قال الكابتن خالد الغندور، ردا على الهجوم الذي تعرض له في الفترة الأخيرة: "أنا تأكدت النهاردة بجد أن فى حد بيوصل كلامي غلط، وهو مش بيشوف، وأتمنى مايكنش اللي بيوصله الكلام الغلط ده من داخل الجهاز الفنى، لأن أنا مطلعتش يوم الخميس أو الجمعة الماضيين، ومجاش فرصة علشان أتكلم عن الجهاز الفنى الجديد، أو انتقده زى ما بيتقال".

 

وأضاف الغندور، خلال تقديم برنامجه "اللعبة الحلوة"، "لازم الكل يحترم النقد المحترم والبناء، لكن ما ينفعش مع احترامى لرئيس الزمالك يقول أمام الكابتن حلمى وجمال عبد الحميد وأعضاء الجهاز الفنى، أن خالد الغندور بيقطع فى زملائه، وأنا ما قطعتش فى أى حد.. وكلمنى يوم السبت علشان كتبت "بوست" على الفيس بسأل عن ترتيب أفراد الجهاز الفنى، اللي المفروض كان يتعمل من الأول، وشفنا دلوقتى اللي سألت عليه، وأدى إلى استقالة محمد صلاح ثم العودة فى استقالته مرة أخرى". 

 

وتابع الغندور: "نتمنى من الجميع أن يتقبل النقد المحترم، وسيادة المستشار زعل من نقد عادى.. وأشدنا بأداء الزمالك لما حصل تغييرات مع الكابتن محمد حلمى، ومش هنفضل نمدح طول الوقت، أو ننقد طول الوقت.. وخصوصا أنا ما ينفعش يتقالى كده، ومينفعش أبقى الحيطة المايلة للزملكاوية، وأن الزملكاوى الوحيد اللي عمرى ما قولت عايز اشتغل فى النادى، أو خدت جنيه من النادى، والوحيد اللي بيتشتم فى كل مكان بسبب انحيازى للزمالك، ومش معقولة بقى أبقى الحيطة المائلة لكل الناس".