ابك يا عين

ابك وجودي بدمع العين

ابك وجودي بدم القلب

لأ مش كافي دمع العين

ابك يا عين ابك يا عين

ابك واسألي باسم الشعب :

ألفين عين ألفين عين

راحوا يا حسني مبارك فين؟

مين اغتالهم؟

مين صفَّاهم؟

مين جرَّى القنَّاصة وراهم

وهُمَّا بيزعقوا : حلَّق حوش

آسف آسف

ده ما جريوش

يتعبوا ليه يا سعادة البيه

وسلاحهم كان ميكروسكوبي

لاهو مطاطي ولا خرطوش

والقناص واقف على راحته

واخد ساتر فوق المبنى

والثوار واقفين قدَّامه

بيهتفوا مصر

وتحيا مصر

حرَّة أبية

ولازم يرحل

بين الضهر وبين العصر

يدوي صوتهم في الميدان

ويزلزل أركان القصر

والقناص واقف على راحته

بينشِّن زي ما علمته

يا عدلي على أغلى عيون

بينشِّن يتهز الكون

جُوَّه عيونهم وعيون مصر

      * * *

ألفين عين ألفين عين

راحوا يا حسني مبارك فين

لأ ده انا آسف مش ألفين

ده الألفين عدد اللي انصابوا

في عنيهم غير الباقيين

فيهم ناس فقدت عين واحدة

واكترهم ضحَّى بالاتنين

حتصدقني يا ديب الكلب

ولا حتكدب يابو وشّين

وتقولي دي كائنات فضائية

جاية من كوكب مفيهوش ناس

كوكب اسمه زحل وحماس

وكوكب تاني لحزب الله

وكوكب تالت للأنجاس

يا أشر وأنجس خلق الله

بطل كدب حقير ع الناس

على فرض ان كلامك عادي

دخلوا ازاي وخرجوا ازاي

صالوا وجالوا وشربوا الشاي

أمال فين جيشك يا بلادي

وفين الناس

ولا الباب مفيهوش ترباس

جيش حطَّم برليف ف ثواني

بعد ما عدَّى البر التاني

ست ساعات كان تم عبورنا

وتمركزنا بدون ما نعاني

وجنودنا عمَّالة تكبَّر

وجنودهم بتسب وتكفر

من كتر ما كانت بتعاني

يبقى ازاي كائنات فضائية

تيجي وتخرج

بعد ما تقتل ألف شهيد

وآلاف الجرحى والمصابين

ولا فيش لا قاتل ولا جاني.

      * * *

ألفين عين ألفين عين

راحوا يا حسني مبارك فين؟

معقولة تخرج منها بريء

وتفوت اللي صفيتوا عنيهم

وكل واحد منيهم

بطول حياته بيعاني

أقل ما فيها يا حراميها

يا مجوعها ومعريها

يا مصبحها وممسيها

بالهم وبالغم الأزلي

ــ واحنا اللي قلنا هيغنيها

ويهنيها

ومن الأعادي حيميها ــ

أقل ما فيها يا مبارك

نفختلك حتى ولو عين

ولأولادك العينتين

وقبل منهم غراب البين

سبب المصايب والتفانين

علشان ترستأ ننوسها

أو نن العين

جمال ؛ جمالها وريث الشين

على عرش مصر المحروسة

في غمضة عين.

نفختلك حتى ولو عين

وده حكم طبعا رباني

العين بالعين والبادي أظلم

وانت ما كنتش يوم أرحم

ولا حاولت ف يوم ترحم

هذا الشباب المتفاني

في حب مصره ام الدنيا

وطول حياته بيعاني

ولسه ياما يشوف أكتر

معاناة إذا الوغد الجاني

ما دفعش تمن جرمه الفادح

وسلوكه الباغي العدواني

      * * *

ألفين عين ألفين عين

راحوا يا حسني مبارك فين؟

مين اغتالهم؟

مين صفاهم؟

مين جرى القناصة وراهم؟

مين أبدع في القنص وغامر؟

مين ادى القناصة أوامر؟

مين وضع الخطة الملعونة؟

مين جاب الفكرة المجنونة؟

يا ترى العادلي

ولا العيسوي

ولا شفيق اسم النبي حارسه

اللي اتعامى وغض العين

واتستر على دولا ودولا؟

أما صحيح اللي اختشوا ماتوا

وان ما ماتوش بكره حيموتوا

من نظرات أعين صفّوها

وقالولنا :

والله ما نعرف

فيه ناس قالوا

الطرف التالت

وناس بيقولوا

الأمن الفالت

وناس بيقولوا

كشفنا الفولة

المسؤول وكذا المسؤولة

زي ما في الحواديت بيقولوا

أبونا الغول ومراته الغولة

هية بعينها وهو بعينه

وللتمويه عملت مهبولة

وواقفة ف وسط الخلق تزغرت

ومظاهرات الثورة بتهتف

ألفين عين ألفين عين

راحوا يا حسني مبارك فين ؟

مين اغتالهم؟

مين صفاهم؟

مين جرى القناصة وراهم

تارهم تارنا

وعارهم عارنا

مش حيموت ولا تبرد نارنا

إلا اذا خدنا قصاد العين

أقل ما فيها قول عينتين

ونفضل برضه بعدها نسأل

ألفين عين ألفين عين

راحوا يا حسني مبارك فين ؟!

عبد الحميد زقزوق

15/1/2012