انما عبد الشافي ده ثعلب الملاعب .. بس حظه وحش وبيتعرض كتير للإصابة ويبعد مدد طويلة ، عشان كده مش واخد حقه صح في النادي الاهلي.
يومها برضه اتكلمنا عن مصطفى عبده جناح ايمن الاهلي والمنتخب القومي فقاللي جعفر عنه بالنص : إديني مصطفى عبده وأى 8 لاعبين تانيين وانا اكسب اى ماتش العبه .. أرمي له الثرو وواثق انه بسرعته حيجيب جون وتلاته وعشرة.
..................................... 
بعد مانشرت الحوار مع جعفر في جريدة المساء وكان عنوانه : مش من حق زكي عثمان يقوللي العب فين وازاى .. واذا مكنش يعرف مين هو فاروق جعفر ..فيسيب التدريب احسن له.
اتقلبت الدنيا في نادي الزمالك بعد الحوار ده .. وزكي عثمان عمل خناقة محصلتش مع جعفر اللي من جدعنته اعترف بكل كلمة وحرف انا كتبته .. ومش فاكر وقتها اتخصم لجعفر مبلغ أد ايه واتحرم من اللعب كام ماتش ، بس من يومها وهو لو حد قاله سيب النص والعب في حتة تانية مقولكمش ممكن يعمل فيه ايه!
قابلت جعفر بعد الموضوع وقعدنا في حمام السباحة برضه وقاللي تشرب ايه .. بس خد بالك انت اللي حتدفع المرة دي .. لانك اتسببت في خصم مبلغ وقدره عليا .. فقلت له : فداك ياكابتن .. لو عايز نتعشى كمان انا حاضر .. فضحك وقاللي : بهزر معاك .. بس موضوع حلو .. ومكتوب بمعلمة .. صحيح كلفني كتير .. بس طظ .. المهم في الأخر قلت اللي انا عايزه ومقتنع به .. واللي يزعل يشرب م البحر.
شاى بقى ولا قهوة .. ولا ايه رأيك نشرب فراولة تحية للأهلي في الماتش الأخير؟!
" الحلقة اللي جاية عن الرائعة بكل المقاييس كروان الشرق فايزة احمد .. انتظروها "