fiogf49gjkf0d
حلمك يامولانا..!!
الله يجازى يناير وثورة يناير اللي خلت كل واحد يطلع له لسان..وزمان قالوا في الأمثال القوالب نامت والإنصاص قامت والنمل طلع له سنان..خلاص الكل نسي نفسه وماضيه والعمر له حُكمُه وربنا يكفينا ويكفيك شر التوهان..الكل خلاص بقى فاكر نفسه قديس ووطنى ومحارب قديم للنظام السابق وكأنه عابد بيحارب الأوثان..يروح ويلعن سلسفين أبو العهد البائد ويغازل الناس فى الصحف والبرامج ويتكلم بحنان..أتاري الكل كان مغبون ومقهور ياعيني رغم أغلبهم كان بيتعامل مع النظام وعايش كافي خيره شره وإختار العيشة في أمان..لكن سبحان المُعِز المُذِل اللي بيبدل الأحوال في لحظه ومن غير ميعاد وياريت بيتعظ الإنسان..مفيش حد له حق يزايد على حق الشعب اللى بس لوحده عانى وعاش القهر والذل والهوان..مفيش حد قاسَى زينا ولا حد شاف اللى شُفناه من الفساد والفاسدين والغيلان..مفيش شعب زينا عاش في العشوائيات والمقابر وحُكامه عاشوا في الجاه والسلطه والهيلمان..إحنا اللى هو أنا وإنت وهو وهي أصحاب الثورة وأصحاب الحق وإحنا اللي شفنا الويل من كل اللي حكمونا من زمان..إحنا اللي خرجنا وفتحنا صدورنا للرصاص ولا همنا وإحنا اللي صمدنا للجمال والبغال في الميدان..مفيش حد صاحب فضل علينا غير رب العباد مش أي واحد بيهلفط بالكلام كائن من كان..عاوز تعرف أكتر روح مرة في مليونية وإسأل محمد وهشام وعمهم يسري وأختهم نوران..وإسأل كمان صلاح وجاك وأشرف وعم أنور والحاج شعبان..روح وإسأل القهر مين كانوا أصحابه ومين اللي كان بيتعشى وعود وظلم وحرمان..الثورة دي ثورتنا ولولا الشحن اللي كان جوه كل واحد فينا ماكانش حيحصل الطوفان..وإن كان هناك جماعة ليهم خبرة تنظيمية قديمة واتغلغلوا ودابوا وسطنا في الميدان..فكل ده مش حيقدر يغير الحقيقة إن الثورة دى كانت نتيجة قهر وظُلم نظام ورد فعل مواطن عاش طول السنين مطحون بائس غلبان..خلاص الأقنعة زالت وبانت النوايا وصعب ينضحك علينا بدقن وسبحة وقفطان..مين اللي حيقدر يغمي عينينا من تاني وتفتكر ممكن نستبدل فرعون بهامان..!! كلنا شايفين وسامعين ناس بتلف وتدور في البلاد في حملة غير مسبوقة إعلامية..وبيتكلموا كلام خطير ومثير وبيحاولوا يأثروا على المواطن البسيط ويستولوا على الإرادة الشعبية..عينهم على الكرسي والحُكم والطريق يبدأ بالأغلبية البرلمانية..وشفنا وسمعنا مؤتمرات وأحاديث وإعلانات مدفوعة الأجر إعلانية..وتصريحات كتيرة من كل القيادات اللي كانت محظورة واللي كانت في السراديب مخفية..فاكرين ياعينى خلاص إفتكروا الشارع بتاعهم بعد ما أصبحوا رقم في المعادلة السياسية..بسرعة صدقوا أنفسهم وتخيلوا إنهم إمتلكوا الشارع والبيت والغيط والأغلبية..تقوللى ثورة تقوللى فكر جديد إبقى قابلنى لأن اللي في القلب في القلب والنية زى ما هيً..لكن الشئ الغريب التصاريح المصحوبة والمحشية بالثقة المزيفة والعنجهية..سمك لبن تمر هندى على فتة بالخل والتوم والحلو جلسة ذكر على طبق مهلبية..واحد يقول إن هزيمة 56 حرب وكمان 67 كانت بسبب البطش بيهم وإن الهزيمة كانت عقاب للأمة وهبة من الله إلهية..طب إنتصارنا في 73 كان برضه عقاب لينا من رب السماء وللا ربنا بيعاقبنا بطريقة إختيارية..رغم إن كوادرهم كانت في نفس الأوضاع والحظر المفروض من الجهات الأمنية..شفت بقى المزج بين اللي عاوزين يقنعوا الغلابة بأنهم ياعينى مظلومين وإن قلوبهم شفافة وصافية النية..الظاهر مولانا نسى القول السامى"من أعمالكم سُلط عليكم" وللا الحكاية نختار مواقيت العناية الإلهية بصورة مزاجية..وقيادى آخر تلاقيه على المنصة وأطفيح وماسبيرو منتشر ماشاء الله بصورة إعلامية..بيتكلم بكل ثقة وبيدلى بأحاديث وتصريحات بصورة كتير عنجهية..وبيموت في الفلاشات وكاميرات التصوير والقناه إياها الفضائية..مولانا قال إنه صُحبته مش ناوية تشارك خالص مالص بالص في الإنتخابات الرئاسية..لكن لو عاوزين ناخد البرلمان حنفوز بكل بساطة في الإنتخابات التشريعية..لكن جنابه تفضل علينا بالإكتفاء بالثلث الظاهر حسب القسمة الشرعية..ياترى الكلام ده ممكن يبقى صحيح وللا فاصل ونعود لموجة من الأفلام الكوميدية !!..وقيادى تانى بيعترف بالبنط العريض في الجرايد والمواقع الصحفية..إن جماعته حاولت إغتيال الرئيس السابق 12 مرة بالقصد والنية..مش بس كدة وخلاص ده كمان إعترف بقتل رئيس مصر بمبدأ "نتغدى بيه قبل مايتعشى بينا" حسب الأمثال الشعبية..وياعينى كانوا خايفين يعمل زى اللى قبله ويطاردهم ويحاصرهم بالإجراءات الأمنية..يعنى قتلوا رئيس دولة لمجرد الخوف والشبهات تحت بند إتقوا الشبهات وإنما الأعمال بالنية..إيه رأيكم دام فضلكم في كل التصريحات من مولانا ده وللا ده وللا ده وإيه حيكون مصيرنا لو سلمنا صوتنا وبلدنا ببساطة ليهم تحت بند الشرعية..الله يستر علينا ساعتها وقبل كل واحد فينا يستر على أم الدنيا بهية..!! الخلاصة لازم تاخد بالك وتفهم اللي بين السطور وماتصدقش كل اللي بتشوفه عينيك..لازم تراجع ألف مليون مره وتربط بين الأحداث اللي بتحصل حواليك..مش كل واحد بيقول الله والرسول يبقى تمشي وراه وتصدقه وتروح وراه برجليك..خد بالك من الثورى النوري الكلمنجي واللي تحت أى شعار بيضخك علينا وعليك..فكر وأوعي تنسي إن مستقبل بهية كله مش بإيد أي واحد عامل فيها مولانا أو ثورجي المستقبل كله بين إيديك..اللى حتزرعه دلوقتى ومهما كان حصاده حلو أو مُر حيكون ليك..!!
Said_elmasryfahmy@hotmail.com