فرح المصرية المقيمة في الكويت.. نزعوا منها فرحة النجاح بمجموع 97 في المئة..
نشرت الطلبة المصرية المقيمة في الكويت فرح مأساتها مع مكتب التنسيق في مصر والمتسبب فيها المركز الثقافي البريطاني في الكويت الذي أضاع شهادتها الأصلية.. وقالت فرح في رسالتها على الفيسبوك..
تعالوا أحكي لكم شوية عن مستقبلي اللي بيضيع..
دلوقتي أنا واحدة حاصلة علي الثانوية الانجليزية (IGCSE) من الكويت و كنت مستنية شهادة المستوي الرفيع بتاعي من لندن و كان متوقع توصل الشهر دا. لما والدي راح يستلم الشهادة من المركز الثقافي البريطاني في الكويت، فوجئنا ان "الورقة" مكتوب عليها "no result".. اه هي حتة ورقة مش شهادة، و اه مش ظاهر لي نتيجة فيها. والدي عمل مشكلة هناك و المركز بعت للندن يستفسر و فوجئنا برضو ان الشهادة ضايعة. و لأن أنا كطالبة مش عارفة أوصل للادارة في لندن، كلامي كله مع مركزهم في الكويت. مديرة المركز أقنعت والدي ان الادارة في لندن بتبحث في الموضوع و بدأت في استخراج شهادة جديدة ليا. المشكلة هنا ان الشهادة هتاخد علي الأقل 20 يوم عقبال ما توصل من لندن للمركز في الكويت و مش أقل من يومين كمان عقبال ما تتوثق عشان أعرف أقدمها في التنسيق. آخر ميعاد للتقديم في التنسيق امتي؟ 31 أغسطس، يعني في جميع الأحوال مستحيل ألحق التنسيق. يعني ايه؟ يعني أنا مستقبلي ضاع بسبب غلطة من ادارة الشهادة اللي أنا بدرسها. كلية طب في جامعة حكومية و كل أحلامي ضاعت بسبب غلطة أنا ماليش أي ذنب فيها.
طيب دول أجانب و عمرهم ما هيحسوا بيا.. أنا أروح بقي لأولاد بلدي اللي أكيد قلبهم عليا. أستسمح بقي مكتب التنسيق في مهلة صغيرة لحد ما أستلم شهادتي اللي ضايعة، و همضي لهم علي تعهد و الله اني هجيبها. للأسف ماينفعش، الموظفة رفضت بشدة و قالت انها ماشية حسب التعليمات و مش هتقبل الملف غير في حالة وجود الشهادة دي. طب أقابل مدير مكتب التنسيق؟ طب أي حد مسئول في وزارة التعليم العالي؟ للأسف برضو ماينفعش.. أصل أنا ماعنديش واسطة.
يعني للأسف الشهادة ضايعة، للأسف ميعاد التنسيق محدد، للأسف ماعنديش واسطة، للأسف أنا مستقبلي ضاع.
طب يرضي مين دا يكون مجموعي 97% و ما أعرفش أدخل الكلية اللي بحلم بيها و كل ذنبي اني حاصلة علي شهادة معادلة من بلد تانية؟
أنا والدي حاول مع المركز الثقافي البريطاني بكل الطرق اننا نحصل علي الشهادة دي أسرع من كدة و لكن مافيش فايدة من الكلام. دلوقتي أنا مافيش قدامي غير اني أقابل أي حد من المسئولين في وزارة التعليم العالي و أوصل له مشكلتي عشان يساعدني. فأنا كل اللي بطلبه منكم هو الشير. محتاجة رسالتي توصل لأكبر عدد من الناس، يمكن حد يقدر يساعدني.
ترى من يساعد فرح وإلى متى نظل كمصريين في الكويت نعاني من تعنت مكتب التنسيق في مصر ورفضه غير المنطقي لصور الشهادات طبق الأصل أو الإقرارات.. ولمصلحة من هذا التعنت والروتين والتعمد لضياع مستقبل أبناءنا.. لنا الله,