مع اقتراب شهر رمضان الكريم، وظهور بروموهات المسلسلات التى تذاع خلال الشعر الكريم، بدأ تجار البلح فى تغيير أسماء البلح وإطلاق أسماء المسلسلات على نوعياته المختلفة لتنشيط حركة البيع والشراء التى تتوقف قبيل رمضان لاستعداد الأسر لتدبير احتياجات الموائد والولائم.

وكان لمسلسل "دلع البنات" نصيب الأسد من بين نوعيات البلح التى أطلق عليها أسماء المسلسلات، حيث تصدر "دلع البنات" قائمة الأسعار لأجود أنواع البلح الذى وصل سعره إلى 12 جنيها، بينما احتل العملية ميسى المرتبة الثانية بالقائمة ووصل سعره إلى 11 جنيها، فى حين أخذ مسلسل صاحب السعادة المرتبة الثالثة ووصل سعره إلى 8.5، وستتغير هذه الأسعار حسب نسبة المشاهدة فى بداية رمضان وفقا لكلام التجار.

تحكى "أم نور" صاحبة محل ياميش، عن فكرة تغيير أسماء البلح من المسميات السياسية إلى أسماء المسلسلات لـ"اليوم السابع": "بدأت حركة البيع والشرا تخف كالعادة مع قرب أول يوم لرمضان لأن الناس بتبقى اشترت مخزونها اللى يكفيها فترة طويلة من الشهر ".

متابعة: "ولأن السنة دى مكانش الإقبال من الأول كبير فإحنا محققناش الربح اللى بنحققه كل سنة واللى بيخلينا نقدر نستحمل الفترة دى حتى لو مفيش بيع، علشان كده فكرت فى تغيير أسماء البلح من الأسماء السياسية زى بلح الثورة والشعب وتسلم الأيادى وبشرة خير، إلى أسماء المسلسلات اللى حسينا أن الناس مستنية تتعرض".

وتتابع "وفعلا كنت أنا صاحبة الفكرة وأول واحدة تعملها ومن بعدى بدأ تجار كتير يقلدوها داخل سوق السيدة وخارجه لما لقوها نجحت وعجبت الناس وفعلا بدأوا يشتروا تانى".

بينما يقول "رشاد عبد الفتاح" أحد تجار الياميش، "بدأنا نختار أجود أنواع البلح وأعلاهم على حسب المسلسلات وعلى حسب انتظار الناس لها، ومن هنا جه اختيارنا لمسلسل دلع بنات اللى الناس كلها مستنياه، خاصة البنات والستات، وبما إنهم هما اللى بينزلوا يشتروا فكان لازم نداعبهم ونحط أحسن أنواع البلح على اسم المسلسل وفعلا هو أكتر أنواع البلح اللى بتقبل على شرائها الستات والبنات واللى وصل سعره لـ"12 جنيها".

متابعا: "وجه مسلسل (العملية ميسى) كتانى أفخر أنواع البلح واللى وصل سعره لـ"11" جنيها، وطبعا مخرجش الزعيم ومسلسل صاحب السعادة عن المراكز التلاتة الأولى وكان سعره 8.5 للكيلو.