ورقة توت ...!!! فيه حاجات في حياتنا لازم نؤمن بيها بالفطرة وتكون بديهية ..حاجات محسوسة وملموسة وكمان صادقة وحقيقية..وكمان فيه ثوابت وملامحها واضحة علينا وبتبصم علي أيامنا بإنجازات فعلية..ولو الشك أصابنا في إنتماء أي حد أو أي حزب أو جماعة مستحيل نشك ولو لحظة في إخلاص وإنتماء قواتنا المسلحة المصرية..الجيش المصري صمام الأمان والجدار الواقي والحامي لكل مكاسب حياتنا بكل الإيثار والفدائية..رجال عاهدوا الله والوطن بالإخلاص والبعد عن أي مصالح أو تحقيق أجندة شخصية..رجال بذلوا الدم والحياه وإحنا قاعدين نبلبط في الأمن والأمان محروسين من أي مخاطر خارجية..منظومة منظمة بترتيب وانضباط مدروس غير قابل للفوضى أو الهمبكة والعشوائية..رجال عاهدوا الله على حماية الوطن والمواطن بالروح والدماء الذكية..خير جند الله في الأرض زي ماوصفهم صاحب القول الحق " محمد " رسول الإنسانية..عاوز تعرف مين قواتنا المسلحة روح وراجع كتب الأساطير التاريخية..عاوز تعرف مين جيش مصر إسال هناك عن مراجع وملاحم البطولة والفداء في الأكاديميات المتخصصة العسكرية..تاريخ باهر من الإنجازات من أيام مينا ورمسيس مرورا بقهر المغول والعصابات التتارية..ومن أيام محمد علي وإنتصاراته وصولا للإنتفاضة العرابية..الجيش المصري اللي قام وثار وغيًر التاريخ ورغم السلبيات والتحفظات قدر يكون قدوة ومصدر إلهام للشعوب العربية والإفريقية..بإختصار الجيش ده هو اللي كتب تاريخ لمصر وحرر أرضها في أكتوبر وأعاد للعرب شموخهم وذاكرتهم الحضارية..!! جنودنا البواسل هم اللي من أول لحظة وبدون تردد إتخذوا القرار..وراحوا على الميدان وإلتحموا بالجماهير وساعدوهم في تحقيق الإنتصار..جنودنا اللي بيشكك في أدائهم بعض المتفذلكين هم اللي غيروا البلد في يوم وليلة وطهروها من الفاسدين الأشرار..إن كان اللي حصل في بلدنا بيسموه ثورة يبقي أكيد هم أول جحافل الثوار..قرارهم حازم وصارم وصادق من غير صفقات وسفسطة وحوار..الجيش ده هو اللي حرر ترابنا وهو اللي إختار الوقوف مع الشعب لما حانت ساعة الإختيار..وبصدر رحب وأداء رصين عاقل إستوعب جميع الأطياف والمذاهب السياسية والدينية بحكمة وإقتدار..معقول بعد ده كله يصوصو كتكوت في مظاهرة أو يخرج علينا من الجحر فار..ويشكك في أداء مجلس عسكرى إفتدي البلد ووقف بعزيمة وهمة وسط النار..جيشنا القدير للأسف مالهوش في صفقات الليل وشغل التلات ورقات وأجندته واضحة زي الشمس وسط النهار..غير مسموح للهلافيت يطنططوا علي حُماه الوطن تحت بند المظاهرات ومقالات خايبة أو كلمة نقد مدسوسة في شكل شعار..الجيش ده هو اللي حمي الشعب وقت الأزمات لما أسود الميكروفونات هربوا من الميدان ساعة الجد وقالوا يافرار..هو اللي حمي البلد من فراغ أمني خطير وحافظ علي الدار والدوار..لكن التاريخ علمنا إن أصحاب الرسالات لازم يواجهوا الجهلة ومدمني الفوضى واللي بيعشقوا الإنتظار..إنتظار الهمجية وتنفيذ الأجندات الخاصة واللي بيقسموا البلد بين ماضي وحاضر أو مؤمنين وكفار..ياتري يا هل تري إيه نهاية الحكاية ومين من مصلحته يشكك في مصداقية المنظومة الصادقة في حياتنا ويولع في البلد نار..إنكار دور جيشنا في بناء بلدنا الجديدة شئ غير مقبول وإهانة لينا كلنا وعار..ياعيني عليك ياوطن لما يزايد عليك كل صاحب قلم أجوف أو صوت عالي أو حزب مفروش باليومية في الميدان ثورجي وأخر الليل للوطن سمسار..!! جنود مصر البواسل هم خط الدفاع الأخير وورقة التوت التي بتسترنا كلنا..التشكيك في أداء المجلس العسكري شئ مثير للريبة والغثيان ومؤامرة بتهدد أمننا..مين قال نساوى بين أصحاب أجندات ومصالح عاوزة تنهش فينا بأفكارها ومنظومة منضبطة زي الساعة حررت ترابنا ووحدت أرضنا..مين قال إن بلدنا كان مستخبي فيها كل ده وإزاي ببساطة كده ننهش في بعضنا..فيه ريحة شياط واضحة وضباب بيكعبل خطاوينا وإنفلات أمني مريب وكلاب سعرانة عاوزة تنهش لحمنا..لو ضاعت المرجعية في بلدنا مفيش حد حيسلم من الأذى مننا..قواتنا المسلحة هي المرجعية الواضحة لينا وهي الملاذ الآمن اللي حيحمي شرعيتنا ويحمينا كلنا..!! لازم نقر ونعترف إن ديمقراطيتنا لسة حديثة مش زي ديمقراطية الأوروبيين ولا الأمريكان..ولا ممارستنا للحرية رصينة ولا عندنا ثقافة الإختلاف ورصيدنا ضعيف في حقوق الإنسان..بلدنا دلوقتي تربة خصبة وأرضية مناسبة لدود الأرض يقرض خيرها ومَرعي طيب للفيران..وغابة مليانة وطاويط عاوزة تمص في دمنا متوحشة وعنيفة زي الغيلان..وناس أصحاب أجندة خاصة عاوزانا نرجع للكهوف زي أيام زمان..وناس عاوزاها سلفية تحكم بالحديد والسيف وناس بتميل لحكم الإخوان..وأحزاب مالهاش طعم زي أكل الرجيم وعاملة زي خيال المآته كبرت ماشاء الله وطلع ليها أسنان..وأمن ضايع وبلطجة مدروسة ومحسوسة والناس خايفة ورغم زوال العادلي حاسة وكأنها عايشة ومحبوسة في ليمان..وشعارات بتنادي برحيل المجلس العسكري وبيانات بتطالب بهدم الأضرحة وعقاب المتبرجات من النسوان..وحدود ربنا يعلم بيها ويستر علينا من الشرط الجزائي للمعاهدات وغدر الجيران..ونيل عاوزين يحبسوه عننا ويعطشونا ويحرمونا من الأمان..ومطالب فئوية ومظاهرات طلابية وعُشرميت جماعة إئتلاف بتتحكم في الميدان..ومحليات فاسدة ورموز أفسدت حياتنا موجودة بره الزنازين مستنيها السجان..تخيل لو الساحة كدة من غير مرجعية مين اللي حيحمينا من كل دول ومين اللي حيحافظ على الناس جوه الأوطان..!! بإختصارلازم نقر ونعترف ونثق إن قواتنا المسلحة هي المرجعية واللي بتستر العورات دي كلها زى ورقة التوت..لو همشنا مرجعيتنا وشوهناها حنندم ولازم نفهم إن العبرة بالإنجازات مش بالجعجعة والصوت..حرام روح الثورة تتحول لشعارات تحكم عالوطن بالموت..معقولة يحصل لينا كل ده علشان فرخة وديك كانوا عاوزين يورثونا للبيه الكتكوت..نعمل إيه لازم نستحمل قدرنا كده وأهي ثورة وتفوت..!! said_elmasryfahmy@hotmail.com