أهم الاجراءات السفر من مصر للكويت:
الورق المطلوب:
1-سمة الدخول - (من الكويت)
2-تصريح عمل - (من الكويت)
3-عقد عمل - (من الكويت) (عليه من ورا توثيق الخارجية الكويتية والسفارة المصرية بالكويت)
4-فيش جنائي كمبيوتر موجه ل(سفارة الكويت) - ده هنعمله تاني يوم.
5- 8 صور شخصية خلفيه بيضياء.
6-قلم جاف.
7-فلوس (4340 جنيه تقريبا) ده من غير فلوس المواصلات.
8-الجواز.
9-البطاقة الشخصية.
-------------------------------------------
(((مدة الأجراءات: شهر تقريبا)))
-------------------------------------------
الخطوات:
**اول يوم: (الحجر الصحي في الدقي والكشف الطبي)
(هتحتاج: سمة الدخول + 6 صور خلفيه بيضاء + الجواز + البطاقة الشخصية + مبلغ: 2610 بالإضافة لفلوس المواصلات)
1-اول ما يجيلك الورق من الكويت هتاخد سمة الدخول وصورتين شخصيتين والجواز والبطاقة الشخصية ومبلغ 2110 جنيه وتروح الحجر الصحي اللي في الدقي (من 9 إلى 2)، هتاخد ميعاد لاستلام اوراقك بعد 20 يوم.
2-هتستلم من الحجر الصحي 3 ورقات:
-وصل دفع المبلغ 2100 جنيه.
-وصل للكشف في عيادة الحياة (او ممكن عيادة أخرى).
-وصل كشف في المعامل المركزية الطبية.
3-هتطلع على عيادة الحياة في العنوان الموضح في الوصل - تديهم الوصل وصورتين شخصيتين والجواز والبطاقة، وهتكشف هناك.
4-تطلع على المعامل المركزية الطبية في العنوان المكتوب في الوصل - تديهم الوصل وصورتين شخصيتين و500 جنيه والجواز والبطاقة، وهياخدوا منك عينة دم.
(ملاحظة بعد عمل الكشف في معمل الحياة والمعامل المركزية خلاص كدة مش هنحتاجهم في حاجة وهما هايبعتوا النتيجة للحجر الصحي).
.
.
**تاني يوم: (استخراج الفيش الجنائي، كمبيوتر)
(هتحتاج: البطاقة + قلم + مبلغ: 15 جنيه بالإضافة لفلوس المواصلات)
1-تنزل بدري الصبح الساعة 8 (عشان الزحمة)، تكون موجود في القسم التابع ليك (حسب اقامتك في البطاقة).
2-صور البطاقة صورتين قبل ما تدخل وهتكتب عليهم - سفارة الكويت.
3-هتسلم الصورتين وتدخل تعمل فيش كمبيوتر موجه لسفارة الكويت تكلفته 15 جنيه.
.
.
**تالت يوم: (استلام الفيش وتوثيق الورق)
(هتحتاج: البطاقة + عقد العمل + الفيش بعد استلامه +مبلغ: 22 جنيه بالإضافة لفلوس المواصلات)
1-تنزل بدري تكون في القسم 8 الصبح تاخد الفيش (هتستلمه بسرعة).
2-تاخد عقد العمل والفيش الجنائي وتروح الخارجية المصرية اللي في ش أحمد عرابي - المهندسين وتوثقهم (توثيق الورقة ب 11 جنيه) او أي مكتب توثيق قريب منك.
.
.
**رابع يوم: (يوم استلام الورق من الحجر الصحي).
(هتحتاج كل الورق: وصل الاستلام + عقد العمل + البطاقة الشخصية + قلم + الورق اللي هتستلمه من الحجر الصحي + مبلغ 1660 بالإضافة لفلوس المواصلات)
1-مش لازم تعدي ال20 يوم كاملة، اتصل بيهم بعد 16 يوم وهاتلاقي الورق جاهز عشان تستلمه من نفس المكان اللي في الدقي.
2-بعد ما تستلم الورق تطلع على بنك الكويت الوطني (بجوار الحجر الصحي بخطوتين) وهتصور البطاقة وتسلمها للأمن.
3-راجل الأمن هاينادي عليك وتدخل تدفع مبلغ 1650 جنيه وهتستلم وصلين، وصل رسوم ادارية ب 50 جنيه ووصل ب 1600 مهم عشان هتسلمه في مجمع التحرير.
(نصيحة صور الجواز صورة عشان هتحتاجها لما تيجي تحجز تذكرة السفر)
4-في نفس اليوم تطلع على مجمع التحرير (في التحرير)
5-هتطلع الدور الثالث وهتعمل حاجتين:
-أول حاجة هتروح ادارة الخبرة وتوثق عقد العمل وهتدفع 5 جنيه (هاتلاقيهم حطوا طابعين ورا).
-ثاني حاجة في نفس الدور هتروح مكتب التأشيرات وهتسلم (الجواز، الفيش، عقد العمل، وصل بنك الكويت الوطني، سمة الدخول) وتدفع 5 جنيه.
6-هتاخد وصل استلام مكتوب عليه تاريخ استلام ورقك (بعد 12 يوم).
.
.
**خامس يوم: (تصريح السفر) انزل بدري تكون في القسم من 8 عشان تلحق تخلص التصريح في يوم واحد.
(هتحتاج: شهادة الجيش + شهادة ميلاد عليها الرقم الثلاثي + قلم + مبلغ: 30 جنيه بالإضافة لفلوس المواصلات)
1-هتروح القسم اللي انت تابع ليه اللي عملت فيه التعبئة وتطلب منه انك عايز طلب إيضاح (ده ورقة بتأكد ان مفيش عليك أي استدعاء للناس اللي على قوة الاحتياط)
2- هتاخد طلب الإيضاح وتروح المديرية عشان لازم تختمه منها.
3-تروح التجنيد اللي انت تابع ليه ومعاك شهادة الجيش + شهادة ميلاد عليها الرقم الثلاثي + قلم + طلب الايضاح.
4-هتدفع جوا التجنيد مبلغ تقريبا 30 جنيه عشان تاخد بيه ورق التصريح.
5-هيطلعلك تصريح السفر (بتكون مدته شهر تسافر خلاله).
.
.
**سادس يوم: (تصريح العمل)
ده بتعمله من القسم اللي انت تابع ليه، بس مش فاكر اجراءاته الصراحة.
بس كان لازم صورتين شخصية وصورة من الجواز وسمة الدخول وعقد العمل.
.
.
**سابع يوم: (استلام التأشيرة)
هتروح مجمع التحرير الدور التالت في نفس المكتب اللي سلمت فيه الورق (بتاع اليوم الرابع) وهتستلمه كله بالجواز عليه التأشيرة.
-------------------------------------------
احجز التذكرة وتوصل بالسلامة ان شاء الله وهتاخد معاك كل الورق ده يوم السفر (عقد العمل + تصريح العمل + سمة الدخول + الجواز + تصريح السفر + تصريح العمل + قلم)
الأجراءات ده بتاريخ أغسطس/2017