يا أسكندريه القلب عاشق
والشعر عاجز مظلوم وساكت
ساعات يهاود
وساعات يشاكس
يا أسكندريه
يا أميره نايمه ع الرملة الناعمة
تغني غنوه في ليلة حلوة
والصحبة لمه كل الحبايب
والشعر سايب
سايح ونايح
علي موج بيرغي زي الشفايف
والنسمه شاردة علي خد وردة
من النوه خايفه تعمل عمايل
ليلك بيسحر
يوعد وينكـــر
ساعات يساير وساعات يعاير
زي الضراير
والبحر عايق
مجنون وطايش
هواه بيلطش سكران وفايق
والموج مخاوي لعيبي وغاوي
عرسان وعرايس
ياأسكندريه أمرك عجايب
لاانت شقرا ولاانت سمرا
والكل فيكي عاشـــق ودايب
وتروح مراكب ترجع مواكب
كتمه ســـرك والبحر شاهد
صلاح الحجري