fiogf49gjkf0d

ولا حكم واحد بالإعدام

 

معقولة يا أهل طيبة

مش شايفينها عجيبة

معقول هذا الكلام

من يوم الثورة ما قامت

وقبضوا ع الحرامية

والمحكمة استقامت

ولا حكم واحد يصدر

بعقوبة الإعدام !!!

ولا مليم اتنهب

ولا أطنان الدهب

ولا أراضي اتاخدت

بوضع اليد علنا

ولا شركات خصخصوها

ومصانع عطلوها

وشردوا عمالها

وف الآخر باعوها

والبيع بأرخص تمن

على مدار العام

لا خدنا اسود ولا ابيض

ولا رديتولنا حاجة

والناس كانت محتاجة

تشوف قطر العدالة

واخد طريقه دوغري

ومش هامه الزحام

يا ناس حرام عليكو

مين اللي شار عليكو

من يوم الثورة ما قامت

والمحكمة استقامت

ولا حكم واحد يصدر

بعقوبة الإعدام!!!

بالذمة ده اسمه كلام!!!

الشهدا اللي اغتالتوهم

وبناتنا اللي فضختوهم

عريتوا وسحلتوهم

ع القنوات الفضائية

وشباب صفيتوا عنيهم

مفيش جريمة منهم

تستاهل الإعدام؟!!!

والباشا ابو عربية

في بني آدمين غلابة

بتفرم رايحة جاية

وشلة الحرامية

والمهلباتية

والقناصين اياهم

معقول مفيش ولا واحد

يستاهل الإعدام؟!!!

ولا الحكاية كوسة

وفصل ف مسرحية

ولا فصلين تلاتة

لحد الناس ما تزهق

وكله يقوم ينام

ولا هية مؤامرة

على الشعب المسالم

وثورته السلمية

يا خوفي لا القضية

تطلع مهلبية

ولا يبقى فيه قضية

ولا جاني ولا ضحية

ولا حتى اتهام

مع إنكو كل فترة

بتخترعولنا حاجة

وبمنتهى السذاجة

بنشوف ضحايا أكتر

والتفاف ع الثورة

وقتل للثوار

ومن ملعوب جديد

ويد من حديد

الشعب يستثار

وينقطع الحوار

ومؤامرة ف ديل مؤامرة

يزيد عدد الضحايا

ف جبهة الثوار

ونشوف طابور جديد

من النعوش الطايرة

ونقول نفس النشيد

مصر اليوم ف ثورة

ومصر بكرة عيد

وحيعم السلام

لكن ولا حكم واحد ؛

أصدرتوا بالإعدام

يا سلام على دي محاكمة

ويا عيني ع الأحكام

بكرة التاريخ حيحكم

إنتو صحيح معاها

ولا وبال عليها

وهدفكو الانتقام ؛

من اللي قاموا بيها

في حاضرها وف ماضيها

يا حضرات اللئام

بكرة التاريخ حيحكم

والثورة مستمرة

وماشية للأمام

الثورة جمرة حمرة

حتحرق اللي خانها

وسمها ف بدنها

وتدوسه بالأقدام

وتخلد من ناصرها

ومات لجل انتصارها

وتحييه ع الدوام

الثورة وقودها غالي

دافعه من حر مالي

ــ شباب غالي ومثالي ــ

أنا الشعب الهمام

أنا الشعب اللي ضحى

بالدم نهر جاري

خلى الفرعون تنحى

ولجأ إلى المصحة

وف انتظار إعدام

والفرعون اللي بعده

إذا ما ارتدعش طوعا

وكان العدل نهجه

نفس المصير حيلقى

فعليا مش كلام

الشعب لما يغضب

ويعلن التحدي

بيبقى هديره باتر

أمضى من المقاصل

وأحد من الحسام

في إسقاط الطاغوت

السايب والمربوط

وإزاحة الحكام

المفسدين ف أرضه

والخائضين ف عرضه

وعتاولة الإجرام

مفيش طاغوت تمكن

من إسقاط مرة شعبه

لكن شعوب كتيرة

أسقطوا الحكام

وآخرة أي حاكم

طغى وبغى على شعبه

مش بس بيسقطوه

لكن ضروري تبقى

آخرة حياته سودة

ومتوجه بإعدام.