الإئتلاف..والإختلاف ...!! إيييييييه دنيااااااااا..!!! سبحان من له العزة والدوام..وربنا يكفيك ويكفينا شر اللئام..والناس اللي بتتغيًر كل يوم وبتتلون بالتصريحات وبتلعب بالكلام..واللي بتنام وتتغطي وتحلم وتبرر مواقفها بطريقة تفسير الأحلام..وسبحان اللي بيغيًر ولايَتغيًر ودي عقيدة كلنا بنؤمن بيها مفيش كلام..لكن اللي بنشوفه اليومين دول ينفع فيلم كارتوني أو فيلم من أفلام مخرج الروائع حسن الإمام..لما البطل يقابل البطلة صدفة في وسط الملايين والدنيا زحام..ويروحوا ويحبوا بعض ويتقابلوا من ورا بابا وماما ويقعدوا يحلموا بالحرية علي طريقة العم سام..وقبل ماييتجوزوا في الآخر ويتهنوا في التبات والنبات ويعيشوا في وئام..ييجي راجل عجوز بدقن بيضا ويقول الجوازة دي باطلة من غير سفسطة كلام..لأن الأمور أكل مع الأمورة آيس كريم بالفانيليا والحليب من نفس الكاس يبقى رضعوا نفس الحليب في يوم رعد ومطر وغيام ..وتوتة توتة خلصت الحدوتة وياريت كل واحد يشد على نفسه اللحاف وعالسرير ينام..مين قال إن الديب السحلاوى يقدر يعيش في سلام مع الكتاكيت والبط والأغنام..ربنا يعدي الفترة دى على خير ونرجع من تاني نعيش في حرية وفرحة وسلام..خلاص زهقنا وتعبنا من الإختلاف والفذلكة والوجوه اللى بتخفي أنيابها بحديث أو تفسير وإبتسام..الغاية تبرر الوسيلة قلناها مليون مرة عنوانهم وماحدش فهم المعنى ولا حتى الكلام..!! ميدان التحليل كان فرصة العمر لناس كانت جاهزة بالسيناريو المبرمج والمدروس..الميدان كان مليان بكل الطوائف الثائر والمقهور والقرفان والزهقان والوطنى والجاسوس..في ناس كانت عارفة عايزة إيه وناس بتتفرج وناس مش فاهمة حاجة زي التيوس..والنوايا كانت مدفونة تحت العبايات والقلوب حتى لوصاحت الحناجر أو كان اللسان مخروس..كان ليل طويل مفيش كلام لكن كنا شايفين في نهاية الممر ضَى جاى من نور شمعة بعيدة جوًه فانوس..كان الشعب بكل أطيافه يد واحدة عالذل والفساد ومن الله محمى ومحروس..لكن بعد ما خلص المولد وبانت الرؤيا إختلفت المصالح ولقينا الوجوه إنفضحت والكل بالسُلطة بقى مفتون ومهووس..وإنفرط عقد الوحدة تحت بند المصالح وسياسة الخطوة خطوة والحزبية والبيزنس والفلوس..ربنا يكفيك شر اللي يستغل براءتك وسذاجتك ويحبط في الهمم والنفوس..يارب أستر وسلم وإحفظنا من المناور والمغامر وصاحب الأفكار العتيقة واللي مخه مليان صدأ زي الجاموس..هي ثورة وللا فرصة جَمعت تَنتَن على تَنتون وخايب الرجا عالموكوس..زمالة الميدان مولد إنطفى بريقه بعد ما دبت المصالح فيها مسمار الفُرقة وعَم فيها السوس..!! جماعة الخير راحت عالتحرير ومدوا إيدهم لجماعات الإئتلاف وبكل قوتهم خططوا لها وساعدوها..وفي ساعة الأزمة وبحكم الخبرة والممارسة من بطش السُلطة أنقذوها..ولبسوا ثوب الحملان وصبغوا نواياهم بالبراءة علشان الناس يصدقوها..الزهد في السلطة والمناصب كان إعلان مدفوع الأجر من دم الناس دفعوها..وراحوا وكونوا حزب مجرد واجهة سياسية وبرامجه للناس أعلنوها..زي العُملة ملك وكتابة وزيد زي عبيد حتى الهيئة العليا للحزب من غير إنتخابات عينوها..حتى نسبه المشاركة في المجالس الشعبية بكل ثقة وغرور حددوها..ولما خلصت الحدوتة لحسوا كلمتهم كالعادة ونسبة مشاركتهم في المجلس غيروها..وعملوا الحنجل والمنجل وربطوا الموافقة عالإستفتاء الدستوري بالمادة الثانية علشان الناس يرعبوها..وخدوها حجة وشوشروا علي كل إجتماع أو حوار وكل ندوة ناقشت الدستور قاطعوها..بيحلموا بتحقيق الأغلبية في البرلمان واللجنة الدستورية الجديدة يشكلوها..حتى وعدهم بعدم ترشيح رئيس للبلاد عملوا تمثيلية وإترشح قيادى منهم بعد تمثيلية ألِفوها..وفي آخر المطاف راحوا في الجمعة اليتيمة للثورة وتخلوا عن الإئتلاف والشباب في ميدان التخليل والمليونية قاطعوها..الله يلعن أبو المصالح علي المطامع على اللي خلفوها..!! الميدان مليان أحداث وإتفاقيات وتحالفات تُثير العجب..ناس مسالمة وناس متطرفة وناس بتنادي بالحوار وناس غاوية شغب..وجماعة بتحلم بتنويم الناس بالمغناطيس بشعارات أكل عليها الدهر وشرب..وإئتلافات إتفرقت وإتبعترت وإتلخصت في إحتجاج أو مظاهرة غضب..وصحافة وتوك شوك وأشباح أحزاب بتهلل لمفردات جديدة خارج قواميس الأدب..ياتري مين اللي إحتال علي الميدان وفرق بين ولاده ومين اللي لإرادتهم سلب..ياترى مين اللي حلل تآلف روح الناس وخللها وخلاها تبص لكل خطوة في شك وغضب..!! الشعب محتاج للوفاق ويرجع الأمان من جديد..الشعب محتاج قول وفعل مش شعارات أو كلمات متزوقة في نشيد..الشعب محتاج إئتلاف ثوري حقيقي وعمل حقيقي مفيد..الشعب محتاج تكاتف وتواجد في المصنع والميدان وتلاحم القريب والبعيد..الشعب محتاج يعرف طريقه فين والخطوة اللي جاية حتكون إيه بالتحديد..الشعب عاوز الحرية والعدالة وحقه في خير بلاده ومسئول ملتزم عاقل رشيد..الشعب مش محتاج لأي وصاية من أي جهة ولا ثقة من أي جماعة عاوزة تحكم الشارع بالتهديد والوعيد..زمن الوصاية خلاص بقى منتهي الصلاحية من 25 يناير اللي كان للحرية عيد..خلاص كل سنه وإنت طيب المصريين إدمنوا الحرية وصعب يرجعوا من تاني عبيد..هي دى الخلاصة وهي دى الرسالة بس ياترى نبعتها إزاي لولي الأمر وعلى أي بريد..!! said_elmaryfahmy@hotmail.com