fiogf49gjkf0d
تحية للرجال
الشاعر : عبد الحميد زقزوق
مليون تحية عفية
من قلب مصر الفتية
ياللي شايلين السلاح
مليون صباح .
مليون صباح على صباحكو الباهر
بهر كل العيون
مد المعابر ع القنا
غير لنا طعم الغنا
غير لنا نبض الفنون
غير لنا شكل الملابس
واللي لابس هدمة صارت ضيقة
والصدر صار مفرود وممدود الأمال
والخطوة صار فيها القدم
ثابت كما صخر الجبال
والهامة مرفوعة شراع
وعنينا فوق أرض الصراع
باختصار ...
كل شيء أصبح هنا
طالع لفوق
كل شيء مادد عيونه ع الشروق
الولاد..البنات
أبهاتكو..
طير قلوب الأمهات
في السما شفته انتشر
دعواته للمولى هدير
وأظنه كان واصل لكو
واجنحته صارت من حرير
أمال بإيه حيضمكوا ؟
الصورة دي ــ لأ ــ مش خيال
دي لشعب واقف خلفكو
الصورة صورة أهلكو
لكنها تفرق كتير ...
تفرق كتير عن أي صورة لأي واحد منكو
ف احنا هنا :
الهدمة ضاقت ع الصدور
لما في لحظة اتنفست
ويا الهوا الداخل لها ..نسمة عبور
أما انتو فالسترة اللي ضاقت أصلها
من كتر ما عبا البطل
في صدره واستقبل دانات
وكإنه في عز الوغى
عزت عليه الأرض تبقى مقبرة .
أو خاف عليها تنجرح
لما تبات فيها الدانات
أو خاف تعدي الدانة منه
تلاقي صدر فدائي تاني
ــ في اعتباره ــ أقل منه
كله فاهم إنه هوا
ــ هوا بس ــ
المعارك كلها مسؤولة منه
يا عظمة الفلاحين
فلاحينك دول يا مصر
حراتين الأرض وجدور الضلام
بدارين الحب وبذورك يا نصر
لجل هذا الحب شال العسكري الفلاح سلاحه
نط من عربيته صار يطوي الرمال
ويدوس جراحه
لما قرب من طابور الدبابات
ــ طبعا معادي ــ
شيع الدانة بثبات
قال يا هادي ..
كلت واحدة
الثانية جارها ...
التالتة برضه الموت مصيرها
الرابعة قالت من قصيرها انفد بجلدي
الضرب دة مش ضرب عادي
ظنته موقع كبير
وصاحبنا كت خلصت داناته
صوته دوى في الفضا
الله أكبر كت صلاته
يا عظمتك يا بلادي .
يا قلب مصر ونبضها
يا حد سيفها ودرعها
أوعوا تفتكرونا مش حاسين بكو
وبتضحياتكوا قد إيه ؟
عارفين طريقكوا م المعابر لما سينا
عارفينه كان مفروش بإيه ؟
عارفين قلاع بارليف وخطه
والنابالم وخزانات الموت في شطه
اللي دستوا ف يوم عليه
عارفين كمان والجولة لسة ماانتهتشي عنيكو صاحية
صاحية دايما قد إيه ؟
قد إيه الناس هنا أحلامها كبرت
قد إيه ؟
قد إيه الناس هنا بولادها آمنت
قد إيه ؟
كل دة في يوم اللقا حتحسوا بيه
أما الساعة دي فاللي انا بقدر عليه
باسم مصر وشعبها
باسم نيلها وأهراماتها
وبتاريخها ومجدها
باضم صوتي اللي خرج من وسطكو
باضم صوتي لصوت إرادة شعبكو
ويقول لكو :
من قلب مصر الفتية
مليون تحية عفية
ياللي شايلين السلاح ..مليون صباح
مليون صباح على صبحكو الباهر
بهر كل العيون
مد المعابر ع القنا
غير لنا طعم الغنا غير لنا نبض الفنون
ولو إن فني من زمن
كان نبضه غاوي الرتم دة
وعارف ان اليوم دة لازم رح يكون
أكتوبر 1973