سلام عليكم ورحمة الله وبركاته . ، ف البداية أشكركم جدا على مجهوداتكم ( عندى مشكله ياريت لو تفضلتوا تطرحوها ع الاعضاء بدون اسم )، واشكر الأعضاء ، والتفاعل الحقيقى ليهم شجعنى انى أقول مشكلتى كشاب مصري مغترب عمري 25 سنة بيعانى مع كفيلة . كل اللى محتاجه نصيحة وجزاكم الله خير . في 11/8/2011 جيت كارت زيارة على شركة ، فى 26/12/2011 عملت اقامة محاسب براتب اذن عمل 150 دينار ، براتب فعلى 150 دينار بردة ، ومرت السنون مع تحمل الضغوطات والصبر اللى معظمنا مر بيها سواء كانت ضغوطات نفسيه او اجتماعيه او عملية .. حتى الأن ما زلت اقامتى على الشركة ، ف خلال السنوات اللى فاتت كانت الزيادة بتاعتي طفيفه جدا ، تخيلوا بقالى أربع سنين راتبى أقسم بالله الحالى 200 دينار بس ( الحمد لله ف الاول والاخر ، لكن فيه فرق كبير بين الرضا والطموح ) . كل دا صابر ومستحمل ع اساس ان الكفيل هو اللى جايبنى من مصر ، وهو اللى عملنى ودفع فيا فلوس بحق الله انى أوصل للي أنا فيه الان من خبرة كبيرة ف مجالى . كل دا وانا بحاول أخد بعض حقوقي اللى مش عارف أخدها حتى من معيشة صح ، واحيانا بفكر ، هو جايبنى هنا علشان اكل واشرب وانام ، ما انا باكل وبشرب وبنام ف بلدى وسط أهلى افضل مليون مرة من هنا ع الاقل كنت بشيل مسؤلية نفسى ف اي شغل بأي تمن . من فترة مش طويلة تقريبا 5 شهور جاتلى فرصه مكنتش بحلم بيها ، روحت بلغت كفيلى بيها على اساس صاين العيش والملح ومبقاش قليل الاصل ، بلغته ان فيه فرصه كذا كذا ، رد عليا وقالى انا جايبك من مصر وعلمتك .. وكلام فيه لوى دراع ، الحقيقه مخفتش ع قد انى اتهاودت شوية وقولت اصبر . من حوالى شهر ، جاتلى حالة نفسيه غريبة من الشركة معرفش سببها ، وحاولت بقدر الامكان اتغلب عليها ، مقدرتش كل يوم حالتى النفسيه بتزيد سوء ، ولمحت لمديري بعدم ارتياحى النفسي ف المكان ، وبعدها بيوم كتبت استقالتى وقررت انى اقدمها بعد أعمل عمرة اللى هتستمر حوالى اسبوع - ف اعتقاد منى انه تقصير ف حق ربنا ، ولما رجعت من العمرة مازلت الحالة النفسية السيئة بتزداد - وبفضل ربنا جاتلى فرصة شغل تانيه تقريبا بنفس الفرصه الاولى اللى عرضتها ع المدير بعد ما رجعت ، وقررت انى اقدم الاستقاله فعلا ، ونفذت قراري امبارح ، وقعدت مع المدير ودار بينا الحوار كالأتى :- = لو تفتكر يا ابو ** انى كلمتك قبل ما اعمل عمرة انى مش مرتاح نفسيا ولما جيت حالتى النفسيه ازدادت سوء ، علشان كدا قررت اقدم لحضرتك استقالتى . ( أخد الاستقالة من غير ما يقرأها ، وشوه إحمر ، وحطها قدامه ) وقال : - لا مينفعش انك تستقيل ، وبردة دخل ف النغمة المشروخة بتاعته ، انا جبتك من مصر وعلمتك ودفعت فيك فلوس ) . ( كانت لهجته انفعاليه ) واخدت كلامة بهدوء ورديت عليه ( جزاك الله خير ، ولو عايز محاسب من بكرة موجود ، وهعلمه وتحت امرك ف اى شغل ) . قالى لا واللى قابلك قالو كدا رديت عليه انت عارف كويس انى مش زي غيري مجمل الحوار انه بيلوي دراعي وبيستعبدنى ، وف النهايه قطع الاستقاله قدامى . وبأمانه الله مش عايز الموضوع يتحول للشئون رغم انه ف مصلحتى لكن الراجل جزاة الله خير له جمايل ومينفعش ارد عليه بإساءه . وانا بجد مش عارف اعمل ايه ، ربنا ما يقعكوا ف ديقه