بيضتوا الوجه يا مغتربين
بيضتوا الوجه يا مغتربين؛
عن مصر الغالية بقالكو سنين
واخترتوا رئيسكو
بإرادة حرة
تشبه لإرادة يوم تلاتين
يوم م الشعب خرج وناداه
بقناعة كاملة لبّى نداه..
وقاله آمين
إحنا معاك وجد الجد
لحم ودم
مش فوتوشوب
زي ما قالوا ناس مجانين
من بعدها والحرب اندلعت
اشي ترغيب واشي ترهيب
واشي تخريب
وحرق وخرق؛
للقوانين وحدود الله
والمأساة..
كل ده يجرى بإسم الدين
إرهاب دولي ودعم متين
قتل وسحل
وذبح وسلخ
وبرضه حننزل
مش خايفين
بس اللي قتلني
وكسر ضهري
إن ده يجرى بكل ندالة
بإيدين بعض المصريين
إرهاب دولي لشعب مصمم
إن إرادته ما تتحطمشي
وماهوش خايف
نازل نازل
وهيختارك إنت يا سيسي
واديني قولتلكو
اعملوا ما بدالكو
وركزوا أكتر ع الفوتوشوب
تعالوا وراقبوا
وهاتوا معاكو موسيقى الجاز
وموسيقى "البوب"
علشان تبقى فضيحة بجلاجل
لما تلاقوا الشعب المصري
بشحمه ولحمه في الميادين
وتلاقوا السيسي
هوّا رئيسي
وف التصويت..
جايب "التوب".
الشاعر عبد الحميد زقزوق
23 / 5 / 2014