أرجوك اعطنى هذا الدواء ..!! إلى كل من يهمه الأمر.. إلى كل من يهمه أمر بلد سماها القدر مصر.. إلى كل واحد من المحروسة شايف بقينا إزاى وإزاى ولادنا وشبابنا بقوا بيموتوا ببساطة كده جهارا نهارا وفى عز العصر.. إلى كل واحد سواء لسه قاعد عالكرسى مسئول أو واحد تانى زى الشبح ويقولوا عليه فلول أو أى واحد مستخبى وبيلعب بصوابعه فينا من جوه عشة أو سفارة أو حتى قصر.. مصر بتتحرق ونيل أمنها بيجف والفوضى نخرت عظامها ولا عاد لينا كبير ولا عاد حد يحس إنه فيه ثورة أو فيه أي استقرار أو حتى نصر..!! اللي حصل مسخرة ومهزلة بكل المقاييس وعودة مريعة للإنفلات من جديد..شباب في عمر الزهور سفحوا دمهم وقتلوهم بدم بارد في موقعة إستاد بور سعيد..أمن هزيل سلبي وأداء باهت وتخاذل من جهاز والحجة جاهزة (إحنا مالنا) جهازنا لسه في دور النقاهة والإحلال والتجديد..مباراة مجرد مباراة تتحول في لحظة واحد لموقعة حربية في مظهر من مظاهر الإنفلات من نوع فريد..جماهير منفلتة وإعلام فاق الإعلام الصهيوني في إثارة الناس وهوان روح ونفس المواطن في عيون رجال الأمن وسقوط لأمن وطن بأكمله وتهديد..يا ترى هل هي رسالة واضحة من جهة مُعينة وللا إحنا فعلا بقينا كدة وللا عين حمرا بترهبنا وبترسل لينا رسالة تهديد ووعيد..ملعون أبو السياسة على المصالح الضيقة الشخصية على كل واحد بيزايد على أمن بلد كل هم المواطن فيه يعيش مرتاح وسعيد..يا ترى مين اللي عاوز يولعها ويخربها خلاص زهقنا من مقولة الأيادى الخفية والطرف الثالث واستمرار مسلسل الفوضى والإطالة والتمديد..اللي حصل محتاج الكى وهو خير علاج لكل اللى بنشوفه وإحنا بننادي بتحقيقه مش طبطبه ولجان تحقيق خايبه وبيانات تنديد..كفاية مهانة وإهانة وتفريط في أمن المواطن وتسريب لقدرات الوطن وتبديد..البداية كانت في الميدان وبعدها ماسبيرو ثم محمد محمود ومجلس الوزراء ونهاية المسلسل وللأسف بلد كانت عنوان للبطولة والصمود فى وجدان كل مصرى للأسف الشديد..!! بور سعيد كانت زمان بلد صمود وبطولة وشهامة..جالها إنفلات غريب خلى أيامها ندامة..يا ترى مين اللى غيرها وبدل سلوك أهلها وسرق منها الأمان وأبسط مقاييس السلامة..يا ترى مين اللى دفع الثمن ومين اللى حيعوضنا دم ولادنا ومين اللى حيشيل الليلة ويدفع الدية والغرامة..يا ترى مين الجبار ده اللى من حقه يخلى وطن بحاله ينام حزين ويسرق منه فرحته ويحرمه حتى مجرد الإبتسامة..هل إحنا فعلا كده وللا بقينا كده وللا إحنا بنخاف ما نختشيش وللا على مين حيكون اللوم والملامة..يا خسارة عليكى يا بور سعيد يا أرض الأبطال في الزمن الجميل ومبروك عليكى إيزو الإرهاب اللى بقى وبدون فخر وسام خزى وعار وماركة مسجلة موصومة بعلامة..!! والآن أناشد كل صاحب أمر فى البلد دى إنه يراعى فينا ربنا..كفاية تفريط فى كرامتنا وكفاية صعوبة لقمة العيش علينا مش كمان تسيبوا كل صاحب مصلحة يسرق حتى أمننا..إحنا الأغلبية الصامتة اللى شايلين الهم وبنشرب كل حاجة بتجربوها فينا لكن نفذ خلاص صبرنا..الخراب هَل وحَل علينا خلاص وطال كل بيت فينا وصراع أصحاب المصالح بقينا جميعا ضحاياه كلنا..تقولوا شعب صبور شعب عظيم خلاص لا عدنا نصدق غير اللى بنشوفه ولا عاد حد يضحك علينا بكلام كبيرويعمل نفسه مننا..خلاص قرفنا وزهقنا ويا تكونوا قد المسئولية لا تروحوا فى ستين داهية إلهى يريحنا منكم ربنا..يا أي صاحب قرار الآن الآن الآن يا تحكمها بقبضة من حديد وتعيد لينا الأمن والأمان وقبل كل ده تشعر بالمأساة زينا..تقولوا بلطججة تقولوا إنفلات تقولوا تراخى أمنى مالناش دعوة إحنا من الأول والآخر عاوزين حق دم ولادنا وحقنا..!! اللى حصل فى بور سعيد حصاد متوقع لرخاوة الأداء الأمنى ونتيجة للطبطبة وسفسطة إعلام افتكر إن كل شئ مباح وبقينا قال إيه دولة ديمقراطية..البلد بقى مالهاش كبير والنقد الهدام طال ونال حتى هيبه ومكانة المؤسسة العسكرية..كل من هب ودب طلع ويتفلسف ويتهم العسكر والأمن بإثارة الأحداث لتمديد فترة بقاءهم وتطويل الفترة الإنتقالية..خلاص وكفانا خسائر ولازم العلاج يكون بالكى لصالح الوطن والمواطن حتى لو كان الحل أحكام عرفية..لو حنذوق المر فترة إحنا موافقين وأفضل ما نعيش فى جو إرهابى كل يوم وننام من غير ما ندرى حنصحى على أى مصيبة جديدة تهدد حياتنا اليومية..الدواء الشافى هو المصارحة والضرب بيد من حديد على كل مصدر لتهديد حياتنا وأولهم المتراخين عن أداء وظيفتهم فى وزارة الداخلية..ناس بتموت ولعيبة بتنضرب عينى عينك بمباركة الأمن وأداء مريب بمنتهى السلبية..أكثر من سبعين قتيل والعقاب ضربة على اليد وما تعملش كدة تانى ونقل مدير أمن لمنطقة نائية..ومحافظ من غير حس ولا خبر وكأن اللى حصل إختلاف فى وجهات النظر أو مخالفة مرور أو مشاجرة عادية..عاوزين ننضف بقى ونطهر بلدنا من كل نماذج سوء الأداء والبلطجة والهمجية..يا صاحب الأمر أرجوك ضع قطن فى ودانك وأنشر الأمن وحسسنا بالأمان وسيبك من سفسطة أصحاب دكاكين حقوق الإنسان والمنظمات المشبوهة الحقوقية..يا سيدى أيا من تكون يا تكون صاحب قرار وحزم يا إما تعترف إنك مش قد المسئولية..!! خلاص وصلنا حدنا وولادنا بتموت زى الخرفان وكلنا شايفين العلة وعارفين الداء.. اللى بيحصل فى المحروسة ورم سرطانى متوحش محتاج تدخل جراحى ولا بديل عن الكي كدواء..لو لم نبدأ العلاج الآن مش حنلوم إلا نفسنا ولا حتنفع معانا أى رحمة حتى لو نزلت علينا من السماء..العين الحمرا والقبضة الأمنية الحقيقية هما الحل فأرجوك يا صاحب الأمر إعطنا هذا الدواء..!! said_elmasryfahmy@hotmail.com