دمياط – محمد عبده:
دعا ناشطون في محافظة دمياط إلى مقاطعة مصيف مدينة رأس البر بسبب غلاء الأسعار وعدم وجود الرقابة الكافية، الأمر الذي أدى إلى جشع التجار واستغلالهم الموسم، على حد وصف المحتجين الذين طالب بعضهم الدكتور إسماعيل عبد الحميد طه، محافظ دمياط بالتدخل لحسم المشكلة، لاسيما أن أصحاب المطاعم والمحال التجارية و"الكافيتريات" يتحججون بارتفاع أسعار الإيجارات.
في البداية، يقول شريف محمود، مهندس، "المصيف بتحكمه الفوضى والاستغلال، الحمامات العمومية بتلاتة جنيه على الرغم من عدم نضافتها ولو مفيش معاك فلوس مش هتدخل، أمال فين الحمامات المجانية، أصبح مفيش، مش كدة وبس ده سعر الحاجة الساقعة على أي كافتيريا على البحر أو شارع النيل مش أقل من 15 جنيه وفيه بعض الكافتيريات بتفرض رسوم 100 جنيه للدخول فقط، الكرسي على البحر من غير أي مشروبات بعشرين جنيه والشمسية بـ 100 جنيه ومن غير فصال، عيلة صغيرة تدفع في اليوم 500 جنيه.. يرضي مين".
ويؤكد محمد حمود، عضو لجنة شباب المتطوعين بديوان عام المحافظة، أن أصحاب المحال التجارية والمطاعم يستغلون المواطنين وخصوصًا في الصيف لأنه لا توجد رقابة، مضيفًا "مفيش حد يحاسبهم والمحافظ تدخل أكتر من مرة ووجه بوجود حملات، تنزل المرافق وخمس دقايق وخلاص واللي بيدفع التمن المواطنين الغلابة لأنهم ميقدروش يخرجوا برة دمياط، واللي دلوقتي أصبحوا مش قادرين حتى على دفع إيجار يوم واحد في شقة فيها، الإيجارات وصلت لـ 200 جنيه في اليوم ولو قريبة من البحر بـ 600 جنيه، وطبعًا ده خطر كبير على السياحة لأن بدون مبالغة شرم الشيخ ومرسى مطروح أرخص مننا".
وطالبت فادية عبد النبي، صاحبة محل تجاري، المحافظ بالتدخل وحسم أزمة ارتفاع الأسعار، وقالت "عندي محل لبيع الملابس في دمياط، لكن لما بنزل رأس البر بكتشف إن الأسعار تضاعفت خمس مرات، دخلنا كافتيريا نشرب شاي لمدة نص ساعة، لقينا الأسعار آخر سياحة، ولما عملنا مشكلة صاحبها قالنا الإيجارات غالية واحنا في موسم ولو مش عاجبكم روحوا اشتكونا".
من جانبه، قال اللواء محسن عزيز رئيس مجلس مدينة رأس البر، إن مسئولي القطاعات المختلفة يواصلون جهودهم من أجل توفير المواد الاستهلاكية في كافة المنافذ بالمصيف إلى جانب الحملات التي تشنها قوات الأمن لرفع الإشغالات والتي كان آخرها الثلاثاء الماضي، نافيًا أن يكون المجلس السبب في رفع الأسعار في بعض المحال والمطاعم، كما تعهد بتشديد الرقابة خلال الأيام القليلة المقبلة على الكافتيريات.
وأضاف عزيز، "نبذل قصارى جهدنا بشكل يومي حتى نصل إلى ما نأمله من إنجازات ونوفر الأمن والأمان جنبًا إلى جانب مع الخدمات المتكاملة للمواطنين".