ضد الإرهاب
محروسة يا مصر
غريب وفايت دياره
انقل يا مصر لما
هجر بلاده وحبايبه
انقل مقداره
ولا حس قيمته ومكانته
ولا حس طعم ابتسامته
ولا استقر ف قراره
إلا اما عادلك يا غالية
عصفور وراجع لعشه
لؤلؤ وعارف محاره
غريب وعاشق لبيته
غريب وعايد لداره
لا بيته بقى هو بيته
ولا المزار صار مزاره
آدي مصره مرتع حنانه
آدي مصر عشه وأمانه
بيهدد الغدر فيها
إبنه وصاحبه وجاره
اتوبيس سياحي الفجرية
والثاني قبل انفجاره
ماهش سياحي .. ده عادي
جي من بولاق للمعادي
مسكوا الايدين الخبيثة
مصرية..!! واديني عقلك !!
حتقولي مأجور .. حقولك
مأجور ما يقلعش زرعه
مأجور ما يحرقش غيطه
مخمور ما ينكشِ عشه
موتور ما يخربش بيته
حتقولي مخبول حقولك
مخبول ما يهدمش داره
ولا طوبة واحدة ف جداره
اديني عقلك يا صاحبي
والحقني خد مني عقلي
الحقني فبل انفجاره
***
يا اللي انتي ربك حاميكي
طول عمري باتباهى بيكي
بافرح لفرحك ولما
الحزن ييجي احتويكي
وإن طعنة الغدر طافت
اقطع وأجزم واصمم
الطعنة دي أجنبية
الطعنة غادرة وغبية
وكنت بالفعل صادق
الطعنة مش من بنيكي
إزاي حيقدر يخونك
لو جت عيونه ف عيونك
إبنك وعزك ومجدك
أملك وعلمك .. فنونك ؟!!
إزاي حيقدر يخونك
اللي مالوش حد غيرك
اللي رضع رغم ضيقتك
حليب حنانك وخيرك
واللي ف ساعة الشدايد
حيكون بدمه راويكي ؟!!
فازاي ما يبقاش حبيبك
وازاي ما يورثش منك
عدلك وحلمك وطيبتك
إزاي بإيده يضرك
وازاي بمكروه يصيبك
قولي انه مش من ولادك
قولي انه مش من بلادك
ماكلش عيشك وملحك
ما شربش من سلسبيلك
ولا يوم تنفس هواك
ولا كُحل عينه ضياك
ولا خطى فوق شط نيلك
ولا استغطى بسماك
ولا جري بين مروجك
ولا استظل بنخيلك ؟!!
قولي أي شيء واقنعيني
قولي أي شيء طمنيني
قولي أي شيء مهما قلتي
لكن بلاش تصدميني
بلاش تقولي ولادك
صارت بتقتل ولادك
بتشعل النار في صفوفها
وتبدر الخوف في كفوفها
وتوزع الموت مجاني
وفي النهاية وف الأول
أنا القتيل وأنا الجاني
قولي أي شيء ثبتي عقلي
قولي أي شيء ثبتي ديني
قولي أي شيء ردي كياني
يا مصر ده انت المحروسة
والمصري بعد الله حارسك
المصري طول عمره الباني
بناك حلوة وجميلة
بناك طيبة وأصيلة
بناك شهمة ونبيلة
وعشان كده قالوا عنه :
اللي بنا مصر ما كانشِ
في الأصل بنا يا خلاني
اللي بناها كان أصله
جدع حليوة وحلواني
بناها حب وحنية
بناها عشق ووطنية
بناها طاهرة ونبية
مع إنه كان زينا واكتر
يا خلق دايما بيعاني
آدي التاريخ وآدي صفحاته
اقروا وشوفوا معاناته
شوفوا قد إيه كان بيعاني
وبيعطي مصره من ذاته
طول عمره كان بيدللها
وف الشدايد بيشيلها
ف حبابي عنيه
وليل نهار بيغني لها
تفتكروا كان بيغني لها
ويردد إيه ؟
كات أحلى غنوة على لسانه :
محروسة يا مصر
الشاعر : عبد الحميد زقزوق