ثورة فرعون ..!! كل ثورة وأنتم بخير وطيبين..وكل جمعة يتيمة وأنتم في الميدان دايما ملمومين..وكل بيان من كل من هب ودب واللي عاملين حماه الوطن ولبسوا عباءة الثوريين..وكل مقال أو عامود صاحبه باع القضية وغيًر جلده لزوم النيو لوك الثوري وبقى من المتلونين..كل سنة وكل واحد قاعد ياعينى مرعوب وبيكلم نفسه خايف ياعيني يضبطوه متلبس بكلمة تأييد قالها في لحظة نفاق للنظام السابق وقت ما كان من المقربين..خلاص تغيير الذمم والأراء آن أوانه مع موعد تبديل التوقيت الصيفي والساعة البيلوجية للمصريين..ودي فرصة لكل واحد يلحق يغيًر جلده ويزيد الغل في قلبه ويعلن الحرب علي السابقين..خلاص كل شئ إتغير ولازم نزيد الغِلو ضد النظام السابق بعد ما كنا له مؤيدين..ولازم نلعن ونشتم ونسب علشان نبقى للهوجة الجديدة مخلصين..خلاص بقى عندنا برامج ومنابر وعندنا أتباع تقدر تزلزل الميادين..وياويلك يا سواد ليلك لو عارضت خطتنا حنهشتكك ونبشتكك ونفضحك في اليو تيوب والجرانين..زمان كان أمن دولة ودلوقتي تلاقي الإنذارات عيني عينك من كل أصناف المتطرفين..التطرف مش بس في الدين لكن بنشوفه كمان في كتير من اللي بيدعوا إنهم ثوريين..الثورة الطاهرة الحرة كانت ثورة شعب حالم مقهور من ظلم جار عليه بيه منظومة من الفاسدين..الثورة قامت علشان نتغير كلنا ونتعامل بالمحبة والتسامح مش بحقد المتربصين..قدامنا حاجات كتير مهمة في حياتنا أهم كتير من التربص للماضي والتشدد والتشفي في أي مسئول من السابقين..رموز النظام السابق بين يدي الله ثم أيادي رجال قضائنا الشامخ الأمين..خلينا نبص قدامنا وبلاش نعشق مبدأ الموأمرة في كل حاجة في حياتنا لكن علشان نغيًرالوطن لازم نتغير من جوانا كمواطنين..علشان تبقي ثورجي لازم تبقي صاحب عقل راقي وصدر منشرح متسامح مش تتعامل مع الأمور بمنطق الجاهلين..علشان تبقى ثورجي لازم تترفع عن الصغائر وتتابع خطواتك بالعدل وتحكم علي الأمور بحكمة الواثقين..علشان تبقي ثورجي لازم تبص لقدام وتحاول تبني علي اللي فات مش تهد المعبد زي شمشون أو تمحي أثاره زي أجدادنا الفراعين..!! اللي بيحصل في المحروسة اليومين دول شئ مش غريب علينا لأنه حاجة موروثة فينا من أيام مينا..ثقافة فرعونية أبدية أزلية مزروعة من زمان في كل واحد فينا..مدام مات الملك يحيا الملك يبقي ببساطة لازم نزيل أثاره من كل شئ حوالينا..بس لازم في الوقت نفسه لازم نمحي من الوجود كل حاجة بتفضح نفاقنا حتي ملامحنا وبلاوينا..في كل عهد جديد لازم نقطع بالسيف كل شئ يوصل بين أي عهدنا الجديد وماضينا..لازم نثور ونقوم ونزيل أي أثر للعصر القديم ونشطب أي علامة بأظافرنا وأيادينا..ياترى ياهل ترى لو كل فرعون أزال أثار الفرعون اللي قبله كنا حنسيب لأحفادنا أي أثر باقي في أراضينا..التاريخ من حق الأحفاد ولازم يعرفوا تاريخ كل حاكم ظلم وأفسد أوحكم بالعدل فينا..الحمد لله إن أبو الهول لسه موجود وياخوفي ينطق ويضحك على جهلنا وغِلونا اللي حيكعبل خطاوينا..!! هدم الماضي وإزالة الأسماء عادة ورثناها كمان من أيام رمسيس..كان بيرسل حراسه في عز الليل شايلين المعاول والفوانيس..كانت الخطة معروفة إزاله كل أثر للحاكم السابق في معابد الكرنك وطيبة وممفيس..كانوا في حالة ثورة وهياج وبكل العنف راحوا يمحوا التاريخ ويزيلوا كل شاهد علي العصر بالجهل والتدليس..كانت هوجة خسرنا فيها صفحة من تاريخنا القديم سواء كان عادل أو فاسد تحت بند التسييس..معقولة في لحظة غضب نمحي صفحة من تاريخنا أيا كانت بحجة الغضب والتنفيس..التاريخ أي تاريخ هو ملك كل الناس ودليل علي عصر عشناه لكن تقول إيه في عقول مغلولة بالترابيس..!! كل من هب ودب راح عالمحاكم وطالب بدعوى قضائية..وتحت بند الشعب يريد التغيير وإزالة الحقبة المباركية..وراحوا وطالبوا بإزالة آل مبارك من علي المدارس والشوارع والميادين المصرية..وكمان رفع إسمه من محطة مترو الأنفاق اللي إتبنى في عصره ياعينى بسوء نيًة..طب مايروحوا يفجروا المترو أو يدمروا كمان المحور والدائرى وغيره من إنجازات الرئيس السابق وحكومتة الغبية..الفاسد نحاكمه وناخد حقنا منه لكن الإنجازات مهما عملها مين دي ملك أجيالنا اللي جايًة..أتركوا التاريخ يحكم بنفسه مفيش قاضي وجلاد في نفس الوقت يحكم على أي فترة تاريخية..إحنا عشنا فساد وقهر ليه نتعامل بنفس الأسلوب ونتحول بين يوم وليلة من تانى للديكتاتورية..الله يستر علي أيامنا اللي جاية ويحمي من ورثة فكر مينا ورمسيس أم الدنيا بهية..!! الخلاصة عاوزينها محاكم إستثنائية روحوا وشكلوا محكمة وحاسبوه..روحوا وأنصبوا المشانق للنظام وفي وسط الميدان إشنقوه..أو ياريت زي ما بتتمنوا تكون المحاكمة شعبية ومقبولة من إخواننا وشرعية وروحوا وحاكموه..وزيدوا نشرات الفساد علي الجرائد والفضائيات ودعبسوا عن الهيافات والعورات والحكاوي الشخصية وافضحوه..أرجوكم خلوا التاريخ يحكم علي الناس وسيبوا اللي فات لصاحب الأمر وإنسوه..مهما كنا عانينا لازم نبص قدام ونبدأ نبني في بلدنا وننسى ثقافه ثوره الفرعون واللي ورثوه فينا وسابوه..الله يسامح اللي كان السبب ويلعن الغل واللي خلفوه..لو فهمت حاجة إبقي قابلني ولو مافهمتش روح وهات حل لمحافظ قنا أو بالأسكندراني قول أيوووووووه..!! Said_elmasry fahmy@hotmail.com