fiogf49gjkf0d
يا مجلس المجالس..ارحل
للشاعر / عبد الحميد زقزوق
يا مجلس المجالس لامتى هتفضل جالس زهقنا م التباطؤ الأشبه بالتواطؤ وانت عمال تطبطب وتحسس ع الطريق السكة واضحة خالص عايزة اللى ضميره خالص وقلبه ع البلد دى وحقانى وجرىء * * * يا مجلس المجالس الشعب كله حاسس إنك مش جد خالص لانك م البداية ما لمتش العصابة ولا حاصرت الديابة وسبت القرعة ترعى في أموال الغلابة وتنقل كل حاجة كت نهباها العصابة لمغارة حسنى بابا وزعيمة الحرابة والأربعين حرامى وقدام النيابة يبقوا هما الغلابة وأصحاب المهابة المفترى عليهم م الناس المفترية وكمان يبقوا الضحية والبركة في اللي والس وفضل ف الخن جالس تحت سقف المجالس واستغفل النيابة وأخفى كل حاجة وضبط الكتابة وميع القضية * * * يا مجلس المجالس العين عليها حارس والحارس يعنى فارس وأصعب شيء يا صاحبي لو الحارس يوالس والعين شايفاه حاميها وفارس الفوارس وهو اللى مكحلها وهو اللى عاميها قاصد ولا مش قاصد الرب بس وحده العالم بالمقاصد والكاشف للهوية واحنا لنا النتايج واللى قدامنا ظاهر حتى لو كات مظاهر الثورة لما قامت قامت بحس طاهر لشباب روحه أبية لا خبث ولا دناءة بل منتهى البراءة ومنتهى الشجاعة وإخلاص النوايا وتخليص مصر سلما بمظاهرة مليونية * * * يامجلس المجالس مسخت الصورة خالص الناس زهقانة منك وانت ولا انت حاسس بالناس ولا بالقضية وكل شىء صغير أو مطلب م المطالب مهما كان اللى طالب عايز له مليونية مفيش حاجة بالساهل ولا بتيجى ببلاش ومهما الصوت بيعلى وضغط الخلق يعلا إنت آخر طناش ومتأخَّر تملِّى ما لكش ساعات تجلِّي في إصدار القرار دايما تفضل تعاند وتبت بدم بارد ف مطالب الثوار لحد م القضية تلم المليونية وكام مية ينصابو وكام شهيد معاهم وبرضه ما بتصحاش ولا بتبطل مراوغة ولا بتبطل ملاوعة ولا بتبطل طناش لحد الناس ما زهقت وشباب الثورة كفروا بالتسويف والمماطلة وقالوا ما بدهاش عايزة لها ثورة ثانية نبدأها بعد ثانية تصحح اللي فاتت والأرواح اللي ماتت شهدا قدام عنينا نحاسب من قتلها وداس على الرقابي وحلمها وأملها وضيعها بلاش ونطالب بالمطالب اللي قمنا عشانها ودفعنا الدم غالي ولسة ما نلنهاش ونخرج من المضيق اللي عمال يضيق ونقطع الطريق على قطاع الطريق اللي بيحاصروا فينا وبيصفوا فى عنينا وبيشعلوا الحريق واللي واقفين وراهم لازم نكشف غطاهم وكل من ساندهم وكل من عطاهم ده دم الشهدا غالي ومش حيروح بلاش *** مش قلنا لكو دي ثورة ثوارها أوعى منا وأكثر منا طهرا لكن على ما يبدو برضه ما صدقتوناش أدينا رجعنا تاني إلى الميدان ف ثواني ومش حنمش منه إلا ما نجيب الجاني وناخد تارنا منه والتار الأولانى ونجيب الفجر تاني والنصر اللي ماجاش.