في اطار متابعتنا لبعض الشكاوي - وهذا هو دور الصحافة المسؤولة- أرسل إلينا أصحاب شكوى نشرناه الشهر الماضي بعنوان:
بالفيديو..استغاثة مصريين عالقين في الكويت بالرئيس السيسي وسمو الأمير
وبعد نشرها على مصريون في الكويت www.egkw.com اتصل بهم أحد مسؤولي القنصلية مشكوراً وتواصل معهم ولكن هناك الموظفون في عالمنا العربي لايعرفون أن الوقت كالسيف.. وأن بين الثانية والأخرى موت وحياة.. إليكم الشكوى الجديدة ونتمنى سرعة الإنجاز:

لقد تم الاتصال بنا من القنصلية الموقرة يوم الثلاثاء الماضي 2/6/2015 وقالولنا مستنيينكم بكرة عشان إن شاء الله لقينا حل لمشكلتكم ففرحنا طبعا ان مشكلتنا هتتحل اولا وفرحنا اكتر بان سفارتنا فكرانا ومش نسيانا ومشكلتنا لقيت اهتمام عندهم وان فعلا لينا سفارة  ممكن تجيب حقنا.
توجهنا تاني يوم صباحا لسفارتنا وكان لينا امل فربنا اولا وفي سفارتنا ثانيا ودخلنا للمسئول عن مشكلتنا وهو حقا شخص محترم جدا وله كل التقدير والاحترام ورحب بنا وقام بعمل اتصال للشخص الي ممكن يساعدنا في حل مشكلتنا للاسف كان فاجتماع وقال انتظروا حتى اخر الدوام ونكلمه تاني رنيينا على حضرته تاني بس للاسف مافيش رد نهائي المرة دي قال الموظف المسئول معلش سبونا شوية وانا هكلمه ورد عليكم وفات الخميس والجمعة والسبت دون اي رد يوم الاحد توجهنا تاني للقنصلية فما من اجابة وقالولنا احنا هنكلمكم بس للاسف الوقت بيمر علينا واحنا مش عارفين نتحرك ومش لاقيين حل فلو مش هتحلي ياسفارة ليه ادتينا امل تاني وسالتي فينا ولو هتفيدونا ليه متاخرين علينا ومرور الوقت مش  في صالحنا ومش عايزين نتحط في مشكلة اكبر من الي احنا فيها .....نريد تتحركوا لمساعدتنا.