fiogf49gjkf0d
حوار الطرشان..!!! نظرا لأننا في حالة هياج ثوري وبقينا ماشاء الله كلنا ثوار..يبقى كان لازم نخرج من حالة الكبت اللي عشنا فيها ونحاول من تاني نبني الدار..ومدام العملية فيها بناء والذي منه يبقى الموضوع محتاج عراب أو سمسار..وكمان صوت جهوري عالفيس بوك علي شوية شوشرة وإشاعات قال يعني أسرار..زائد شويه إعتراضات وكرسى في الكلوب لمجرد إثبات الحضور مادامت الوطنية بقت في المزاد والكل بقى تجار..الوطن ياعيني هايص ولايص مش عارف يروح وييجي منين وولاده الكل واقف بيفكر في نفسه بس وقاعد متربص وزنهار..خلاص اللعب بقى عالمكشوف كدة وعلى عينك ياتاجر وكله في المزاد وفي عز النهار..سبحان الله ناس بقى ليها زئير بعد ماكانت مدفونة في الجُحر ومكنونة زي الفار..وناس لبست ثوب العفة والشرف قال يعني ثورجية وأبطال وأحرار..وناس لا ليها في الطور ولا في الطحين وكأنهم من كوكب تاني خالص بينادوا بسرعة محاكمة النظام وبحجة الأمن والإستقرار..وناس بنيولوك قلعوا الجلاليب ولبسوا عالموضة ووهموا الناس يا إما هُم يا إما ضياع البلد والحرق بالنار..وناس بتفرض صوتها وسطوتها بإعتبارهم أصحاب البلد الجدد والخارجين من رحم مدام تحرير بعد ياعيني طول إنتظار..والله الواحد خلاص مخه بقى زي البلوظة وفكره خلاص شت وإحتار..معقول نرجع من تاني لنفس البلبلة ونفس الوجوه والأفكار..معقول نلاقي نفس التكتيك والحركات وقيادات من الستينات ولجان جوًه لجان تحت مسمى حوار..ونلاقى حوار مليان هرج ومرج وإعتراض على أشخاص بعينها بإعتبارهم من أعضاء الحزب البائد اللي إتلونوا زي الشطار..وناس قاطعت المؤتمر بحجة إنه إلتفاف على نتيجة الإستفتاء الدستوري ونكسة ووكسة وخيبة بالقنطار..كل ده لخصوه في مؤتمرات ولجان وإجتماعات وكله تحت بند النقاش والحوار..رغم إن الوقت بيداهمنا ويفرمنا وبيقطع فينا زي المنشار..ورغم إن الوطن قاعد بينزف من غير تعويض ولا إنتاج ولاعدنا عارفين الليل من النهار..رغم إن الكل قاعد من غير مايدري يدق في نعش مستقبل ثورتنا مسمار..حنقعد ونتفرج ونطبل ونزمر وحنحاول كمان نشارك في الحوار..أكيد ده من حقنا كلنا مدام كلنا بقينا ثورجية وديمقراطيين وأحرار..ومدام الثورة حصلت في بلدنا والحسنة بتعُم يبقى أكيد كلنا نبقى ثوار..لكن السؤال ياترى الوطن حيفضل يعاني من كل العبث ده وياترى لإمتى حنفضل نعيش في قلق وخوف وإنتظار..رغم إن الكل عارف إن السُلطة زي السَلطة ولازم يكون فيها بصل وقوطة وخيار..ومش مهم أي حزب عايز إيه المهم إن الشعب بكل إرادته وبصدق يختار..عمرك شفت حد يحط العربية قبل الحمار..!! علشان كدة لازم نقول إن حوار الوفاق وأساليب النفاق بين المتناقضات هو حوار الطرشان..كل واحد عاوز يفرض رأيه وأسلوبه مع شو إعلامي ودعاية بالمجان..ناس رافضة الحوار وخايفة الدستور يعملوه من غير وصايتها ويرجعوا تاني في خبر كان..وصورتهم بيحاولوا يجملوها وبيتعاملوا مع باقي الأطراف ببسمة وتحية وحنان..عمرك شفت ديب بيعرف يخبي أنيابه وللا إحنا خلاص بقينا خرفان..إن كنت نسيت اللي جرى هات الدفاتر وإرجع بينا من تاني لأيام زمان..ياعالم إرحمونا بقي تعبنا كفاية علينا كدة الشعب يريد الأمان..التفريط والتهاون وترك الساحة لأي منظومة مهما كانت أهدافها وطالبة وعاشقة سُلطة أكيد جنان في جنان..اللي يتنازل عن حريته بعد التحرير ويسلم دقنه ورأسه لأصحاب الوصايا إياهم واهم وسلبي وجبان..الشعب يريد كشف الألاعيب والنوايا الشعب عاوز يلاقي كل مصري صاحب قرار ومكانة ومكان..!! والغريبة بتلاقي ناس حاملة لواء الحماسة وإحتكروا كل مبادئ الثوار والثورجية..والكل راح ونسب نفسه للتحرير وافتكر نفسه حامي حمي الثورة والمتحدث الرسمي باسم القاعدة الجماهيرية..وراحوا وكونوا إئتلافات وجماعات وحركات وإدعوا أنهم أصحاب الفضل في حصولنا علي الكرامة والحرية..وراحوا يفرضوا عالناس طريقتهم وأسلوبهم في الديمقراطية..وأول درس كان مهاجمة وحرمان جماعة محسوبين علي النظام القديم بالقصد والنية ..خلاص بقي ممنوع الكلام لأي حد ولانقاش أو حوار إلا بموافقة الثورجية..85 مليون مصري خلاص لخصوهم في شعارات ويفط وجروبات عالفيس بوك ودعايا وبرامج حوارية..ومناوشات ومقاطعات وإعتراضات من كل مجموعة وإتهامها للأخرى بعدم المسئولية..بالذمة هو ده الحوار وهي دى ثمرة ثورة الشعب الفتية..مين قال إن اللي هاجموا الناس في التحرير هم بس البلطجية..ياريتك بس تكون فكرت معايا وعرفت يعني إيه حوار ويعني إيه مصالح ويعني إيه قضية..سيبك إنت وخليك في حوار الطرشان والمتناقضات والمعاشات وسيب الدنيا زي ماهي..خليهم يتسلوا قالها اللي فات والظاهر هي دى النظرية..الأمور محسومة ياناس من زمان لأنه ببساطة فيه هناك اللي فهم وحسم القضية..حوار أو رهان أو قمار الجوكر خلاص ركب الحصان وطار وأنا خالي المسئولية..خليهم يتسلوا وصدقوني لن يصح إلا الصحيح حتى روحوا وإسألوا بهية..جرس الفسحة خلاص ضرب وإنتهت الحوارات والشعب خلاص حكم وإنتهت القضية..!! said_elmasryfahmy@hotmail.com