fiogf49gjkf0d

السِّـــــكَّةْ والضَّمــــــانْ

السكة صعبة والطريق ياما طويل

ومصر كعبة وقبلة الشعب اللي ع المحنة قدر

ولسة قادر

 يخلق الفجر الجميل

ويشيل ،

 حمل السنين العجاف

أصيل

على مصره دايما يخاف

وان طاف عليها الخطر

قلبه يقوم يتنتطر

ويشيلها بين الشغاف

 ويردد المواويل

والنيل بيجرى مازال

وبمصرنا مفتون

صاحي النخيل فوق ضفافه ،

 وصاحيه فيه العيون

لا جففه المعتدى

ولا جففه اللي يخون

ولسة قادر يخضر ،

هذا التراب ويصون

ولسة قادر يطفي ،

نيران الحقد لو شبت

ووراها ميت نيرون

          * * *

السكة صعبة والرياح

مجهولة النية

والموجة فاردة جناح العنف

مخفية

والمركب اللى عشقنا

وطول العمر حبينا

وليكو فيها جميعا قد ماليَّ

بتصارع الريح بقلع جريح من الماضى

وفيه "ديالوج" ما بين الموج وبين الريح

ومتفقين على التجريح

وفعل صريح يطيح بالمركب الهادى

 للشر ياما مآرب

 وساعة من غير عقارب

كل اللى فات كان تجارب

وجس نبض اللي راكب

والمراكبية

ياشعب طيبة الحبيبة

يا أبيض النية

كل الرياح الغربية

أهدافها ألفين مريبة

اصحى وفتح عينيك ،

 الرامى قصده عليك

مصر العبور بين ايديك،

 مهيبة وعفية

واللى عبر خمسة يونية

فى ست ساعات فى أكتوبر

قادر يعدي الصعاب

 مهما تكون هية

      * * *

السكة صعبة والضمان

تدعيم بذور الايمان ،

 بإن كل الغيطان

مزروعة حرية

النسمة نسمة أمان

والكلمة طير مش جبان

الكلمة فاتحة البيان

لكل مكان معدية

والكلمة مش أى كلمة داخله من الشباك

الكلمة لما تكون

متقالة من جواك

سحنتها من سحنتك ،

 "تونها بتون" قلبك

كالابن لما يكون ،

 والبنت من صلبك

خلاصته لما تكون

الكلمة مصرية ؛

من حقك انك تقول ، وتقول بحرية

بل واجبك انك تمارس

ابدأ بنفسك يا فارس

وحط وطنك فى عينك ،

 وكون على العين دى حارس

وخلي قلبك ربابة

وان كنت عصرى ، كمان

 

وقبل ما تغني سمي ،

واعزف عليه الأدان

ده السكة لو وسط غابة

برضه حيبقى الضمان

نفضل جميعا نقول

ونقول بحرية

بشرط مصرى تكون

والكلمة أيضا تكون

 – ولابد – مصرية.

عبد الحميد زقزوق