كاميليا وأخواتها..!!

يا ألف خسارة..

وكأن الفرحة كانت كتيرة علينا وخدها الغراب من قلوبنا وطار..كدة عيني عينك فوضى ورصاص وقنابل ودم وضرب نار..ومسلمين ومسيحيين بينهشوا في بعض ومهما كان السبب ضاع الحياء بينهم قدام العالم وفي عز النهار..حرب مشحونة جهالة وخناسة ومدسوسة فينا من زمان وسايبينها كده زي الشطار..مش عارفين لغاية إمتى حنعيش زي النعام وراسنا مدفونة في الرمل قاعدين بنتفرج علي المهازل وللكارثة عايشين في إنتظار..سايبين الفتنة تكبر وتزيد ومشاكلنا نحلها ببوس الخد وجلسة عرب وغدوة فتة بالخل والتوم وخروف مشوي عالنار..الموضوع زاد عن حده ومفيش حل جذري ولا فيه محاولة فك ألغاز أو حتى أسرار..ياترى إيه اللي خلانا كده ومين زمرة التعصب دول أصحاب عهود الظلام الهَمج الفُجار..مين اللي بيصنف الناس حسب دينهم ومذهبهم ويقسمهم بمزاجه مؤمنين وكفار..مين اللي عاوز يحرق الوطن بنار الفتنة ويهدم المعبد ويهد علينا الدار..مين اللي عاوز يفزع الناس ويسرق أمنهم ويخلي الكل قلقان خايف مرعوب محتار..مين اللي عايزنا نعيش في ذل الفتنة بعد ما إتحدنا في التحرير وكان الكل نموذج  للثوار الأحرار..مين اللي بيمص في إستقرار أمن بلدنا زي دراكولا مشتاق يشوفنا متكعبلين في الخراب والكراهية والدمار..الخلاصة إن الحل عارفينه لكن محتاجين يد من حديد من غير تأخير وإلا بقينا للفوضي عنوان ولغربان التطرف مزار..الشعب يريد وحدته الطائفية الشعب محتاج محبة ووحدة وإستقرار..!!          التهاون اللي حصل في الأسكندرية وقنا ورمسيس وإمبابة أمر مرفوض ومحتاج حزم وحل..وتأجيل حسم الأسباب ونزع فتيل الأزمات خلى حياتنا فوضى وسَلطة من غير خل..صعب مواطن أيا كانت ديانته يعيش في وطنه مهموم بشبح الطائفية ومن قوانين الديابة عايش يتذَل..رابط مصيره بتصريح من هنا وهناك لشيخ أو قسيس وتولع الدنيا بعدها  ويقولوا معلش أصل لسانه زَل..ياترى مين اللي خلى دم ولادنا يسيل في إمبابة من مسلمين ومسيحيين وزاد الكراهية بينهم وخلى الخراب عالناس طَل..كنا دم واحد ونسيج واحد وفي التحرير رسمنا أجمل صورة للوحدة من غير حقد وغل..شوف المستفيد مين وعالج الأسباب من جذورها قبل الأمور ماتضيع من إيدينا وخلايا الوطن تتحلل وقوامه بخلافنا ينحل..الطائفية حصان طروادة ومتنفس للمكبوتين والعنصريين والباحثين عن الأضواء بين الخراب والطل..لازم نجيب الديب من ديله وننزع أنيابه وسمومه ولازم نلاقي الحل..!!                 فيه مظاهر عجيبة غريبة بتحصل قدامنا وإحنا قاعدين ياولداه محتارين..شايفين ناس بتعلن الوصاية علي شعب بحاله وداخلية الحكومة بتتفرج معانا ولا حول ولا قوة زينا زيهم مندهشين..ومساجد بتتغير شيوخها قدام عينينا علشان منهجهم مخالف لمنهج ولاد الذى واللذين..وكنائس بيحاوطها ناس بتطبق قانونها الخاص رغم وجود الحكومة ومفيش غير قانونهم اللي بيه مقتنعين..وحكومة بتبعت المشايخ علشان يحلو المشاكل في قنا وأطفيح وطمعانة في بركتهم في حل أزمة ضريح الحسين..وعشنا وشفنا متهم بقتل رئيس معزوم من محافظ ورايح في موكب مهيب وكأنه من الغزاه المنتصرين..هو مين بقى مع مين والمشاهد اللي بتحصل دي من إمتى وكام وإزاى وفين..هو أحنا بقينا ملطشة لكل من هب ودب وسلمنا خلاص أمرنا لكل واحد بدقن أو بيتكلم في الدين..هو خلاص فيه ناس أباحت دمنا وعرضنا لكل واحد صوته عالي من السادة المتعصبين..خلاص بقى شيوخنا أبو زيد وعبيد ونطاط الحيط وخلاص بقى القمص فلان والقس علان هم اللي هنا وهناك بيفتوا ويتكلموا في الدين..فين رجال المشيخة والكاتدرائية وليه صوتهم خافت ومش مسموع علي مستوى الناس البسطاء العاديين..ياترى السيناريو ده من تأليف وإخراج مين وياترى لبلدنا على إيه ناويين..والغريبة تلاقي فضائيات بنفس الأشخاص ونفس الأسماء مع تغيير المبادئ والعناوين..بيشعللوها ويولعوها ويخربوها وأتاريهم لافاهمين حاجة ولا عارفين..ياترى فين شباب الفيس بوك واللي كونوا جروب كلنا خالد سعيد في لحظة طب فين جروب كلنا مصريين..هي مشكلة الطائفية مش أهم من الإعتصامات ونشر الخصوصيات والشماتة في العصر اللي فات من اللي عاملين عالنت قادة وثوريين..ياعيني عليكي يابلد اللي فيكي المزاد على عينك ياتاجر بس ياترى أكتر واحد عايز ينهش فيكي مين..!!                               اللي بيحصل في المحروسة أظهر لينا كتير من خواء عقول ناس بتدعي علينا الوطنية..وشفنا علي المواقع والفضائيات ردود فعل كتير غبية وسلبية..اللي بيهدد بحرق الكنائس واللي بيطالب بحماية أجنبية..واللي راح وجمع أصحابه وعصبته وراح يطلب مقابلة السفيرة الأمريكية..وناس بتعلن طلب الحماية من الجن والشياطين أو حتى اللجوء للجماعات الصهيونية..وواحد عامل فيها زعيم في منظمة مشبوهة في المهجر بيطالب بوصاية علي بلدنا المحروسة وإعلان دولة مسيحية..وإعتصام في ماسبيرو وشعارات تتهم جيشنا العظيم بالتواطؤ والسلبية..جيش الشهيد أحمد حمدي وعزيز غالي حامي الحمى الهمام رمز العزة والوطنية..معقول علشان شوية مصالح وحسابات خاصة يتهموه كده ببساطة بعدم المسئولية..الناس اللي بتشعلل الدنيا هنا أو هناك لازم يضربوها بيد من حديد وبمنتهى الصرامة والجدية..البلد مش ناقصة تطرف مسلم أو مسيحي أو أي تجاوز من أي جهة دينية..الغلاء والتضخم وضعف الإنتاج والبطالة كفاية علينا مش ناقصة كمان أحداث طائفية..لازم نعالج المشكلة من جذورها وكفانا مجاملات وحلول وقتية..العدل والمساواه لكل المصريين والحسم والبتر لازم يكون جزاء أي جهة بتهدد وحدتنا الوطنية..كفاية بقي لازم نصحى ونفوق ونرجع من تاني نعيد بناء أم الدنيا بهية..!!                                         الخلاصة الشعب يريد أفعال مش شعارات وهلفطة وكلام..الشعب ياناس عايز يعيش في وئام وأمن وسلام..ولغاية ماتروح الغُمة ونزيح الفتنة حنفضل صاحيين وعيوننا مش حتنام..ياناس إتقوا الله في مصر اللي بيحصل فينا ده والله جهل وضلال وكمان حراااااام..!!                                       said_elmasryfahmy@hotmail.com