خلطبيطة..!! مضى من الزمن ثمانى شهور والناس ياعينى زى ما هى لسة متلخبطين..هى ثورة وللا فوًرة ولا لحظة تنفيس وحيروح تأثيرها على مر الأيام والسنين..بص للصورة من بعيد وخد نفس عميق وإنسى إنتماءك الحزبى أيًا كان وفكر معانا فى أحوال المصريين..شوف وحاول تفسر إيه اللى حصل وإيه اللى بيحصل وإيه اللى حيحصل بعد بانوراما الأحداث الهلامية والناس مش واخدة بالها وبالهيافات ملهيين..صراعات حزبية وتصاريح عنترية وناس خرجت من القمقم وضوء الشهرة خلاهم ياعينى مدروخين..وإعلام سمك لبن تمر هندى وناس غيَرت جلدها فى لحظة بدون إستحياء وكل كلامهم ومواقفهم السابقة ياعينى كانوا ليها ناسيين..وناس كانت واقفة فى الدور فى إنتظار نظرة رضا من أى نظام سابق أو لاحق قاعدين ياعينى منتظرين..وقنوات جديدة بأشكال غريبة ومقدمين بنص لسان من أنصاف صحفيين..ورؤوس أموال بالهبل وجرائد وقنوات جديدة غريبة مصروف عليها ملايين..وسياحة مضروبة ومصانع مهجورة ومطالب فئوية و تصريحات غير مسئولة من مسئول إخوانجى أو حتى واحد من السلفيين..وعام دراسى جديد وطلبة من غير أساتذة ياعينى تايهيين..مش كفاية الدروس الخصوصية اللى إنتشرت زى النار فى الهشيم حتى لطلاب الإبتدائى قال إيه كمان تلاقى مدرسين مضربين..ناس تقولك أولاد الحرام ما سبوش لأولاد الحلال حاجة حرام دول غلابة ومش كل المدرسين طماعين..تعليم مضروب ومنظومة محتاجة تغيير من أول ألف باء لغاية أكبر واحد فيهم من المسئولين..ومطالب وشعارات ثورية وأطباء مرتباتهم فى الحضيض ياعينى مظلومين..وألتراس بتهين الشرطة وبتحرق فى أملاك الناس وتلاقى فى النيابة ناس بتدافع عن تصرفاتهم ويقولوا ده شباب طاهر برئ وغلابة وطيبين ..وجمعة ورا جمعة بمسميات غريبة وناس على طول عجبهم الميدان وأخدوا عليه والظاهر بيبقوا فيه نفسيا مرتاحين..وجماعة ما شاء الله بقالها مراكز ومبانى ومقرات فى كل حتة بتساوى ملايين..وحزب رسمى بنفس السياسة ونفس الأشخاص بنظام زيد زى عبيد لكن ولاد الإيه متنكرين..تخيل ناس كانت بالسراديب مدفونة رجعت من تانى بقوة بالتهديد والوعيد وعلى قرارات المجلس العسكرى معترضين..نفس السيناريو من ستين سنة وصراع دائم مع كل نظام حكم تلاقيهم فى الأول حبايب وبكرة مختلفين..الكرسى أصل سره باتع وبعيد عن الزهد والإسطوانة المشروخة إياها بتضرب الكرسى فى الكلوب وتزيد البلة طين..وإئتلافات وشباب ماشاء الله بين يوم وليلة بقوا نجوم شباك وضيوف عالفضائيات مشهورين..وناس منهم كتير سابوا التحرير بعد تنفيذ المهمة وراحوا يقسموا الدوائر الإنتخابية بإعتبارهم أصحاب الحق والبلد وعن المجلس مترشحين..مش قالوا لكل زمان دولة ورجال يبقى لازم فيه ناس تستفيد من الجهاد ويكونوا ستاند باى يعنى بالعربى مستعدين ..ومحاكمة لرئيس ورموز نظام والناس متبرجلة ما بين سابق ومخلوع ياعينى حيرانين..ومجموعة أسفين ياريس وأهالى شهداء وإصابات وبهدلة للناس وتشكيك فى المحاكمة وألاعيب محامين..وناس حذفت من مفهومها معنى المحاكمة ومغزاها وركزت بس على حركات المتهمين وإيه لابسين..يا ناس فيه رئيس ورا القضبان وبيقول أفندم وحاضر ونعم بالذمة حد كان يحلم بكده وياترى بعد كده إيه تانى عاوزين..وإعلان دستورى وبلبلة وإجتماعات وإئتلافات وجماعات من كل نوع ولون وناس من غير عقول وناس من الفلول بعد الثورة وفى كل مكان موجودين..ده غير اللى قاعدين للساقطة واللاقطة مفنجلين عينيهم وعلى كل قرار معترضين..صعب يكون وطن محبوس مابين طموح شعب وشلة أيا كان إنتماءها هنا وللا هناك والكل عامل فيها وطنى وبتكلم باسم المصريين..الخلاصة الوضع بقى آخرخلطبيطة والزمن بيجرى بينا ولو ضاع الوطن حنعيش على طول ضايعين..يارب تحفظ المحروسة من مراهقينها وطلاب السُلطة والشهرة فيها واللى عاملين وطنيين..يا ناس عاوزين تعرفوا وصلنا لإيه روحوا وشوفوا تقرير مركز التعبئة والإحصاء وشوفوا إحنا على فين رايحين..عمرك شفت شعب صاحب حضارة وأهرامات وعنده النيل يُحصر أمانيه وثقافته فى قلة قليله من برامج التوك شو أو أصحاب اليفط والشعارات والمنتفعين..ياترى يا هل ترى الناس دى عاوزة إيه مننا وياترى كلنا على فين رايحين..مصر بتتشكل من جديد ولازم تتشكل صح علشان خاطر بكرة وولادنا اللى جايين..صعب وعيب علينا نبنى بلدنا فى نظيرالرضا والقبول من حزب على حِسب وداد قلبى أو حسب مايطلبه زوار الميدان واللى عليه رايحين جايين..ياترى حنفضل فى خلطبيطة على طول وللا الأسمرانى أبو بدلة مدنى حيحسمها ويبقى ساعتها قُضىً الأمر ولا عزاء للسادة المعتصمين..!! said_elmasryfahmy@hotmail.com