كاميليا وأخواتها..!! يا ألف خسارة.. وكأن الفرحة كانت كتيرة علينا وخدها الغراب من قلوبنا وطار..كدة عيني عينك فوضى ورصاص وقنابل ودم وضرب نار..ومسلمين ومسيحيين بيهبشوا في بعض ومهما كان السبب ضاع الحياء بينهم قدام العالم وفي عز النهار..حرب مشحونة جهالة وخناسة ومدسوسة فينا من زمان وسايبينها زي الشطار..مش عارف لغاية إمتى حنعيش زي النعام راسنا في الرمل قاعدين بنتفرج علي المهازل وللكارثة عايشين في إنتظار..سايبين الفتنة تكبر وتزيد ومشاكلنا نحلها ببوس الخد وجلسة عرب وغدوة فتة بالخل والتوم وخروف مشوي عالنار..الموضوع زاد عن حده ومفيش حل جذري ولا فيه محاولة فك ألغاز أو حتى أسرار..ياترى إيه اللي خلانا كدة ومين زمرة التعصب دول أصحاب عهود الظلام الهَمج الفُجار..مين اللي بيصنف الناس حسب دينهم ومذهبهم ويقسمهم بمزاجه مؤمنين وكفار..مين اللي عاوز يحرق الوطن بنار الفتنة ويهدم المعبد على الكل ويهد الدار..مين اللي عاوز يفزع الناس ويسرق أمنهم ويخلي الكل قلقان خايف مرعوب محتار..مين اللي عايزنا نعيش في ذل الفتنة بعد ما إتحدنا في التحرير وكان الكل نموذج للثوار الأحرار..مين اللي بيمص في إستقرار أمن بلدنا زي دراكولا مشتاق يشوفنا متكعبلين في الخراب والكراهية والدمار..الخلاصة إن الحل عارفينه لكن محتاجين يد من حديد من غير تأخير وإلا بقينا للفوضي عنوان ومزار..الشعب يريد وحدته الطائفية الشعب محتاج بعد هوجة الكراهية للإستقرار..!! التهاون اللي في الأسكندرية وقنا ورمسيس وإمبابة أمر مرفوض ومحتاج حزم وحل..وتأجيل حسم الأسباب ونزع فتيل الأزمات خلى حياتنا زي السلطة من غير خل..صعب مواطن أيا كانت ديانته يعيش في وطنه مهموم بالطائفية ومن قوانين الديابة بينذَل..رابط مصيره بتصريح من هنا وهناك لشيخ أو قسيس وتولع الدنيا بعدها ويقولوا معلش أصل لسانه زَل..ياترى مين اللي خلى دم ولادنا يسيل في إمبابة من مسلمين ومسيحيين وزاد الكراهية بينهم وخلى الخراب علينا طَل..كنا دم واحد ونسيج واحد وفي التحرير رسمنا أجمل صورة للوحدة من غير حقد وغل..شوف المستفيد مين وعالج الأسباب من جذورها قبل الأمور ماتضيع من إيدينا وخلايا الوطن تتحلل وقوامه بخلافنا ينحل..الطائفية حصان طروادة ومتنفس للمكبوتين والعنصريين والباحثين عن الأضواء بين الخراب والطل..لازم نجيب الديب من ديله وننزع أنيابه وسمومه لازم نلاقي حل..!! فيه مظاهر عجيبة غريبة بتحصل قدامنا وإحنا قاعدين محتارين..شايفين ناس بتعلن الوصاية علي شعب بحاله وداخلية الحكومة بتتفرج زينا ومبسوطين..ومساجد بتتغير شيوخها قدام عينينا علشان منهجهم مخالف لمنهج ولاد اللذين..وكنائس بيحوطوها ناس عاوزة تتطبق قانونها الخاص رغم وجود الحكومة ومفيش غير قانونهم اللي بيه مقتنعين..وحكومة بتبعت المشايخ علشان يحلو المشاكل في قنا وأطفيح وأزمة ضريح الحسين..وعشنا وشفنا متهم بقتل رئيس معزوم من محافظ ورايح في موكب مهيب وكأنه من الغزاه المنتصرين..هو مين بقى مع مين والمشاهد اللي بتحصل دي من إمتى وكام وفين..هو أحنا بقينا ملطشة لكل من هب ودب وسلمنا خلاص أمرنا لكل واحد بدقن أو بيتكلم في الدين..هو خلاص فيه ناس أباحت دمنا وعرضنا لكل واحد صوته عالي من المتعصبين..خلاص بقوا شيوخنا أبو زيد وعبيد ونطاط الحيط وإبن الذين..وفضائيات بنفس الأشخاص ونفس الأسماء مع تغيير المبادئ والعناوين..بيشعللوها ويولعوها ويخربوها وهم لا فاهمين ولا عارفين..ياترى شباب الفيس بوك واللي كونوا جروب كلنا خالد سعيد طب فين جروب كلنا مصريين..!!