بركان الغضب ...!!! فجأه إنتعشت حركة الإعلام والأخبار في الفضائيات..وشفنا ناس بتحلل اللي سمعوه وشافوه علي مواقع النت والشاشات..ولقينا ناس فجأه مانعرفهمش ولا بنشوفهم غير في المصايب والمناسبات..وهوانم كتير بيحللوا اللي حصل واللي وصل ومعاهم شويه أفنديه وبهاوات..وسمعنا برامج التوك شو وشفناها بتستضيف ضيوف حكم علينا الزمن بيهم بيتحفونا دايما بالفذلكة والتحليلات..وجيوش من فلاسفة التعليق والتحليل ومراكز أبحاث دولية واستشارات..ووجوه بلانا بيها الزمن وحباها مناصب صحفية وإعلامية ومفروضين علينا تحت بند صحفيين وصحفيات..ورؤساء تحرير رصيدهم في الدنيا الولاء والطبل والزمر لصاحب الأمر مهما كان مين من غير إعتراضات..المهم والناس عاوزة تفهم لقينا تعليقات بعيدة عن الواقع وتهوين من اللي حصل واستظراف وسلبيات..رغم اللي حصل خطير وكان يوم مشهود بالصوت والصورة علي كل الفضائيات..يوم كان الإحساس موجود وإنه قادم لامحالة في قلوب كتير من المصريين والمصريات..أتاري العدوي التونسية إنتشرت وصاب رذاذها شعوب تانية ودارت عجلة الإحتجاجات..أتاري ناس لقطت الفكرة ونادت بيوم الشرطة يوم للغضب والمسيرات..وخرجت جموع كتيرة واجتاحت الميادين وهاجت الجماهير في المظاهرات..اللي بيهاجم الحكومة واللي بيلعن الفقر بكلام خارج النص في صورة شعارات..واللي بيصرخ من البطالة واللي بيدعي علي الغلاء وقلة القدرة علي تلبية الإحتياجات..كان يوم مشهود وغير مسبوق في المحروسة من زمن العهد اللي فات..أتاري كان فيه نار محبوسة في الصدور وبركان جوه النفوس مشحون بالإعتراضات..نماذج كتير من المواطنين ستات ورجالة وشباب من المدارس والجامعات .. كان الكل بيغني علي ليلاه حسب الإنتماء والحاجة والحسابات..اللي بيصرخ من الغلاء واللي بيشتكي الفقر واللي مش عارف يتجوز بنت خالته عنايات..واللي مش لاقي وظيفة واللي عاوز يتعالج ومش لاقي سرير في المستشفيات..واللي فاتح كشك أو سارح بشوية خضار ومش ملاحق علي ملاعين الحي وملوك الأتاوات..واللي مش عارف ياخد تأشيرة علاج أو اسكان شعبي ترحمه من بهدلة العشوائيات..وكان فيه هناك جماعات بين الناس بتنادي بكلام غريب وتطالب بالحريات..وناس بتركب الموجة والهوا وأهي فرصة تحتج عالإنتخابات..الخلاصة ناس من كل لون ولون يعني سياسة علي إقتصاد علي قهر ممزوج ببطالة علي كوكتيل عدالة إجتماعية وحريات..بصراحة اللي حصل في المحروسة رغم وجود أسبابه كان أسرع من كل التوقعات..الله يستر علي الأيام اللي جايه ويحرس المحروسة بلد القلعة والأهرامات..يارب الكل يفوق مواطن ومسئول ونبدأ من جديد ونتعلم من اللي فات..ياريت نفتح الملفات وننشر العدالة ونبدأ بالمصارحة من غير تلميحات..الحكاية مش حكاية شعب قام يعترض ويثور علي مطالب حياتية أو شوية فتات..الحكاية بإختصار حكاية شعب بص شاف ناس بتتحكم في مصيره وبتورثه وهو حي وكأنه مات..صعب جدا تبقي مواطن في بلد وتلاقي مسئول بيحطك دايما بره الصورة خارج الحسابات..صعب جدا تلاقي مجتمع بفوارق طبقية ملحوظة وضرائب علي المواطن بالملايين وعلي البهوات بالألوفات..صعب تلاقي عنوسة وبطالة وسيس في كل حارة وناس بتعيش عوالة علي الفتافيت والإعانات..صعب جدا تلاقي المواطن بيلاقي مرتبه طول حياته أقل من أجر عشر ثواني لفنان في أحد الإعلانات..صعب وجدا جدا لما تلاقي إبنك فشل واصبح طبيب أو مهندس ويلومك علشان حرمته يبقي لعيب كورة يقبض بالدولارات..ربنا خلق الناس طبقات سبحانه بس بالعدل والإيمان مش بالبيزنس والصفقات..علشان مايحصلش اللي حصل لازم نعالج الأسباب ونعيد ترتيب البيت ونعيد من تاني الحسابات..لازم نتعلم ونستفيد ونعرف إن الكل قاعد ومفنجل عينيه علينا مستني المفاجأه والتغييرات..يارب تحفظ بلدنا وتحميها من نفسها ومن أصحاب المصالح والمحميات..يارب تحفظ بلدنا من المزايدين وبتوع الأجندات الخارجية وكل واحد ضميره باعه ومات..!! لكن ياتري إيه اللي حصل وخلي الناس تقوم وتهتف ضد الحكومة..وإيه اللي خلي بركان الغضب يغلي في الحناجر ويحرر الأصوات المكتومة..ياتري الناس خرجت بعفوية وللا بترتيب وليها كانت صدورها مفتوحة وقلوبها مكلومة..معقول يحصل كل ده من فراغ ومعقول كل الناس دي عايشة مظلومة..ياتري الشعارات اللي رددها الناس في يوم الغضب كانت عفوية وصادقة وللا شعارات متفبركة ومزعومة..أيا كان ومهما حصل اللي جري في بلدنا دليل علي وجود خلل أكيد في المنظومة..!! اللي حصل في المحروسة جرس إنذار مهما كانت المطالب والأسباب..ولازم نفتح القلوب والملفات وكمان كل الأبواب..ولازم نشوف ليه العدل إتأخر علي الناس وليه الود بينهم وبين الحكومة داب..وليه ضاعت الشفافية بين المسئولين والمواطن وزاد الخلاف والعتاب..ياتري مين المسئول الشعب وللا الحكومة ومين المسئول عن الفوضي والخراب..ياتري مين مصلحته يفصل بين الشعب ومسئوليه بجدران من دخان الشك وتلال الضباب..ياتري مين عاوز يرجعنا من جديد ننهش في بعضنا زي الوحوش في الغاب..ربنا يكفينا ويكفيك غضب الحرافيش لو حسوا مرة إن قوت يومهم غاب..ياريت نفهم اللي حصل وننسي المسكنات واللوم والعتاب..ياريت نبدأ وبروح جديدة وفكر جديد ونعيد من تاني الحساب..!! اللي حصل عبارة عن جرس إنذار ورسالة بريد..ولازم ندرس مطالب الناس ونراجع الحسبة من جديد..ونزيل أسباب الإحتقان والغبن والظلم وجبال الجليد..العدالة الإجتماعية وإزالة الفساد والقضاء علي البطالة هي أولويات التغيير والتجديد..لازم نتعامل مع المواطن بأسلوب راقي وجديد..المساواه في المواطنة واجب من غيرفاقوس وخيار أو سادة وعبيد..!! الآن وليس الغد علينا مواجهة الواقع وعلاج الخلل بكل صراحة..الحل الوحيد لعلاج الداء إما الدواء أو البتر والجراحة..سيبك إنت وبلاش وجع دماغ وبلاش تتابع الأحداث مناحة..إيه رأيك تحب تشوف فيلم هي فوضي وللا تشوف فيلم الموسم حاحا وتفاحة..!!
said_elmasryfahmy@hotmail.com