قاموس محو الأمية للمفردات الثورية..!! يعني إيه ثورة ..ويعني إيه ثوار..؟؟ ثورة يعني شعب إنبعث من جديد وإبتدا من تاني المشوار.. ثوار يعني سلالة جديدة من الأحرار..يعني نور في آخر الطريق بيعلن عن بداية نهار.. ثواريعني جيل جديد قام وانتفض من وسط شعب إتحد وإمتزج مع جيش وطني جبار.. ثوار يعني ينابيع من نهر دم شهداء قامت تروي أرض مصر وبيها طلعت أزهار.. ثوار يعني شعب قام شبابه وشُيابه بتغيير ليل هوان اليأس وزرع ثقافة الإنتصار.. ثوار يعني ناس بتقود شعب وتاخد بإيديه يمحي عار الذل ويسمو بروح الإفتخار.. يعني إيه ئورة .. وإزاي نحس الفساد..؟؟ لما تلاقي الهم طابق عالنفوس والقهر مرسوم علي وشوش العباد.. لما تلاقي الناس مش طايقة بعضها وضاع بينهم التسامح واختفي الوداد.. لما تلاقي اليأس والخوف بقي ثقافة أساسية جوانا شباب وشياب وبنات وولاد.. لما تلاقي الحارس لأمنك بيبطش بيك وبيرهبك وحاطط إيده دايما عالزناد.. لما تلاقي مسئولين ومحتكرين مصوا دمك وإتجبروا وفجروا زي قوم عاد.. لما تلاقي الوطن هان والمواطن بقى من غير سعر وتضيع هيبه البلاد.. لما تلاقي الحلقة مفقودة بين مطالب شعب وحكومة قمة العناد.. لما تلاقي الحرامي بيسرق كدة عيني عينك من غير عقاب يبقي هو دة الفساد.. يعني إيه ثورة..وإمتي المواطن يخاف..؟؟ تخاف لما تلاقي الناس بتموت في طابور العيش مش لاقية الرغيف الحاف.. تخاف لما خير بلدك يجف ويتسرسب كل شئ في النفس حتى العفاف.. تخاف لما تلاقي إعلام وفن وصحافة متباعة ومليانة إسفاف.. تخاف لما تلاقي الفساد مقنن والمسئول عامل أطرش وأعمي ولا كأنه شاف.. تخاف لما تشوف الحرامي قاعد ومتحلفط في أول الصفوف وعامل من الأشراف.. تخاف لما تشوف السلطة بتدوس عالناس وتسوقهم علي الذبح زي الخراف.. تخاف لما يصيبك اليأس وتحس بليلك طويل وبحر وطنك من غير ضفاف.. تخاف لما يتنهش قوتك وغيطك ويمصمص فيه الديابة ببرود واستخفاف.. تخاف لما تلاقي الحصول علي لقمة العيش هي المنتهي ونهاية الحلم والمطاف.. وقتها لازم تقوم ثورة..وقتها لازم تخاف..!! يعني إيه ثورة..وإزاي وإمتي تشعر بتغيير النظام..؟؟ لما الشعب كله ينتفض بكل الطوائف ويتحد ويبص بمستقبله للأمام.. لما نبتدي العمل ونبتكر ونفكر في مستقبل ولادنا ونبطل كلام.. لما ننسي السفسطة والجدال وننهض من جديد ونقوم نبني بلدنا من جديد قوام.. لما نتعامل مابيننا بحنان وعطف ورقي ونتسامح مع أنفسنا بأخلاق الكرام.. لما نعرف حقنا فين ولو حد لهط حقوقنا نقوم ونزأر زي أسد ضرغام.. لما أقول رأيي بصراحة في كل حاجة تخصني حتي معاهدات السلام.. لما يكون المسئول عادل ويتمسك الحرامي والناس تقدر في أمان تنام.. لما أقدر أختار الحاكم والنائب والعمدة من غير تزوير ولا بلطجة وإجرام.. لما أحس بالمسئولين إيديهم عفيفة ولا بينهبوا خير بلدنا ولا يحللوا الحرام..!! يعني إيه ثورة..ومين اللي زرع وإمتي حنحصد المحصول..؟؟ اللي زرع الثورة فينا هو كل واحد كان علينا مسئول.. اللي زرع الثورة فينا هو كل واحد قهر إرادتنا ونهش فينا زي الغول.. اللي زرع الثورة فينا كل واحد إستهان بالمواطن البسيط وكان عنه مشغول.. اللي زرع الثورة فينا كل واحد كان تايه عننا وبمشاكلنا مسكين متوول مسطول.. وحنحصد المحصول لما يكون حق المواطن وآدميته في جميع المواثيق مشمول.. وحنحصد المحصول لما نلاقي مبادئ الحرية والعدالة في بلدنا بتصول وتجول.. وحنحصد المحصول لما كل مواطن يحافظ علي مكاسبه وعنها ياقاتل يامقتول.. وحنحصد المحصول لما نكتب عن كل حاجة في النور ونحفظها في الكشكول..!! يعني إيه ثورة..وإمتي يسرقوها ويقتلوا الغفير..؟؟ الثورة حيسرقوها لما الكل يعمل فيها زعيم وقائد ثورة وكبير.. الثورة حيسرقوها لو إتلمت عليها الديابة اللي قلوبها مليانة شوك ولابسة من برة حرير.. الثورة حيسرقوها لو كان عنوانها كل عبده مشتاق لكرسي النائب والوزير.. الثورة حيسرقوها لو ناس إفتكرت إنها أصحابها وباقي الناس هتيفة وطراطير.. الثورة حيسرقوها لو حاكموا الفاسدين علي قضايا هامشية وسابوا الكوارث في البير.. الثورة حيسرقوها لو دم الشهداء راح ببلاش ولا حد سدد الثمن ولا دفع فواتير.. الثورة حيسرقوها لو طعم الحرية راح من حلوقنا ولذاذة النصر بقي علقم ومرير.. الثورة حيسرقوها لو إكتشفنا فجأه إنها زي هوجة عرابي أو زي فزعة أنفلونزا الخنازير..!! يعني إيه ثورة..وإيه مطالب الناس بالتحديد..!! الناس عاوزة تعيش في النور وتبدأ حياتها من جديد.. الناس عاوزة العدل والحرية ومجتمع سواسية من غير سادة وعبيد.. الناس عاوزة البسمة المصرية ترجع من جديد والشعب يبقي فرحان وسعيد.. الناس عاوزة يسود الود بين الحاكم والمحكوم ومسئول له عنوان وصندوق بريد.. الناس عاوزة مطالبها توصل للمسئول من غير سمسار وتزول جبال الجليد.. هي دى الثورة وهم دول الثوار وهو ده التجديد وهي دي مطالب الناس بالتحديد..!! هو ده قاموس الثورة عند الناس البسيطة الغلابة..لو فهمناها ربنا أكيد حيحمينا مش شر المتربصين والديابة..ولو مافهمناش يبقي أشرف لينا ننسى القضية ونروح نغني مع شعبولا ونرقص درابوكا ونغني عالربابة..أو ننصب شاشة في التحرير ونسهر مع مسرحية الموسم وكل موسم دول عصابة يابا..!! Said_elmasryfahmy@hotmail.com