نفى الفنان أحمد حلمى، أنه قام بمقابلة النجم الأرجنتينى "ليونيل ميسى"، موضحا بأن كلا منهم قام بتصوير دوره الخاص فى الإعلان فى بلده.

وأوضح حلمى فى بيان نشره عبر حسابه بموقع التواصل الاجتماعى "فيسبوك"، أنه أخطأ ولم يقم بتوضيح طريقة تصوير الإعلان، قائلا "يا أصدقائى وصديقاتى الأعزاء، أنا مقولتش إنى قابلت ميسى ولا حتى شفته، وأنا قولت ده إعلانى الجديد مع ليونيل ميسى، إنما كل واحد مننا صور الجزء بتاعه فى بلده، وده الطبيعى اللى بيحصل فى الإعلانات اللى بيكون فيها كذا شخصية من جنسيات ودول مختلفة، ممكن تكون غلطتى إنى موضحتش طريقة عمل الإعلان، بس ده لأنى تخيلت أن دى حاجه ممكن تكونوا عارفينها".

وأضاف "وعلى فكره فى إعلانات كتير أجنبية أتصورت بالطريقة دى برضه، بس طبعا كله لازم يكون بالاتفاق والموافقة مع كل الأطراف اللى هتظهر فى الإعلان، يعنى كل واحد لازم بيبقى عارف مين الشخصية اللى هاتظهر معاه فى الإعلان ولازم يكون موافق عليها كمان، وإلا كان بقى زمان كل واحد راح عمل إعلان لنفسه حط فيه كل نجوم العالم".

وأشار قائلا "على فكره أنا لما عملت الصفحة دى عملتها علشان أكون متواصل معاكوا، مش علشان اخدعكوا، لان أخر حاجه ممكن اعملها فى حياتى هى أنى اخدعكوا أو اضحك عليكوا، لانى قبل ما اخدعكوا هاكون بخدع نفسي، اوعدكوا المرة الجاية فى إعلانى مع "جيمس بوند" هابقى دقيق اكتر من كده، ((مافيش إعلان مع جيمس بوند ولاحاجه، أنا بهزر لحسن تاخدوها بجد))، وكل سنه وانتوا طيبين".