مـنْ شِـــدِّة الأَلَـمْ

(1)

بجد مش هزار

مصيبتنا ف الكبار

على ما يحسبوها

ويشوفوا ازاي حتمشي

وازاي حيلعبوها

والجلسة ازاي

وامتى

تكون الدنيا خربت

والبلطجية هربت

وكل شيء دمار

(2)

هية صحيح جبهة إنقاذ

ولا عجوز من غير عكاز

ولا شمعة مش بتنور

ولا لمبة من غير جاز

بس بنار العند حتحرق

مصر بحالها

وحتغتالها

وحتمشي ف جنازتها تنوَّح

وحتسأل زينا وتشوَّح

أنا عايزة اعرف

مين اللي قتلها؟!

(3)

هية البلد دي لها صاحب

يظهر ملهاش

حتى اللي بيقولوا صحابها

وبيدعوا كتب كتابها

شوية أوباش

بينهشوا ف لحم شبابها

وبيحفروا قبر عذابها

بيبيعوا الدور من أعتابها

وبيقبضوا كاش

لا تقول لي إخوان ولا سلفي

شافعي ومالكي أو حنفي

ولا حتى ليبرالي مأصل

لا تقولي جبهة وما جبهاش

كله بيلعب على كله

وكله بيسخن كله

وبهية راحت فيها بلاش

ولا حد حاسس بعذابها

ولا حد تعبان لتعبها

ولا حد مُخلص لترابها

والكل طناش

يا ريت يكون خايب ظني

وهي تخرج منها سليمة

والسوء تملي

ما يصيبهاش.

عبد الحميد زقزوق