في بادره جميلة من عضو الموقع أكرم عبد العزيز والذي يستعد للقدوم للكويت وبعد عدد من الرسائل المتبادلة بيننا في موقع (مصريون في الكويت www.egkw.com) وبينه وبطلب منا استطاع أكرم أن يوثق لكم جميع الاجراءات المطلوبة للسفر للكويت من على أرض الواقع وخطوة بخطوة.. عمموا وشيروا ملحوظات ورصد أكرم لتجربته ليستفيد منها أكبر قدر ممكن.. واليكم تجربة أكرم التي أعدها بنفسه:
الناس اللي عاوزه تسافر الكويت وكتر الإجراءات ملغبطاهم وكتر الفتي من ناس كتير لغبطهم أكتر وانا كنت واحد من الناس اللي اتلغبطوا ...ولكن إسمع الإجراءات مني لأني عملتها وده بتاريخ 2017 / 9 وبهديها لأعضاء وزوار موقع (مصريون في الكويت www.egkw.com) .. لعل الناس تستفيد منها.
بسم الله الرحمن الرحيم ...
* أو ما بيجيلك عقد العمل وسمة الدخول سواء من مكتب سفريات أو من واحد صاحبك بيتم الآتي :
1- بتروح تطلع فيش جنائي موجه للكويت وبعد ما بيطلع بتروح تختمه من الأدلة الجنائية لأنه لو مش مختوم من هناك ورقك بيقف .
2 - بتاخد عقد العمل وسمة الدخول والفيش وتروح على أقرب مكتب خارجية توثقهم وبتوثق معاهم شهادة التخرج وأي شهادة انت محتاجها هناك .
3 - بتروح بالورق الموثق + الجواز للحجر الصحي الكويتي الموجود قريب من محطة مترو الدقي ( 10 دقايق مشي ) وخليك مع ال GPS وفكك من التاكسيات لأنهم استغلاليين ...بتروح الحجر الصحي بتدفع فيه 2100 جنيه وبيديك 3 إيصالات ...واحد للكشف في معمل المختبر وواحد  عشان تسلمة في المعامل المركزية اللي في التحرير وواحد بتخليه معاك هقلك بيتعمل بيه إيه قدام .
4 - أول ما بتطلع من الحجر الصحي بتلاقي التاكسيات تتهافت عليك وتقولك 70 جنبه ...انا روحت مشواري ب 1.5 فقط ...فبتنفضلهم وتطلع على المعامل المركزية في الأول ودي بتتراح بأوتوبس نقل عام بجنيه ونص من عند الحجر الصحي واللي يسأل ميتوهش .
5 - بتروح المعامل بيدفعوك 500 جنيه والايصال الاول وبياخدوا عينة دم وبتمشي 
6 - تطلع على معمل المختبر اللي بيوصفوهولك في المعامل واعرف منهم بيتراح ازاي من غير تاكسيات هتلاقي الموضوع سهل ومتتكبرش انك تسأل ..فأهل مكة أدرى بشعابها .
7 - بتروح المختبر بتديهم الايصال الثاني ومبتدفعش ولا مليم وإحذر من النصابين اللي بيبقوا واقفين بره الحجر الصحي يقولك تعالي اوديك تكشف ...انت مش صغير ..إسأل الناس اللي جوة الحجر ناس محترمين وهينصحوك ويوعوك ..بتقعد حوالي ساعتين بيكشفوا عليك كشف كامل من مجاميعه .
8 - إنت كده خلصت بنسبة 60 % بعد المختبر تروح خلاص وتبدأ تنتظر حوالي 15 او 20 يوم وتبدأ تتصل بالأرقام بتاعة الحجر الصحي عشان نعرف نتيجة تحاليلك وانك لائق بإذن الله ...
9 -أول ما بيقولولك تعالي ورقك طلع بتروح الحجر الصحي بالايصال الثالث اللي فضل معاك ...بتسلمه وبتاخد ورقتين مغلفتين بإنك لائق وتطلع بره الحجر الصحي تعدي الشارع .
10 - هتلاقي البنك الوطني الكويتي وقدامه بتاع تصوير قبل ما تدخل البنك تروح تصور البطاقة على ورقة كاملة مش مقصقوصة لأنهم في البنك هيرجعوك لو صورة البطاقة مش على ورقة كاملة ....هتدفع 1650 جنيه في البنك 
11- من أول رقم 11 ده بتختلف الخطوات من واحد مسافر عن طريق مكتب وما بين واحد مسافر مع نفسه ...بس انا بقول حتى لو انت مبعوتالك أوراقك بعيد عن المكاتب ...روح لمكتب هياخد منك 300 او 500 ويريح راسك من الوش ويمشيلك في الإجراءات اللي بعد رقم 10 ...
12 - بتاخد ورقك كله ومعاهم إيصالات البنك وبتطلع على المكتب بتديهم الأوراق وتروح بيتك وتتابع معاهم وأول ما تطلع التأشيرة بتروح تاخدها ...طب انا عاوز أعمل الباقي ده لوحدي ...ينفع لو انت اللي مبعوتلك الورق من الكويت من صديق مثلا لكن لو من مكتب مينفعش ...طب المكتب بيعمل ايه بعد خطوة البنك ؟؟ المكتب بيودي ورقك لمجمع التحرير وبياخد إيصال بتاريخ معين بيروح بالإيصال ده في التاريخ المحدد للقنصلية مش بيرجع التحرير تاني ...ورقك بيستلمهولك من القنصلية عليه الأختام والطوابع ذات العلامات المائية اللي من غيرها كل اللي عملته ملوش لازمه .
13 - مبروك إنت كده خلصت بس لسه فاضل خطوة ..
( هي مصر هتسيبك كده بالساهل ؟؟ ) 
بعد ما بتاخد الورق من المكتب بترجع بلدك تعمل تصريح العمل وتصريح العمل للي مسافرش قبل كده بيتكلف 270 جنيه + 15 جنيه شنطة زي بتاعة المرور كده ولو سافرت قبل كده زي حالاتي يبقي لازم تجيب اخر اذن عمل طلعته وتجيب الجواز القديم وبيدفعوك عن كل سنه 160 جنيه ضرايب ...طبعا لأنك مش لاقي شغل فبلدك ولقيو شغل بره بلدك فلازم تدفع عالشغل ده فلوس لبلدك سنويا ...انا دفعت سنتين ب 430 جنيه فخد معاك فلوس بالزيادة عشان الخوازيق .
14 - تصريح السفر بقى تروح تطلعة من منطقة التجنيد اللي انت تابع ليها ..لكن لو مكتوبلك في الجواز( غير مطلوب ) يبقي ملكش تصريح سفر ...متعملهوش .
15 - إنت كده خلصت خالص ومش فاضلك غير تحجز الطيارة وتسافر ...وربنا يوفقك ويكرمك 
عاوز بس من حضراتكم حاجه واحده 
.....تدعولي بتيسير الحال وحسن الخاتمه ....في حفظ الله ورعايته
وموقع (مصريون في الكويت www.egkw.com) يشكر الأخ أكرم جزاه الله خيرا.