كنت اعتقد إنني سأتخلص من غيرتي على مصر لكنى فشلت لم استطع .. حتى بعد ان سافرت أجر أزيال الخيبة بالويبه وماحدش يسألنى ايه هيه الخيبة بالويبة هى بتتقال كدة .. وكل ده عشان مافيش واسطة لا عرفت اشتغل فى ....... أو ....أو حتى رئيس جمهورية طبعا انا كانت اى وظيفة محترمة أأقل من كدة بكتير كنت وافقت بيها ....وخرجت منها بعد ان ضاقت بي السبل لم اقدر ان اتجاهل عشقي لوطني.. لكنى اوهمت نفسي اننى لن اهتم ..ولن اتضايق.. ولن اتنحنح ولن اتزحزح ولن اقول إح إح ولن يصيبني ضغط الدم ..لو احد ما قال ما يعيبها ولكنى فشلت وجدت نفسي اذكر أولادي ببلادي وأقولهم مصر احلى حاجة في الدنيا مصر ام الدنيا واقول لهم النشيد الوطني بعد ما فوجئت بهم يحفظون نشيد اخر له كل الاحترام لهذا .... وقمت بتعليم الأولاد الوان العلم المصري ثلاث الوان والنسر فى النص يا عبد الرحمن ايوة يا بنى ما تنساش النسر .. النسر
أكثر الأمور غرابة عندما تجد أحد ما يقول لك .. انا بكرة شعب مصر بس مصر لا مصر بلد طيبة او واحد تانى يقولك مصر واحشة بس ناسها طيبين .. يا خربيتك أبوك منك ليه ..
يعنى اية مش فاهم انت بتحب الطوب والحجارة والنيل والمطبات والحفر وعوادم السيارات اللى ماشية من سنة خمسين فى الشارع والمباني والمجارى والكباري والكباريهات اه نسيت .. وجوها العليل والمشى على النيل والكلام دة ولا بتحب الناس اللى كتير منهم اكل علية الدهر وشرب ... ولا اية يعنى!! مش فاهم ما هى الحاجات دة لوحدها ما تعملش مصر .. مصر عبارة عن ارض وشعب راجل عجوز وست كبيرة عيل من غير بنطلون بلبوص ومناخيره سايحة وواحدة ست بتعصر الغسيل على راس الناس فى الشارع وواحد بيطوح كيس الزبالة من الشباك ويقفل الشباك بسرعة عشان ما حدش يشوفة بس الناس كلها عرفاه وبت خارجة من الجامعة الأمريكية لابسها هدوم ستايل وبرفان تشم ريحتة من نص كيلو ودكتور ومهندس ومحامى واتوبيس الناس محشورة فيه فوق بعضيها وراجل كبير يقوم للست وشاب نطع عامل نفسة نايم ومش عايز يقوم وواحد متحرش عمال يزنق فى الستات وست ترفع الشبشب وترقعله سداغة وعيال تحت الكبارى بتشم كله "هى بتتكتب ازاى بتاعة الأحذية" ولامؤاخذة تيجى تعدى من تحت الكبرى تشم ريحة البى بي تعميك وفرح بلدى فى حتة شعبية يقرفك للصبح والمعازيم هات يا شرب بنجو وبيرة ما تزعلش وحشيش كمان وفنادق فايف ستارز وسفن ستارز ترمى نص اكلها فى الزبالة وناس تانية تيجى تلم الأكل من الزبالة وناس قاعدة فى مارينا وشرم والغردقة والجونة وناس قاعدة فى الرحاب والعبور وناس قاعدة فى حارة من جوة حارة وناس قاعدة فى طرب الغفير "المقابر" وأب طالع تلاتة تلاتينو وعيل صايع بيضيع فلوس ابوه وموظفة تخرج من الشغل تجرى على السوق تجيب كرنبتين وتجرى على البيت عشان تلحق تعمل الغداء للعيال وتجرى بسرعة تولع البوتجاز وتحط الميه تسخن وبعدين تروح تغير هدومها يرجع جوزها والعيال يلاقوا الأكل جاهز وجوزها بدل من يقولها تسلم ايديك يقولها مال ريحتك عامله كدة ليه .. يا اخى روح قص ضوافر رجليك الأول بلا نيله ..تقعد تبص على اليسا وهيفا وتقول اما هيفا عليها حتى دين ......يخرب بيت ابوها دة الحاجات شوية وهتقع من ......
مصر يعنى المجارى طافحة والعيال بتلعب فوق الطوب عشان تخش مدخل البيت وعيل شبشبة وقع فى الميه وطلع يعيط ينزل ابوه ويجيب عصاية ويصطاد الشبشب مصر المية المعدنية للأغنياء والمية اللى ريحتها مجارى للفقراء مصر الكرواسو والبيتى بان والفول والطعمية على العربية مصر جامعة عين شمس والقاهرة مصر الجامعات الخاصة مصر لوح الأزاز اللى يقع على الواد يموته ويسرق فرحة اهلة قبل ما تبدأ ومدارس أخرى بألاف الجنيهات ويمكن الدولارات مصر الغربة جوة البلد والغربة برة البلد والأتنين اصعب من بعض مصر القضاء الش.. ..
اللى يطلع مبارك براءة والعادلى براءة واللواءات الستة براءة وقريب هيحبس الشعب ..مصر اللى كيلو اللبن فيها بعشرة جنية واللحمة بمية وابو العيال مش قادر يوفى عشان المهية يادوب ميه وميه ..مصر الجيش والشرطة ايد واحدة مصر استاد القاهرة ممتلىء عن اخرة وابو تريكة يجيب جون الناس تفرح ..مصر بلادى هيه التاريخ ودمعة عين وبسمة امل مصر بلدى راح منها شهداء كتير وهيروح منها شهداء اكتر لغاية ما الفجر يظهر أوعى تقول شعب مصر وتقول ارض مصر لان الشعب والأرض حاجة واحدة وحشتينى