ثورة جُحا ....!!! كان ياما كان حدوتة كانت للناس موال بيحكوا عنها ويرددوها..الحدوتة بدأت بضيق وهَم وغَم وأعراض حياتية وأيام صعبة الناس عاشوها..كان الظلم واضح وفاضح وتباين الفارق بين الصفوة والناس مش محتاج تعليق لأن أثاره كل الناس شافوها..حزب فاجر وقلة من البشر بالصدفة ملكوا مصر وحكموها..ومجلس بالتزوير فرضوه عالناس وإرادتهم من غير إستئذان زوروها..وأسعار زى النار بتكوى الناس اللى كانت بتعانى منها ولا كانوا قادرين عليها ولا عارفين يواجهوها..وشباب منحوس موكوس من غير وظيفة ولا شقة وبنت الجيران بقت عانس من غير مايسًتروها..وظلم وبطش وإبداع فى الأذى لفئات كثيرة وحبس لناس كتير من غير مايحاكموها..وشُرطة عنيفة وحق للناس ضايع ومواطن من غير ديًة وناس كتير ظلموها..ومجتمع بيعشق التوارث في جميع المجالات دون إستثناء وحتى قوانين الوراثة طوروها..يعنى بإختصار كانت الناس مكبوتة ومقهورة ومحتاجة قشة بعير علشان تقوم وتفضفض وتلعن أبو العيشة على اللي خلفوها..يعنى الخلاصة كانت الناس على شفا حفرة واللى حصل إن ناس راحت وإستغلت الفرصة وولعوها..وناس نكشت في مشاعر الناس ولقوها فرصة وإستغلوها..وناس ركبت الموجة وصنعوا حكايات وروايات لأبطال وهمية من خيالهم إبتدعوها..ومنظمات من بره الحدود كانت مستنية ساعة الصفر وجاهزة بكوادر عملوا فيها ثوار وكانوا جاهزين علشان يشعللوها..وقامت قومه الشعب المقهور وخرج يصرخ ويطالب بحقه لكن ناس راحت فى الضلمة ونطت عالثورة وركبوها..اللى كانوا مُهمشين وفجأة بقالهم دور وفرصة وإستغلوها..واللى كانوا بيعشقوا تراب السلطة والأضواء وعملوا فيها أبطال وأصحاب مبادئ وأوهام هُم بس اللى عاشوها..وجماعات هادنت السلطة عشرات السنين وما بين شد وجذب لكن فى الآخر كانت أدوار وبيمثلوها..وناس لا كان ليها دور ولا طعم ولا ريحه وراحت الفضائيات وصنفرتهم وعملتهم أبطال من ورق في قصة فبركوها..ودولارات وفلوس كتير ومنظمات راحت تقبض ثمن أدوارها والبروبجندا اللى عملوها..ومذيعين وإعلاميين على ماتُفرج باعوا نفسهم للقنوات وعلى قد ما تعلى صوتها وتفبرك حتلاقى اللى بيقدروها..وصحافة وأنصاف صحافيين لقوها فرصة يبثوا سفاهة أفكارهم وعالناس ينشروها..وناس عملت فيها شعراء وكل واحد ركب الحروف وصاغها اللي حلمنتيشى واللى كلامه جخ واللى عامل فيها خال ومفيش عيد للسلطة إلا وكانوا بيطوعوا ليها الكلمة وينقشوها..بإختصار كانت هوجة وسمك لبن تمر هندى وفرصة لناس قمة فى إستغلال الظروف وعارفين إزاى لما تيجى الفرصة يركبوها..صدقنى فيه ناس سرقت أحلام الناس وأوهمتهم إن دى ثورتهم وللأسف فيه كتير منهم صدقوها..عملوا زي جُحا اللى كان بيصدق الكدبه ويعشق اللي بيألفوها..مش مصدق روح وشوف الميدان أول رمضان وشوف فرحة الناس وهتافهم للقوات اللى من البلطجة حرروها..روح وشوف نماذج اللى عاملين ثوار وأحرار ومانعين الناس من المرور وقوانين الغابة تحت بند الثورة طبقوها..روح شوف عيال 15 أو 16 سنه بيتباهوا بذكرياتهم لما راحوا حرقوا مراكز الشرطة وسرقوها..روح وشوف السفسطة والفذلكة وكل واحد عامل فيها أحمد عرابى ومُتخيل إن مصر تحت الإحتلال وجايين هُم يحرروها..وكاميرات شكلها غريب مريب ليها ملامح مش زينا بيندسوا جوه الناس ومنها عالفضائيات ينشروها..وصبايا وصبيان واقفين يهاجموا فى العسكر اللى حاميين الوطن وصابرين مش عارف ليه على اللى بيخربوها..واللى عامل فيها جيفارا واللى لابسة كوفية وبتبرطم بكلمات أتحداك لو كانت فاهمة القصة اللى سمعوها..وناس بتشكك فى محاكمة النظام السابق وصدق المجلس العسكرى رغم إن المحاكمة كانت علنية والكل شافوها..صدقنى مش حيسيبوك ولايرحموك لغاية ماتصدق حكاويهم وأوهامهم اللى فبركوها..الله يلعن الحقد على الغل على الغباء على اللى فبركوا القصة وصدقوها..عاوز تعرف فيه ثورة وللا لأ روح شوف المعاملة فى أى مصلحة وسلم لى على اللى قالوا إنهم غيروها..الثورة لما نتغيًر بجد من جوانا ونبنى بلدنا ونعمل وننتج وتطرح أرض بلادنا خير يكفينا والباقى ىصدروها..الثورة لما نطهر إعلامنا من الأفاقين والمنافقين اللى شوهوا صورة بلادنا ومسخوها..الثورة لما تلاقى نماذج وطنية صادقة بتعَبر عن صوت الناس وقلوب صادقة بيمثلوها..الثورة لما أراجوزات السياسة والإعلام يبطلوا فتاوى وشماتة وقصص وهمية عن بطولات كذبوا وقالوا عملوها..عاوز تتسلى فى رمضان روح وشوف قصة جحا حتلاقيها فى مليون مثال وده نموذج للمليونية اللى ألفوها..رمضان كريم مفيش كلام لكن كرم كبير إنك تشوف وتفهم وتعرف الفرق بين عاوزين يخربوها واللى عاوزين يحموها..روح وشوف بعد التطهير والتنظيف بدل الفوضى والبلطجة اللى فى الميدان زرعوها..روح شوف النظام والإنضباط بدل فتوات الحسينية اللى كل واحد إفتكر نفسه زعيم وقال نكته زى جُحا وقال إيه صدقوها..لو عاوزين تعرفوا هى ثورة وللا فوضى روحوا عالميدان وشوفوا رأى الناس وإسألوها..وتعرف إنه آن الآوان ندافع عن نفسنا من اللى بيخطفوا ثورتنا وبيسرقوها..كفاية زهقنا وطهقنا وحرام أكتر من كده نسكت على اللى شاعوا الفوضى فى البلد وعاوزين يقلبوها..لكن خلينا متفائلين مدام فيه منظومة فى إيديها الأمانة وهى قدها والناس كلهم عارفينها وكل واحد شريف عارف إيه الثورة واللى حاموها..رئيس فى المحاكمة وأولاده كمان ياترى إيه الحجج التانية وناقص إيه تانى علشان تصدقوها..ملعون أبو الغباء على أصحاب الأجندات على اللى فبركوا ثورة جُحا وصدقوها..!! said_elmasryfahmy@hotmail.com