طبعا" حضراتكم شايفين الحرب العلنية علي المصريين   واللي وراها  أصحاب  مصالح خاصة وجنسيات حاقدة علي علاقتنا ووجودنا بالكويت  وبإذن الله ما يفعلوه هينقلب عليهم، الرجاء الإهتمام بالآتي في المرحلة القادمة: ( أوصيكم  ونفسي بالآتي وده رأيي شخصي ).  :

1- بلاش الدخول في أي مشاحنات ولا حوارات  مع اي حد ينتج عنها زعل او ضغينة ( الأمور مش ناقصة )

2- شغلك ثم شغلك ثم شغلك ،وروح بعد الشغل إستمتع بحياتك بعد كده ، أهم شئ بلاش ندلع نفسنا ونزود الكرش.

3- النصح  والطبطبة علي إخوانك المصريين والعرب المحترمين  ولنا في الفلبينيين أسوة حسنة من حيث إهتمامهم ببعض. وينصحوا بعض حتي في الإهتمام بمزيل العرق وغسيل الأسنان والرياضة، الأزمة دي خلت الوافدين يطبطبوا علي بعض.

4- أوعي تسمح لنفسك تغلط  في بلدك وسمعتها عشان ترضي حد بعدين هيحتقرك  إنت وبلدك وأهلك اللي ما عرفوا يربوك.  حتي لو غلط هو في بلده ، خلينا نرجع شوية شموخ وكبرياء.

5- شير الحاجات اللي تشرف بلدك وأهل بلدك والنَّاس اللي بيتكلموا كويس علي بلدك لكن اي حد سلبي بيتكلم علينا بسلبية أوعي تشهره، هتلاقي الإيجابيين زادوا عشان الوافدين يشهروهم ويعملوا لهم دعاية. و التجاهل  هيطفئ السلبيات

6- كل حاجة بتعملها  بتمثل  نفسك وأهلك وبلدك، الله يحفظك خلي بالك علي تصرفاتك.

7- بلاش نعاير الناس والشعوب الشقيقة ونفضل نتكلم في الماضي وما قدمه الأجداد،خلينا محسنينن ونبني الحاضر بقي

8- لازم نخفف مصاريفنا علي قد ما نقدر وكل واحد فينا يبقي جاهز للرجوع  في أي وقت وأي  فرصة ونلحق ننزل نزرع في أرضنا  ونبني  لأولادنا بلد حلوة يتشرفوا بيها .

9- إفتكروا الكويت  والكويتيين دائما" بالخير ، لينا معاهم تاريخ مشرف و نسب وأهل و أصحاب و إخوان دنيا،  واللي يغلط فيهم خسيس وما يتمر فيه العيش والملح..

الله الموفق  - وربنا يحفظكم ويحفظ أحبابك