فوقوا يا طلبة الجامعة
جرى ايه يا طلبة الجامعة
ياللي كنتو علينا عزاز
ياللي كنتوا أملنا ف بكرة
وبنحلم ليكو بمليون فكرة
بعقولكو الفذة وبجهودكو
يتحقق بيها الإعجاز
وتعدوا بينا لمستقبل
مشرق وبيضحك لولادكو
فيه كل ثانية بإنجاز
بل " فيمتو ثانية " إن أمكن
وخصوصا بعد ما عدينا
بارليف ونابالمه
وكان يومها
أعظم إنجاز
وكذلك من بعد زويلنا
عالمنا الفذ الاسطورة
م أتانا بالـ " فيمتو ثانية "
ولنوبل بجدارة اجتاز
لكنكو خيبتوا أملنا
سودتوا الصورة اللي ف بالنا
كت تيجى فينا وتمحينا
بس ما تجيش في عيالنا
بعد ما نشأنا وربينا
تطلعوا وتهدوا اللي بنينا
وتضيعوا كافة راسمالنا
وتعطلوا حلم الإعجاز
***
ما كنتش اعرف يا ضنايا
إن شقايا
عندك مش غالي
بالعكس رخيص
ولا إن ماء وجهي ياغالي
وغربتي واللي جرالي
سنين وأيام وليالي
رحلة كفاحى واسايا
وكدّي وشقايا عليكو
حيروحوا فطيس
شفتك بتحرق يا ضنايا
على الشاشات مبنى الجامعة
شفتك بتحرق وتخرب
ببلاهة خالص ولا همّك
ما قدرتش اصدق ياوليدي
إن اللي بيجري ف عروقك
يشبه لدمي أو دمك
ناديتك ارجع يا وليدي
الجامعة دى جامعة صديقة
لا هي اسرائيل ولا أمريكا
نفّضْت لي وواصلت السير
كسرت ضهري ياوليدي
وحرقت قلبي وقلب أمك
تقدر تقولي ازاي هاقدر
لو كان مقدر نتلاقى
هاخدك في حضي ازاي تاني
ولصدرى ثانى راح اضُمَّك؟!!
الجامعة دي جامعتك
واحنا اللي بنيناها
أجيال كتير خرَّجِت
وصدَّرِت
للدنيا شرقا وغربا
علما أفاضل تناضل
اليوم ما بين الشعوب
بيهم بنتباهى
***
إصرار غريب وعجيب
ع الفوضى والتخريب
وبكل خسة وندالة
وغباء وجهل وسفالة
بتعطلوا التعليم
وتعطلوا التدريب
طب انتو مش عايزين
سيبو غيركو يتعلم
الفاتي والفتوى طين
جبتوها من أي دين
ومنكو نتعلم
لكنكم عارفين
إن العزيز الحكيم
دعانا للتعليم
بالنص قال : إقرأ
وان الرسول الكريم
دعا لطلب العلوم
حتى ولو في الصين
جبتوا الكلام ده منين ؟!!
ومنكو نتعلم
بس الحقيقة انها
طول عمرها مصرنا
هيّه اللي بتعلم
قبل الزمان بزمان
كانت على التوحيد
ولا غيرها يتكلم
ولما جه الإسلام
رفعت راياته وقام
إمام يسلم إمام
انطلقوا غطوا الأنام
من ساحة الأزهر
تاريخ بيتكلم
وبعد هذا وذاك
تيجوا انتو يا أقزام
تسيئوا للإسلام
وتشوهوا الأزهر
وكل ده عشان مين
عشان رئيس أزعر
يفرج عن المجرمين
ويهرب المساجين
ويقرب السفاحين
من مجلسه العامر
يسكت عن الحق حين
ويحلل الدم حين
ويأخون الدواوين
ويلغي معنى الوطن
وعليه وع الطيبين
من أهله يتآمر
بالفعل كان يوم حزين
يوم ما انتخبتك يا مرسي
كت ساعة سودة
وساعة طين
وكل شيء أغبر
***
فوقوا يا طلبة الجامعة
وخدوا مواقف وطنية
وحسوا معنى الوطن
وازاي نحافظ عليه
من أي طغمة غبية
لا عنف نافع
ولا كرسي شافع
ولا مرسي راجع
ولا عاد له شرعية
واذا كنتوا ما قريتوش
نزول الشعب يوم تلاتين
بصورة واضحة وجلية
فللحديث ألف بقية
بخروجنا للدستور
ويوم انتخاب الرئيس
والضربة حتكون قوية.
الشاعر : عبد الحميد زقزوق