fiogf49gjkf0d
هي ثورة..!!! تعمل إيه لو لقيت نفسك وكأنك نايم وصحيت علي كابوس أو حلمت بمنظر كئيب..وأحداث كتير بتحصل بفعل فاعل وناس بتولع الساحة السياسية وتزيدها لهيب..ناس بتحجج بمحاربة الفساد وعاوزة مجتمع جديد مولود بطريقة الولادة القيصرية أو بالأنابيب..ناس هلامية الشكل واضحة النوايا لابدين في الدرة زي الثعلب والديب..ممكن مايكونوش في الصورة واضحين لكن تقدر تشم ريحتهم وتسمع لخطواتهم همس ودبيب..الناس دي بتسرق أحلامنا وأملنا في حياتنا الجديدة عاوزانا زي زمان نخش ونستخبي في الدواليب..فاكرين السلطة شقة مفروشة والحكم عاوزين يملكوه ويكملوا هم التشطيب..ناس عاوزة تفرض إرادتها علي شعب بحاله وأمانيها تركب الموجة وتفرض أفكارها وإرادة الناس تغيب..وترجع ريما لعادتها القديمة وتحكمنا من تاني أفكار الشللية وترجع البلد من تاني وليمة لكل واحد ليهم حبيب..الناس دي سبحان الله ياأخي بارعين في التكتيكات واستغلال الفرص والعمل في السراديب..بالذمة لو ثورة إتلخصت في كراسي نيابية وطلبات فئوية مش يبقي ده شئ معيب..لكن تقول إيه للي كان في جرة وطلع لبره وكان للتسلط والجاهلية ربيب..لو كنت صاحي وواعي لازم تشم ريحة شياط وبركان هايج وإتجاه عكسى للثورة قريب..ياخسارة تحت بند الديمقراطية والنيو لوك تلاقي الكرسى فقد بريقه وقدراته ولا يبقى عمره محترم ومهيب..!! اللي بيحصل في الساحة الثورية محتاج أكيد لتوضيح وتفسير..إستفتاء ودستور بيبدلوا قشوره وقلبه من جوه زي ما هو من غير تغيير..ومطالب واضحة زي الشمس وأصابع ماسكة الخيط بتحرك الأحداث حسب بوصلتها ببرنامج زمني من غير تأخير..وناس زي حالتنا بتنفخ في قربة مخرومة وداوشين الناس بالصراخ والمأمأة والنعير..تحت بند الديمقراطية إياها خلي اللي يقول يقول وخلي الأفكار زي الدخان في الفضا بتطير..مهما قالوا عن العهد الجديد حتلاقي برضه مجموعة في شكل تاني بقلوب جاحدة وأسنان حادة زي المناشير..الدنيا زحمة والأذناب كثيرة والناس زي ماهي طارت في السما ونزلت من تاني في البير..ياعيني عليك يازمن لما تلاقي زمن بتضيع فيه هيبه المسئول والوزير..صعب تلاقي وطن عظيم أسواره مستباحة قاعد عريان من غير غفير..صعب تغييرالأفكار زي الألوان وأصعب ما نلاقيش فكر وطني صادق أو رأي حكيم قدير..صعب نضحك عالناس بالمسكنات تحت بند الثورة والثوار والفكر الجديد والتغيير..!! مين قال إن التطاول علي البديهيات شئ ثورجي وأنه شئ حضاري وديمقراطى..مين قال إن حالنا يقف وتلاقي أي مسئول يتمحلس لأي صوت عالي ويقعد يبعزق في الوعود علشان يجامل ويراضي..مين قال نسيب ناس بعينها رغم فسادها الواضح من غير محاكمة ونقعد نجعجع ونهاتي..مين اللي من حقه يتكلم باسم الناس وواهم إن الشعب قانع وراضي..مين اللي فرض عالناس دستور مهلهل بأسلوب الترقيع وكلام غير واضح مطاطى..بالذمة مش كل ده بيزرع جوانا شعور باليأس سلبي واحباطي..معقول فيه بلدكبيرة وعظيمة تنسي مكانتها التاريخية الأساسية وتلعب في الإحتياطي..!! بلدنا محتاجة الحكمة وعزيمة المخلصين والناس البسيطة اللي لسه بتئن وبتعاني..بلدنا محتاجة قرارات مصيرية وأفكار جديدة بنوايا واضحة المعاني..علشان ترسي نظام جديد لازم الناس تتثقف وتتغير من جواها بشعارات حقيقية مش كلام أغاني..لازم نتغير كلنا ونشارك في تحقيق الحلم بالعلم والعمل مش بالأماني..لازم نبص قدام وننفض تراب الخلاف وتعصب الأفكار والشعارات البراقة وكاني وماني..صعب نحلم تتغير بلدنا من ميراث عشرات السنين من الفساد في مجرد ثواني..صعب نتحول بين يوم وليلة كدة فجأه من عبادة أفكار أصنام صنعناها بإيدينا للفكر الإنساني الرباني..!! اللي بيحصل من متناقضات عالساحة بيؤكد إن دم شهدائنا إتسرق..والفوضي الغير مسئولة في القرارات خلتنا نشعر إننا لخصنا ثورتنا في شعارات من ورق..خلاص سبنا الميدان ونسينا لحظة الإنصهار بيننا ونشفنا من علي وشوشنا العرق..ولخصنا الفساد في شوية محاكمات أو تغيير إسم جهاز وشوية أوراق إدانة أو ملف إتحرق..خلاص مادامت فيه جهات مستفيدة مش مهم الناس تفضل عايشة في قلق..المهم تحقيق المراد والأحلام إياها أما عن المواطن البسيط مش مهم إن إندعق أو إتفلق..سرسوب الفوضي شايف ملامحه فاض علي سطح الإرادة وعلي الأرض إندلق..الله يستر علي بلد كان فيها الحكم بطئ علي اللي فسد ونهب وسرق..!! الناس جعانة حرية والملعب مليان بكل أنواع المتناقضات..واللعيبة المحترفين قاعدين بيتقاسموا التورتة وبيخططوا إزاى يلهفوا الصفقات..والهواه والمحدثين سلطة والمتلونين بيرقصوا من غير مايدرواعلي كل الألحان والنغمات..والعالم حوالينا متربص وكتير مستني غلطة لينا وجاهز بالقرارات..وهيبتنا بقت علي المحك والصورة النهائية حواليها الشبهات..حرام حلم الثورة والتغيير ينتهي في الأخر إن الثورة نجحت بس الشعب مات..!! لازم نستوعب نفسنا كلنا ونبدأ من جديد..لازم تتلاقي الأفكار ونتواصل من وسيط ولا ساعي بريد..لازم نغربل الفساد والمفسدين واللي يمد إيده لينا نحتويه ونضمه لمنظومة التحديث والتجديد..لازم نطهر الجرح اللي حصل في حياتنا ونزيل وشم الفساد الممزوج بالصديد..البلد بتاعتنا كلنا ولازم نتكاتف ونصفي نفوسنا ونزيل بيننا الجليد..الشعب يريد دوام الإستقرار ويعيش ويبقي سعيد..خلاص مفيش ظلم تاني ولا تصنيف للإنتماء ولا فرق بين زيد وعبيد..!! بلاش تزيد الفوضي ولازم الناس تحس بشعور الأمان..البديل المميت هو إحساس الناس بالحنين لأيام القهر والأمان..لازم نعمل حسابنا ونحاسب من برامج غسيل المخ والزن على الودان..ولازم نبحلق عينينا ونذاكر الأفكار الجديدة وألاعيب بقايا الوطنى وصيحات الناصريين والوفديين وأجندة الإخوان..ياتري عرفت سر العنوان هي ثورة وللا هي فوضى وللا نعيد ونزيد كمان..لو مافهمتش روح وعاشر أفكارك بس ماتنساس من فضلك تستعمل حبوب الأمان..أو خليك زي ما إنت مواطن مدمن مشى جنب الحيط سلبي ندل وجبان..!! said_elmasryfahmy@hotmail.com