الشحات الفرعون..وعلم صهيون..!! كان المشهد مهيب ومنظر فوق التصور والخيال..ألاف المصريين واقفين تحت العمارة الموصومة بالسفارة باصين على الفارس الخَيًال..كانت الشجاعة والجسارة أكبر من أى كلام ممكن يتحكى ويتقال..سبايدر مان مصرى شاب من شباب مصر بيطير برشاقة وكأنه بيتسلق تلال وجبال..كان أحمد الشحات البطل المصرى طالع على الحيطة زى الأسد وسط التلال..كان قرار شجاع من شاب مصرى أصيل من اللى كانوا قبل الثورة فاكرينهم شوية عيال..الشحات كان قراره واضح جواه وكان تنفيذه سريع ولا كان هناك جواه أى تردد أو حتى إحتمال..كانت شجاعة الشحات مش غريبة على حفيد عرابى وبلديات سليمان خاطر اللى كانوا للكرامة مثال..الشحات هبط علينا من السما وخسف بالعلم الصهيونى وداس عليه بالنعال..كانت الفرحة غامرة وفطرية وكانت هى الجواب الشافى المُعافى لكل سؤال..أتارى الوطن لسه عروقه بتنبض بالكرامة وأتاريه مليان رجال..أتارى الشعوب لابتموت مهما قهروها وإن مصر ولادة وإنه فعلا مفيش مُحال..الخلاصة الشعب فاق وإنتصرعلى النظام فى الميدان وعمارة كوبرى الجامعة وقهر الخنازير والبغال..وكتب عهد جديد مفيش تفريط ولا تهاون ولا مبدأ يابخت من وفق معاهدتين فى الحلال..الشعب قال كلمته رغم كل التحذيرات والأعراض الجانبية ملعون علم صهيون والكويز وتصدير الغاز وطيران العال..لو كنت هناك معايا كنت قلت الحمد لله مصر لسه بخير وسبحان مُغيٍرالأحوال من حال إلى حال..بإختصار إرفع راسك فوق إنت مصرى وطول مافيها الهرم والنيل والشحات زين الرجال.. خلاصة الكلام الشعب من غير إستفتاء عبر عن شعوره ضد معاهدة المهانة وبكامل إرادته لكلمته قال..!! جنحنا للسلام وإحترمناه مع عدو غدار كان فاكر إن تراب أرضنا مستباح..تجاوزات وإنتهاكات والنتيجة فى الآخر مجرد غرامات وتحذيرات هزلية ودم ولادنا بقى خلاص ُمباح..عدو غدار من غير مبدأ ولا إحترام لمعاهدات فاكرين بلدنا سداح ومداح..جواسيس وجماعات إرهابية وغزو بدون تأشيرة لأرض الفيروز وعملاء فى هيئه سواح..خلاص مبدأ التهاون والخنوع إنتهى عصره وجبل جليد الخوف داب وساح..مصر بتتولد من جديد بشعبها العنيد وجيشها العتيد اللى قال كلمته في أكتوبر وبنداء الله أكبر كَبر وصاح..مصر بقى فيها شعور جديد وإرادة جديدة وفجر جديد بيتولد كل صباح..!! اللى حصل عالحدود لا كان غريب عالناس ولا عمرهم من خيالهم إستبعدوه..عاشوا فى ظل إتفاق ظالم مقهورين ولا كانوا يحلموا عنهم ينفضوه..كان منظر العَلم مثير للإستفزاز واللى كان يقهر لما تشوف عسكر بلدنا ياعينى حسب البروتوكولات واقفين بيحرسوه..تقاليد دبلوماسية وإحترام للإتفاقيات على العين والراس لكن من إمتى العهد يكون مكتوب على ساستنا بس يحترموه ..من إمتى كنا شعب تحت بند الإختبار كل شوية يصنعوا أزمة ويشغلوه..بلدنا مش حقل تجارب ولا كائن عشوائى ممكن يبلعوه..بلد الحضارة وخير جند الله والناس البسيطة الطيبة اللى مفيش حد قدر عليها حتى فرعونهم لو ظلم يفرموه..جواز كامب ديفيد من بهية باطل ولازم يرجعوا من تانى ويبدلوه..الإتفاقيه لازم تكون بنودها واضحة لكل الناس والشعب ياخدوا رأيه عليها ويستفتوه..الشعب يريد تعديل الإتفاقية وعودة أمن سينا حتى روحوا وإسألوه..الله عليك ياشعب مصر لما تتوحد صفوفك ولا حد يروح يلعب فى راسك حيرجع زى زمان والكل مهما كانوا حيهابوه..مصر بتتولد من جديد وكل عيون العالم عليها شايفين ولادها اللى يوم بعد يوم تاريخها من تانى بيكتبوه..آن الآوان ترجع مكانتنا تانى من جديد وولادنا يتوحدوا ومجدنا من تانى يرجعوه..!! لكن بعد ما خلصت الحكاية الناس تحت السفارة سابوها زى ما عملوا بعد التنحى فى التحرير..راح اللى راحوا على السفارة والقهر فى قلوبهم بجد بعد حادث الحدود الخطير..ولو رحت السفارة دلوقت حتلاقى فلاشات ورايات سوداء وكتاكيت بتصوصو من غير كبير..لأن كبارهم قاعدين هناك وسايبينهم يألفوا أغانى ويسبوا العسكر من غير توقير..ياترى مين اللى بيحرك دول ومين اللى بيدفع الفواتير..الشحات لهف قلوب الناس لما شافوه بعينيهم لكن مين هناك اللى مش شايفينه وطالع على المواسير..مين من مصلحته يفسد بين الناس والعسكر ومين اللى زرع فى دماغ الكتاكيت إنهم ثوار ورماهم فى البير..مين اللى بيرفع رايات سوده ويفط مكتوبة فى السراديب وخلى الفرحة بالشحات من قلوبنا تطير..روح السفارة زى ما رحت التحرير وحتلاقى برضه سميط وجبنة ودرة مشوى وحمص الشام وطعمية وجرجير..يا خسارة على النفس القصير مابنلحقش نفرح واللعب بقى عالمكشوف ومش محتاج تفسير..فهمت وللاحتعمل فيها ثورى وتروح السفارة وتهاجم من غير لازمة العسكر وتنادى بالتغيير..وللا أقولك رمضان كريم روح واتسحر وإحلم براحتك بس ياريت يكون من غير شخير..!! said_elmasryfahmy@hotmail.com