إختشي يا حكومة .. !! عارف يعني أيه غربة ..!! حاسس يعني إيه إنك تسيب وطنك .. وتهجر حبايبك وأصحابك وأهلك .. قادر تتخيل لما الزمن يجبرك إنك تسيب بيتك .. وتتنازل عن شغلك وأرضك وتفرط في غيطك ..!! ممكن تتصور حياتك لما تتنازل بالإجبار عن أيام الشباب .. وتبعد غصب عنك عن الأهل والأصحاب .. وتختار وطن تاني لا أقارب ولا أحباب ..!! عارف يعني إيه تلملم القروش والفلوس .. وتحاول تهاجر بعد ما ضاقت الصدور والنفوس .. وشعرت إنك في وطنك غريب منحوس .. لا قادر تحقق طموحك وداير في ساقيه زي الجاموس .. لا فيه عائد ولا قادر تقب قاعد مكانك محبوس ..!! عارف يعني إيه الوطن يبقي ضيق عليك .. ومقاسه مش على قدك ومصيرك مش بإيدك.. وشايف ناس بتلهط نصيبك قدام عنيك.. وإن حاولت تهلفط وتبرطم حتروح النار برجليك ..!! عارف يعني إيه تحس إنك مالكش إختيار .. وإن ناس بتشقى وناس بتكسب من غير اختبار .. عمرك شفت وطن مقسوم جنة ونار .. مواطن معدوم والهبره للكبار .. والكلمة الحرة بتموت ومحبوسة ورا الاسوار .. والهليبة ماسكة المناصب أحرار .. ووطن بقى كله ليل ولا باين عليه نهار .. إن فكرت في كل ده لازم تكون محتار .. وتحاول تسعى في أرض الله من غير إختيار ..!! وده اللي فكر فيه الباشمهندس حسنين .. لما ضاقت بيه الدنيا ومش عارف يعيش منين .. ورغم انتماءه لبلده والشوق والحنين ..!! وكفاح أهله عليه علشان يعلموه .. وعلشان يبقى مهندس طلعت عين ابوه .. اللي صرف دم قلبه عليه علشان يكبروه ..!! حسنين إتخرج مهندس ولقي الدنيا زى ماهي .. واشتغل في إدارة هندسية بالحتة واليومية .. ولقى الجاى مش قد اللي رايح والحياة مملة روتينية .. لا عارف يتجوز ولا لاقي شوية رمل في منطقة صحراوية .. والأراضي ما شاء الله بتتوزع بالكوسة والملوخية .. والوظائف مكتوبة لاصحاب المحسوبية .. الدنيا اتقفلت في عينه وبقت يا ناس رمادية .. فكر في مستقبله وحيعمل إيه والأمور زى ما هي ..!! ودع أهله وباع دهب أمه وأخواته .. وراح لملم خلجاته وطفش من البلد بمراته .. وساب وظيفته وراح يدور على مستقبل لولاده ..!! حسنين يا ناس ربنا وفقه وابتدى في غربته المشوار .. وواصل كفاحه وعمله يوماتي ليل ونهار .. وربنا كرمه بولد سماه حسن وبنت سماها أزهار .. !! حسنين علشان ملتزم وعارف اللي عليه .. كان كل سنة بيدفع التأمينات بالدولار مش بالجنية .. ومحافظ على وظيفته علشان لو غدر الزمن بيه .. والغربة مش مضمونة ولا عارف بكرة حيحصل إيه ..!! حسنين كان نموذج للمواطن البسيط العادي .. حياته لا بمبى ولا سوده تقدر تقول رمادي .. عايش في الغربة مستور وبينزل أجازة ويهادي .. وبيساعد أهله وأخواته وصاحبه من زمان فادي ..!! وسايب وظيفته لغيره وبيدفع عليها تأمين وضريبة .. ولو رجع لبلده بحاجة يدفع جمارك رهيبة .. وتلاقي الناس بتبص عليه كده بطريقة مريبة .. وكأنه زكيبة فلوس أو كائن من بلاد عجيبة ..!! حسنين إحتار مع القوانين المزاجية مع المغتربين .. واللي ضحوا بكل شئ وفي الغربة عايشين .. ولا قادرين يرجعوا ولا ضامنين عملهم يا عيني مجبرين .. ورغم كل ده تلاقي تجاهل من المسئولين .. ضرايب وتأمينات وحبايه في المواني مرغمين .. وتفرقة في المعاملة ولا كأنهم مواطنين .. فاكرين إن كل مغترب بيهبر يا عيني مش حاسين ..!! حسنين صبر على كل ده علشان يكمل رسالته .. واستحمل كل قانون عجيب ورزالته .. وعاش جنب الحيط علشان يضمن سلامته .. لا فيه راعى بيتولاه ولا سفارة تضمن حمايته .. وحط همه في تعليم ولاده علشان يكمل مسيرته .. ومرتب ضايع بين السكن ومدارس ومعيشة مش عارف نهايته ..!! وفي يوم من الأيام سمع عن قانون يجيب الغم .. بيناقشوه في البرلمان وبسرعة جاله الهم ..!! المشروع العجيب بيفرق بين المواطنين .. ما بين مواطن محلى وواحد من المغتربين ..!! المواطن هناك يتمتع بالجامعات الحكومية .. والمغترب هنا فاقد الشرعية ..ويدفع فلوس كتير في الجامعات الخاصة والأهلية .. قانون غريب مالوش أي شرعية دستورية ..!! والقانون ده يا ناس ظالم وبيحرم المغتربين من حقوقهم .. وقاسي كتير عليهم وبيزود همومهم .. !! والمغتربين في حيرة مش عارفين يشكوا لمين .. ولا فيه قانون بيحميهم ولا سفارة ياعيني تايهين .. كل واحد يألف قانون يظلمهم ولا كأنهم مواطنين .. ولا بيساعدوا بلادهم بالعملة الصعبة بالملايين .. وسايبين أهلهم ودارهم هناك مجبرين ..!! قانون ساكسونيا ده لازم يكون له حل .. الدنيا بقت فعلا صعبة والعيشة بقت خل .. الناس خلاص اتخنقت والواحد زهق ومل ..!! وإتحملت الغربة والذل علشان تربي ولادها .. وبيجي قانون غريب يزيد غربتها ويبعدها ..!! إحنا نتساهل في أي حاجة ولا نفرط في لحمنا .. ونيجي على نفسنا ولا يهون علينا دمنا.. وولادنا هم دمنا ولحمنا والباقي من عمرنا .. ومستقبلهم خط أحمر نموت علشانه كلنا ..!! إزاي بسهولة كده عاوزين يصنفوهم .. ويمنعوا دخولهم الجامعات الحكومية ويحرموهم ..!! الحكومة لازم يكون عندها شوية حياء .. وكفاية عليها دعاوي الناس اللي مرفوعة للسماء.. وقوانين الضرائب والمرور والغلاء .. وفلوس التأمينات والماء والكهرباء .. هم فاكرين المغترب خروف بيقول مااااااء .. مش كفاية الغربة والحرمان والذل والعناء .. هم عاوزين عمرنا كله يضيع هباء .. مش كفاية قهر وجباية ومص دماء ..!! التفرقة بين المواطنين في الداخل والخارج كتير أليمة .. وتفرقة عنصرية فوايدها عديمة .. وبتقتل الأمل جوانا وتهبط فينا العزيمة .. اللي بيحصل ده يا ناس غير دستوري وجريمة ..!! هو احنا لازم نلف وندور في كل زمان .. ونرفع شكوتنا واصواتنا لأي مكان .. ونبعت آهاتنا وصرخاتنا لجمعيات حقوق الإنسان .. هو خلاص المغترب مالوش في وطنه ضمان أو أمان ..!! هو لازم نبعت للمستر أوباما رسالة عاطفية .. علشان يضغط عليهم ويمنح لولادنا الحرية .. زي ما ضغط وأفرج عن بتوع المعارضة السياسية .. وللا ننتظر زي ما نتمني قرارا ت سيادية .. تدي الحق لولادنا المغتربين في الجامعات الحكومية .. وتساوي بين ابناء الداخل والخارج بالحق والشرعية .. وتبطل تبص لينا نظرة مريبة استغلالية .. ياريت نبطل بقى الألاعيب السياسية .. ونعامل المغتربين بالعدل والإنسانية ..!! المواطنون سواسية في كل القوانين والدساتير .. مش ناس تاخد كل حاجة وناس تتغرب وتشوف الذل وفي الأخر تلبس طراطير .. !! بقلم : د/ سعيد فهمي ( المصري أفندي ) said_elmasryfahmy@hotmail.com