قالت الإعلامية رانيا بدوي، مساء الثلاثاء، إن واقعة قيام شادي حسين، مراسل برنامج «أبلة فاهيتا»، والفنان الشاب أحمد مالك، بإهانة الشرطة عن طريق شراء «واقي ذكري» وإهدائه لبعض أفراد الأمن المركزي بميدان التحرير؛ خاطئة ومسيئة لأفراد الداخلية.

 

وأوضحت أنه بلا شك يوجد نماذج سيئة من الشباب في المجتمع، ولكن تعميم المسألة على كل الشباب خطأ كبير، مضيفةً: «لو هنفضل نهاجم الشباب كده كتير، خلاص.. أحرقوا الشباب بجاز، أنسفوهم أو نزلوا القطارات تدهسهم، ويعيش الوطن عجوز بلاش شباب».

 

وأضافت بدوي، خلال تقديمها برنامج «القاهرة اليوم»، عبر قناة «اليوم»، «طول الوقت الكل عمال يشتم في الشباب، مش معقول كده، الغلط مش فيهم، نُفضل دائمًا أن نصنع ما هو أسهل، بأن نقول إنهم شباب منحرف أو متحرر أو بلطجي، لكن الأصعب اللي إحنا مش بنختاره إننا نشتغل على الشباب، إننا نشتغل على المدارس ونربي جيل بجد، الأصعب إن الأب والأم يربوا أولادهم، لكن الأبوين بقوا بيفضلوا إنهم يقولوا إن الولد ده بايظ ومش نافع».

 

وتابعت: «القضية الأعم والأهم هي إيجاد حلول لما وصلنا إليه، علّم، وأعمل مدارس كويسة، وصحة كويسة، واستثمر في البشر، ولما شاب يبقى يشّذ وقتها ابقى أقطع رقبته، لكن إنت معملتش أي حاجة من ده، وفي النهاية مستني إيه من الشباب، فبلاش حد بقى ينتقد الشباب».