الوافدون فى الأرض..!! تعمل إيه لو صحيت الصبح ولقيت الدنيا ضاقت فى عنيك..وحسيت إن قوتك يادوب على القد وساعات كتير مش بيكفيك..عايش يادوب مستور ولحافك ياعينى مش طايل رجليك..ولقيتك مش قادر تتنفس ولا حتى قادر تبص حواليك..واللى جاى مش قد اللى رايح مسكين ياعينى عليك..أكيد حتفكر تهاجر أو تطفش وده غصب عنك مش بإيديك..!! وتعمل إيه لو حسيت إن اللى مسئولين عن حياتك فى وطنك ظلموك..وضيقوا عليك رزقك وعالهجرة أجبروك..ولو مفيش لك ضهر أكيد حيبهدلوك..ويوزعوا عليهم خير البلد وإنت حيطنشوك..قروض وأراضى وهبات وكله من خير أبوك..وإن حاولت تعترض حيحصل سين وجيم وييجوا يستجوبوك..وتروح فى حيص بيص وفى الآخر عالشارع يرموك.. مفيش غير إنك تسيب الجمل بماحمل أو تدعى زى الولايا على اللى ظلموك..!! وتعمل إيه لو لقيت وطنك ضاق عليك ومش قادر يضمك..ولقيتك مش عارف تلاقى أوضة فوق سطوح أو بيت يلمك..ويوماتى تلاقى تصريح من مسئول بإن الدنيا ربيع والحال تمام أتاريه بيضحك عليك ويخمك..ولو عندك بيت وولاد ومش قادر تلاحق عليهم والعيشة بقى حالها يغمك..أكيد حتلاقى حل من تلاتة ياتموت ياتتغرب ياتترمى تولول فى حضن أمك..وتروح تسعى فى بلاد الله وتنسى اللى قلل الرزق عليك وأهانك وأذلك..!! وهو ده حال معظم الغلابة المغتربين..اللى هجوًا من البلد وقالوا عليهم وافدين..واللى راحوا وحفروا فى الصخرعلشان يربوا عيالهم ويبقوا بنى آدمين..وعلشان لقمة العيش الكريمة بتلاقيهم ياعينى فى شغلهم مطحونين..عايشين كل واحد على قد مجهوده تقدر تقول مستورين..اللى بيصرف على تعليم ولاده أو بيوفر حق بيت يلمه بعد عذاب السنين..وياعالم حيرجع سليم على رجليه أو محمول عالإيدين..ماهى غربة مالهاش آمان ولاعارفين واخدانا فين..!! لكن الكلام دة كان راكب تمام على المهندس زين..اللى كان متخرج قول كدة من سنين..وشوية تلاقى حاله عال العال وكتير تلاقية حزين.. خلاصة الكلام الباشمهندس كان ملهوف عالسفر مسكين.. لاشغلانة ثابتة ولا دخل مضمون مسكين..وكان مقطوع من شجرة عايش فى البدرشين..زين راح هنا وهناك يدور عالحل فين..سأل صحابه من البلد أحمد وجمال وكمان حسنين.. المهم الكل شاوروا عليه يسافر لكن المهم فين ومنين..قالوا مادام مسافر وحتسيب بلدك حبيبتك روح بيع لك القراطين.. أو روح إرهن جاموسة خالك عبد المعين.. أو إرهن عفش بيتك وإبقى إدفع بعدين..وروح عند الحاج مؤمن صاحب مكتب السفريات التقى الورع الأمين ..!! يادوب حياخد منك كام ألف ويشحنك مع المسافرين..!! زين لقى الكلام معقول وحس إن المشكلة هانت..واتعجب من أفكاره وازاى الفكرة دى عنه غابت..قال أروح أخطب بنت خالى واهبر منه الجاموسة وياصابت ياخابت..المهم الأمور إتيسرت وزين لقى نفسه طالع عالمطار بعد ماعقله طار وراسه شابت..وحس إن الدنيا خلاص حتضحك له وإن عين النحس فيه طابت..!! زين راح على بلد الغربة وهو لسة شباب..ومرت بيه يوم حلو ويوم حادق ويوم زى الهباب ..والعمرمر بيه من غير مايحس لحد ماشعره شاب..وكان طول السنين بيعيش الحنين لبلده ويروح ويدق الباب..ويزور أهله وحبايبه الصغار والشياب..وكان بيفتكر معاهم دايما الأيام الخوالى والذكريات..ولما يسألوه إمتى ترجع لبلدك يضحك ويعتبرها قفشة من القفشات..علشان عارف الحال والمعيشة فى بلده حيخليه عايش عالفتات..ويضطر يرجع عالغربه رغم مرارتها ولايرجع للى فات..وأهى عيشة هنا وللا هناك بدل مايرجع ويغنى أبوك السقا مات..!! زين كان ملتزم زى كل الجالية لأوامر الغربة وده طبعا غصب عن عنيها..ومافيش بلطجة ضريبية فرضتها الحكومة إلا وسددوها..ده غير فلوس التأمينات اللى بيخصموها..وإتاوة تصريح العمل اللى كل سنة بيدفعوها..ومافيش محاولة لفرض ضريبة عالدخل إللا عملوها..ورغم عدم دستوريتها يروحوا تانى ويكرروها..وإذا قابلوا مشكله فى الغربة مفيش ضهرولا مرجعية يراجعوها..لاسفارة بتهتم بيهم ولا قنصلية ومشاكلهم الكل بيطنشوها..ووزارة هجرة وهمية ومصالح العاملين فى الخارج ياعينى بيهملوها..ومكاتب عمالية وغيرها مش فاضية لمشاكل الوافدين من كثره الإحتفالات والرسميات اللى بيحضروها..ده غير الجمارك اللى على الهدايا والمتعلقات الشخصية اللى فى الجمارك بيهبروها..والمعاملة الجافة اللى بيلاقوها والبهدلة اللى بيشوفوها..وكأنهم غزاه من كوكب تانى جايين بلدهم علشان يغزوها..وآآآآه لو بتجمرك عربية روح وشوف التحايل والبلطجة والضريبة اللى بيحسبوها..جمارك وضريبة مبيعات ورسوم تنمية ورسوم وهمية أتحداك لو الناس فهموها..يعنى الخلاصة الوافد بيخرج منها عالحديدة وبيدعى عالجمارك واللى بيفبركوها..!! لكن كل دة مش هو اللى كان شاغل بال الأخ زين..ولا كان فى حسبان المأسوف على شبابهم الوافدين..كان كل همهم ياعينى الستر وتربية ولادهم وتعليمهم زى البنى أدمين..لأنهم الأمل والمستقبل والشئ الحلو الباقى من عذاب الغربة اللعين..!! لكن ياترى حكومتنا الكريمة عملت إيه ليهم المساكين..؟؟ وكأن مش كفايه بهدلة أهاليهم الغلبانين..!! لقينا وشفنا العجب فى مكتب التنسيق..أساليب عجيبة غريبة تستوجب التحقيق..ومجزرة فى المجاميع والكل صار غريق..!! ماتعرفش هل قللوا النسبة المفروضة للغلابة الوافدين..وللا عاوزين يفرضوا عليهم الجامعات الخاصة ياعينى مجبرين..وللا عاوزين يحرموهم حقهم الدستورى وكأنهم مش مواطنين..معقول طالب حاصل على 98%ِ يتساوى مع أبو خمسة وسبعين..!!ويروح جامعة خاصة زى أصحاب المجاميع البسيطة الكسلانين..مش كفاية حارمينهم من حق الإنتقال والإغتراب من جامعة لجامعة سايبينهم متبهدلين..ولو حبيت تنقل إبنك بعد أول سنة تدفع مصاريف التحويل أضعاف غلابة مساكين..ولو واحد فيهم إتفوق ياخدوا مكافأة التفوق أقل من زميلهم المحلى ياعينى مقهورين..ياترى هى دى المساواه بين المواطنين..هم ولادنا ولاد البطة السودة وللا علشان هم أبناء الغلابة الوافدين..!! زين هاج وثار وراح هو وأصحابه للسفارة عند المسئولين..ولالقوا عندهم فكرة ولا هم بمشاغل الوافد حاسين..وكمان كانوا بيستعدوا لإحتفالات ذكرى أكتوبروالنصر المبين..المهم الرسميات بلا مشاكل بلا دوشة بلا دلع وافدين..!! والنصيحة روح إخبط دماغك فى الحيط يازين أو هلفط زى المجانين..وادعى زى الولايا على اللى بيخترعوا الظلم والقوانين..وقول معانا ملعون أبو الظلم والقهر وولاد اللذين..اللى خلونا أغراب عايشين فى بلادنا مقهورين..روح يازين واكشف راسك عند أى مقام فى جامع وادعى واحنا نقول آآآآمين..وربنا يكفيك شر دعوة المظلوم والمقهور والوافدين..!! Said_elmasry fahmy@hotmail.com د.سعيد فهمى ( المصرى أفندى )