إنهارده أعلنت منظمة الصحه العالميه WHO مقاله عنوانها علي حد تعبيرها " نفاد الأرض من المضادات الحيويه " .. ده مش خبر حلو معناه إننا مش هنحتاج مضادات حيويه تاني لأ , ده معناه إن معادش في مضادات حيويه هتجيب نتيجه تاني بسبب الـ AntiBiotic resistance عند البكتيريا , او بالبلدي المناعه اللي بتعملها البكتيريا ضد المضاد الحيوي فيبقي المضاد الحيوي مبيأثرش عليها. 
 
و بيقولوا إن معظم المضادات الحيويه الموجوده حاليا ما هي إلا تعديلات للأنواع الأساسيه أصلا و لكن مفعولها أقصر و حاليا الوضع بيزداد صعوبه خصوصا مع مرض السل اللي قدرت البكتيريا بتاعته تكون resistance لأنواع كتير من المضادات الحيويه و بتموت سنويا 250 ألف واحد !! 
 
و حاليا معادش العلاج بالمضادات الحيويه كافي و بيتجهوا إنهم يمنعوا حدوث الإصابه أصلا عشان ميضطروش يحتاجوا مضاد حيوي اللي أصلا البكتيريا عملتله resistance ! 
 
كل ده ليه , عشان بقول بقالنا سنين المضاد الحيوي مش بونبوني , مش منين ما تكح تاخد حباية مضاد حيوي و لا منين ما تسخن شويه تاخد حقنة مضاد حيوي و بنطلب من الأطباء اللي للأسف معندهومش ضمير و بيطلعوا مضادات حيويه بالحبايه مع ما يسمي مجموعة البرد, و لا حياة لمن تنادي , هنقعد نهاتي و الدكاترة ولا هنا و هتبقوا سبب تفشي الأمراض بشكل مفجع باللي بتعملوه ده !