يقول احدى الشباب على صفحته الشخصية على "الفيس بوك "يمكن ناس كتير متعرفش عني المعلومة دي زمان وأنا في تانية كلية كان وزني 110 كيلوجرام وجت لحظة قررت أني لازم أخس وأغير حياتي وفي خلال 3 شهور بقا وزني 68 كيلو وكانت أجمل تجربة في حياتي كلها.. وهقولكم ببساطة إزاي أي حد يعمل الموضوع ده :
.
قاعدة رقم 1 ودي مهمة أوي
- مش كل ربع ساعة تروح توزن نفسك وتشوف أنت خسيت قد أيه ولا زيدت قد أيه الوزن بيكون في يوم ثابت كل أسبوع.
.
قاعدة رقم 2
- مفيش دايت من غير رياضة ومفيش رياضة من غير دايت.
.
قاعدة رقم 3
- مش معنى أنك هتعمل دايت أنك هتموت نفسك من الجوع لأ طبعا هتبطل بس تاكل الحلويات بكل أنواعها والبيبسي والسكر والدهون والسمين وتقلل من الرز والمكرونة لأقل حاجة تقدر عليها .
.
قاعدة رقم 4
- لازم تشرب مية كتير على الأقل من 2.5 لتر ل 3 لتر في اليوم يعني 8 كوبايات مية مليانين على عينهم.
.
قاعدة رقم 5
- ليك 5 وجبات في اليوم تاكلهم (فطار - فاكهة - غدا - فاكهة - عشاء).
.
قاعدة رقم 6
- الفاكهة حلوة بس في الوجبة بتاعتها تاكل ثمرة واحدة أو أتنين بالكتير .. وممكن تاكل واحدة ولو جعت بعد كدة تاكل واحدة تانية.. والأسطورة بتقول أن الموز من أفضل الأنواع ^^
.
قاعدة رقم 7
- الفطار ممكن يبقا رغيف عيش أسمر وحتة جبنة وطبق سلطة.. وممكن بدل الجبنة فول بس يفضل يكون بزيت الزيتون .. وممكن يبقا أي حاجة تخطر على بالك بنفس الكمية تقريبا بس كل لما تبعد عن الزيوت والدهون كل ما هتاخد نتائج أحسن وأسرع للدايت ^^
.
قاعدة رقم 8
- الغدا طبق رز صغير - ورك فرخة مسلوقة أو مشوية - خضار - طبق سلطة .. أو أي حاجة في نفس الكميات لو مكرونة 6 معالق .. بس بالمعلقة العادية متجيش تقول 6 معالق تروح جايب الكبشة وتغرف بيها.. ولو مش عايز رز أو مكرونة ممكن تاخد رغيف عيش واحد مكانهم.
.
قاعدة رقم 9
- العشاء نص رغيف عيش وحتة جبنة وخيارة .. أو ما يعادلهم في الكمية .. بس خد بالك في هنا أسطورة مهمة بتقول أنك لازم العشا يكون قبل ما تنام ب 3 ساعات على الأقل.
.
قاعدة رقم 10
- الرياضة مهمة جدا ومستويات كل لما تزود الرياضة كل ما النتائج تكون أحسن بس طلاما مش بتيجي على صحتك وبتتعب من كترها.
.
قاعدة رقم 11
- أقل حاجة في مستويات الرياضة أنك تمشي ساعة كل يوم .
.
قاعدة رقم 12
- أكتر تمرين يفيدك في سرعة تنزيل الوزن .. الجري .
.
قاعدة رقم 13
- أكتر تمارين تفيدك في سرعة تنزيل الوزن واكتساب قوام متناسق تمارين "الكارديو".
.
قاعدة رقم 14
- أنا كنت تقريبا بمشي كل يوم ساعة و بجري 3 مرات في الأسبوع تلت ساعة وبروح الجيم 6 أيام في الأسبوع.
.
قاعدة رقم 15
- أهم حاجة المية لازم تشرب مية كتير .
.
قاعدة رقم 16
- ليك معلقتين سكر بس في اليوم، تشربهم في مشروب واحد تقسمهم دي حاجة ترجعلك.. والأسطورة بتقول أن ممكن تستخدم السكر الدايت براحتك.
.
قاعدة رقم 17
- الشاي الأخضر بيحرق الدهون فعلا خصوصا Ahmed Tea London ممتاز.
.
قاعدة رقم 18
- في ناس بدل معلقتين السكر بيحطوا على المشروبات معلقتين عسل نحل .. سواء كدة أو كدة هما معلقتين بس في اليوم.
.
قاعدة رقم 19
- أشرب مية كتييييييييييييييييييير .
.
قاعدة رقم 20
- لو قررت تمشي كل يوم ساعة بس .. الأسطورة بتقول أن 10 دقايق سويدي فوقيهم هيفرقوا كتير.
.
قاعدة رقم 21
- ليك يوم فري أبسط يا عم وكل براحتك اليوم ده بس متحفش.
.
قاعدة رقم 22
- لو في يوم بوظت الدايت أمسك نفسك ومتقولش يلا أهو اليوم باظ وأبدأ تاني بقا من بكرة.
.
قاعدة رقم 23
- الأسطورة بتقول أن أحسن وقت للمشي أو للجري الصبح بدري قبل ما الناس تصحى وتروح أشغالها .. بس لو أتخطفت أنا مش مسئول.
.
قاعدة رقم 24
- كل لما تحس إن أرادتك بتقع شغل أغنية أتقدم بتاعت فيلم أحمد ذكي النمر الأسود .
.
قاعدة رقم 25
- لو قدامك سكة تدرب سباحة كل يوم يبقا يا سعدك يا هناك .
.
قاعدة رقم 26
- وأنت بتعوم متنساش تشرب مية كتير عشان مهمة جدا.
.
قاعدة رقم 27
- المشروبات الساخنة مفيدة بتساعد على الحرق طلاما أنت بتستخدم سكر دايت أو محافظ على معلقتين سكر بس طول يوم.
.
قاعدة رقم 28
- تنظيم الأكل مهم جدا عشان مترجعش لورا والرياضة مهمة جدا عشان تخليك تطلع لقدام.
.
قاعدة رقم 29
- تقليل البيتزا والبيبسي والشيبسي والحلويات وساندوتشات الكبدة والهامبورجر بيوفر فلوس كتير زي الفل يمكن أكتر من السجاير colonthree رمز تعبيري
.
قاعدة رقم 30
- أكسب صحتك وشكلك وفلوسك وأبدأ من أنهاردة وأعمل شير ومينشن لصحابك عشان يبدأوا معاك.
.
العشر قواعد الأخرنيين متروكين عشان أنتم تكملوهم ^^
أتمنى لكم التوفيق.. وعايزين نشوف محلات الملابس بتاعت المقاسات الكبيرة وهي بتخسر