حكايات عفيفي
جمال سلامة قال لي عنه : هو لا موسيقار .. ولا فرق عندي بينه وبين الريس متقال!
قلت لعبد الوهاب : رد يا استاذ .. فقال : ما انا رديت يا ابني .. مش واخد بالك ولا إيه ؟!
( 1 )
كنت يومها في مسرح البالون .. والله مافاكر حتى كنت رايح أقابل مين .. الكلام ده سنة 80 او 81 ، وانا قاعد اشرب شاى في الكافيتريا ، لقيت " لمّة " كبيرة ، ناس من فرقة الفنون الشعبية وناس تانية معرفهاش قاعدين مع الموسيقار المعروف جدا وقتها د - جمال سلامة .. شوية ضحك وشوية جد ، وانا كنت قريب منهم ، فلقيته بيقول وهو بيضرب كفا بكف : واللي غايظني انهم يقولوا عنه موسيقار الجيلين .. يعني حتى موسيقار عليا أنا كجمال سلامة .. انا يطلع عين أمي واروح روسيا وادرس واخد الدكتوراه في الموسيقى ، وعبد الوهاب مخرجش من مصر اصلا لحد بنها ، ويقولوا عليه موسيقار!.
الكلام شدّني جامد .. ومش قادر أجمّع بالضبط هو عايز يقول ايه .. فقمت من مكاني ورحت لحد عندهم .. واللي يسأله : معقولة يادكتور جمال .. عبد الوهاب مش موسيقار ، والتاني يقوله : مفاجأة دي .. وجديدة.
فرحت داخل في الموضوع من غير إحم ولا دستور : حضرتك يادكتور جمال بتتكلم عن محمد عبد الوهاب؟
رد : أيوه حضرتي بتكلم عن عبد الوهاب .. بس بقى حضرتك مين؟
رديت : انا صحفي في " صباح الخير " .. وكلامك صدمني جدا ..
راح رد : هى الحقيقة دايما تصدم وتوجع .
قلت بدهشة وغيظ منه : ازاى عبد الوهاب مش موسيقار ؟
رد : اقعد وحا اقولك : أنا اسمي الدكتور جمال سلامة .. ثم بغرور سخيف كرّرها : إسمي ايه ؟ .. الدكتور جمال سلامة .. اللقب ده مش واخده " عياقة " ولا " بكوزين درة " .. انما قولي عبد الوهاب أخد ايه بسلامته ؟ .. ولا حاجة ..
رديت : بس ده ميمنعش ابدا انه عبد الوهاب الموسيقار الكبير .
رد : ده عند الناس الجهلة اللي مبيفهموش .
وراح ضارب قنبلة : تعرف .. عبد الوهاب عندي زي الريس متقال .. ده بيلحن وده بيلحن ...... " الريس متقال وقتها ياجماعة كان ملء السمع والبصر .. مغني شعبي صعيدي كان مكسّر الدنيا .. ولف العالم كلون شعبي جديد بجمال الكلام الصعيدي والالحان الرائعة " .. المهم راح صاحبنا مكمّل : م الأخر كده مفيش فرق بين عبد الوهاب والريس متقال ..!!
قلت له : انا حاكتب على فكره الكلام ده .. عندك اى مشكلة .. وحتتحمل نتايجه؟
رد : انت بتهددني يابني انت .. اكتب طبعا وعلى لساني .. وادي كل اللي قاعدين شاهدين .. بقولها لك كمان مرة : لا فرق عندي بين الوهاب والريس متقال ..ثم وهو يضحك ساخرا : أحمد زي الحاج أحمد!!
مشيت وتاني يوم كنت في المجلة .. وكتبت الموضوع .. كان قصير مش طويل .. مجرد تصريح أنا عارف ممكن يعمل ايه .. وبنفس العنوان اللي قاله جمال سلامة .. زدت عليه بس : جمال سلامة يقلب المائدة .. لافرق عندي بين عبد الوهاب والريس متقال.
ونزل الموضوع في المجلة .. والدنيا اتقلبت رأسا على عقب.
*****************************
( 2 )
انا متعود لما كنت في مصر انزل الصبح اقعد في كافيتريا في م نصر او اروح نادي الزهور ومعايا الجرايد كلها .. ففوجئت بمقال مصطفى امين في الاخبار " فكرة " ماسك جمال سلامة وماسح به الارض .. وقال له : موهبة عبد الوهاب بمليون رسالة دكتوراه من اللي معاك .. وقال فيما معناه : طيب انت موسيقار وهو مش موسيقار .. ممكن تقول لنا جنابك وصلت لفين .. وكم حجم قامتك الفنية اذا ما قورنت بقامة عبد الوهاب ؟
الله اكبر .. مصطفى امين مرة واحدة .. فتحت الصفحة التانية في الاخبار قريت " نص كلمة " لأحمد رجب .. قاله فيها بتريقة محصلتش .. انت لفت نظري ياسيادة دكتور الموسيقى الجهبذ في الشرق الاوسط والعالم وبلاد واق الواق .. يابتيهوفن زمانك وموزار كل عصر .. حتخليني بعد تصريحك ده أروح للاستاذ مصطفى امين اللي أسس هو واخوه أخبار اليوم .. واسحب منه التراخيص وأعرّفه حجمه واقوله : يابتاع كلية الهندسة .. مال أمك انت ومال الصحافة .. وريني شهادة واحدة بس تقول انك صحفي او درست الصحافة .. حاشيله واقعد مكانه وحاضرب لي شهادة دكتوراه زي بتاعتك واعلنها على الملأ .. انا اللي عملت " أخبار اليوم " مش الباشمهندس.
قعدت اقلّب في الجرايد التانية .. لقيت الاستاذ محسن محمد الصحفي الكبير اوي وقتها في " الجمهورية " كاتب بقرف غير مسبوق ووصف اللي قاله جمال سلامة بأنه يجبر الواحد على الغثيان .. وكذلك أنيس منصور .. وكاتب في المساء اسمه رشيد الليثي .. وواحد تاني مش فاكر اسمه كتب ساخرا : ازاى يقولوا على صالح سليم مايسترو الكرة المصرية وهو مش متخرج من معهد التربية الرياضية ومش معاه شهادة دكتوراه في كرة القدم ؟!! .. وحمادة امام ثعلب الزمالك ضابط جيش .. ازاى وبأى حق اقول عليه نجم نجوم مصر ، مال بتوع الجيش ومال الكورة ؟!! .. ده غير المجلات الاسبوعية وكتّاب المقالات فيها فيما بعد.
يعني جمال سلامة فتح على نفسه فتحة سودا " واهو عايش لحد دلوقتي وربنا يديله طولة العمر .. ويستطيع انه يكدبني لو انا كداب " .. باختصار الموضوع عمل قلبان .. وانا بقى صحفي صغير لسه متخرج وخارج من الجيش وعمري 23 سنة مش اكتر .. وكنت حطير م الفرحة .. موضوع زي ده ممكن ينقلك نقلة متحلمش بيها.
وانا نازل من صباح الخير قابلني استاذي الجليل والصحفي الكبير صلاح حافظ عند الاسانسير ، فأخدني بالحضن وهناني على الموضوع .. فقلت له : مكنتش متخيل ان معظم مقالات الكتاب الكبار النهارده حتبقى عن الموضوع ده.
فرد : طبعا .. لأنه موضوع حلو وجرىء من جمال سلامة ومنك انت كمان. بس ناقص حاجة مهمة لازم تعملها .. سألته : ايه يا استاذ ؟ قال : تكلم عبد الوهاب في التليفون وتشوف حيرد يقول ايه ..
قلت باستغراب حقيقي : أنا أكلم عبد الوهاب ؟ رد : أيوه .. انت تكلم عبد الوهاب .. خلي عندك ثقة في نفسك .. انت صحفي كويس .. وعملت موضوع قنبلة.
وتفتكر يا استاذ صلاح حيرضى يقابلني ؟
فرد : انت وشطارتك وظروفه .. ممكن جدا يقابلك .. وممكن يكتفي بالكلام في التليفون .. المهم يابوحميد .. متسبش الموضوع .. ده موضوعك .. واذا كسّلت عنه .. حتلاقي الف واحد كلم عبد الوهاب وركب على الموضوع وسرقه منك.
*****************************
( 3 )
" كل ده كان ليه لمّا شفت عنيه .. ولأ مش أنا الي أبكي ولا أنا اللي اشكي .. وعشق الروح مالوش أخر لكن عشق الجسد فاني .. وعلشان الشوك اللي في الورد بحب الورد .. ولا بقى ألحانه للست .. انت عمري وهذه ليلتي وأغدا ألقاك .. وعبد الحليم فاتت جنبا وأهواك .. يانهار ابيض .. انا ممكن اسمع صوت اللي عمل الروائع دي كلها واكلمه؟
..... الو ... مساء الخير .. ممكن أكلم الاستاذ.
صوت واحدة ست بمنتهى الادب : نقوله مين حضرتك؟
.... انا احمد عفيفي من مجلة صباح الخير.
بنفس النبرة المهذبة : ثانية واحدة .
الثانية دي مرت كأنها سنة .. حيرد مش حيرد .. الست حتعتذر .. نايم .. مشغول .. اى حاجة ..
وانا سرحان كده والسماعة على ودني لقيت صوته : مساء الخير .. اهلا وسهلا .. ازيك يا ابني .
بارتباك حقيقي : إيه ده .. والله العظيم ما مصدق نفسي .. انا بكلم الموسيقار الكبير الاستاذ عبد الوهاب .. ده شرف مكنتش في حياتي احلم به يافندم.
بصورته الرخيم : أشكرك ياحبيبي .. انا تحت أمرك ..
رديت : ربنا يخليك يا استاذ .. انا اللي عملت موضوع جمال سلامة .. وانا اسف على اللي قاله في حق حضرتك .. فيا ترى قريته؟
رد : أيوه .. قريته.
سألته : ورأى حضرتك إيه في اللي قاله؟
رد : متهيألي الناس كلها ردت نيابة عني .. وراح سألني : قريت مصطفى امين ورجب ومنصور وغيرهم كتير ؟
قلت : طبعا يا استاذ .. هما مدفعوش عن حضرتك .. بس زي مابنقول : عرّفوه قيمته ووضعه الحقيقي.
رد بثقة متشفهاش غير عند القامات الكبيرة : تعرف اني بحب موسيقى جمال سلامة جدا .. متطور وجميل .. وانا شايف المقالات كلها جرّحت فيه بشدة .. المسألة مش مستاهلة .
قلت : ازاى يا استاذ .. المقامات لازم تكون محفوظة .. ولمّا نتكلم عن الكبار .. لازم نحاسب على كلامنا ونعرف احنا بنقول ايه.
رد : بسيطة .. محصلش حاجة .
قلت : بس تفتكر هو ليه بيهاجم حضرتك بالشكل ده ؟
رد : افتكر دي اول مرة يجيب سيرتي .. مظنش اتكلم عني قبل كده .. لا بحلو ولا بوحش.
قلت : طيب ولو حضرتك رديت على كلامه ممكن تقوله ايه.
قال : عبد الوهاب ميردش ابدا على حد أهانه.
قلت : ليه يا استاذ؟
رد : ححس اني صغير وحانزل لمستوى اللي شتمني.. وانا مش كده.
قلت : طبعا يا استاذ ..
وبعدين بسذاجة من صحفي صغير معندوش خبرة : بس برضه ياريت ترد ولو بكلمتين .
قال : ما انا رديت عليك .. بما فيه الكفاية .. ولا انت مش واخد بالك؟
.... أدركت عمق كلامه : " ححس اني صغير وحانزل لمستوى اللي شتمني.. وانا مش كده ".
فقلت : مضبوط يا استاذ .. فعلا حضرتك رديت باختصار واف أبلغ رد.
رد : أهلا بيك ياحبيبي.
************************
( 4 )
... استاذ .. لحظة بعد إذنك
رد : اتفضل انا معاك.
قلت : هو ايه رأى حضرتك في الريس متقال؟
وهو بيضحك : جميل .. لون حلو وناجح .. بيغني بروح الصعايدة " الحبيّبة " واحاسيسهم الحلوة اللي كلنا بنحبها.. تعرف بيفكرني بمين؟
... مين يا استاذ؟
رد : بمحمود شكوكو المبدع مع اختلاف اللهجة .. بس نفس اللون الجميل الممتع اللي الناس بكل طبقاتها ممكن تحبه.
قلت : صحيح يا استاذ .. حضرتك اللي لحنت اوبريت " الحبيب المجهول " في فيلم " عنبر " .. ليلى مراد ومعاها شكوكو واسماعيل يس وعزيز عثمان وواحد لبناني.
قال : مضبوط .. فاكر شكوكو كان بيقول ايه .. ؟
قلت : اهو انا اهو انا ولا حد ينفع الا انا .
رد : لأ .. ده اسماعيل يس .. شكوكو قال : من ناحية قلبي ونار قلبي واحد حبّيب موت .. وحبيبي لو غاب يوم عني أرقع ميت صوت .. ثم وهو بيضحك : شايف ابن البلد لما يحب ممكن يعمل ايه .. يرقع بالصوت زي الحريم .. كلام جميل وبسيط .. واللي كتبه حسين السيد الشاعر العبقري.
قلت : عايز تقول ايه يا استاذ؟
رد : عايز اقول ان كل واحد في مجاله عبقري .. حتى الريس متقال انا بعتبره عبقري في مجاله .. مادام نجح وقدر يوصل للناس .. يبقى عنده حاجة كويسة.
قلت : انا سعيد اوي يا استاذ بالمكالمة دي .. وان كنت اتمنى اقابلك واشوفك واسلم عليك ..!
رد : معاك التليفون ياحبيبي .. كلمني في اى وقت .. واكيد حاشوفك.
***************************
( 5 )
نشرت كلام الاستاذ عبد الوهاب في صباح الخير .. وبعدين فوجئت بمجلة الكواكب بعد نشر الحوارين " سلامة والاستاذ " عاملة ملف خاص حوالي 16 صفحة .. وبتطرح فيه السؤال ده : هل حقيقة ان عبد الوهاب ليس موسيقارا .. وجابت بقى وجهات نظر كل الموسيقيين والملحنين والفنانين بصفة عامة .. وكان الهجوم نازل زي الصاروخ على راس جمال سلامة .. بس الجميل بقى في الحكاية دي .. ان الملف كان فيه حوار طويل جدا مع جمال سلامة نفسه .. وكنت فاكر انه حيكدّبني وينفي كل اللي قاله عن عبد الوهاب .. الا انه في الحقيقة أكد على كل حرف انا نشرته رغم الهجوم الرهيب اللي اتعرض له وراح عايد نفس الكلام : أيوه .. عبد الوهاب مجرد ملحن مش موسيقار .. ومفيش فرق عندي بينه وبين الريس متقال !