تداول مستخدموا موقع فيس بوك منشور قامت بكتابته إحدى المصريات العائدات من الغربة وقد أبكىت كلماتها كل من قرأها ، ننشرها لكم كما كتبتها :
بما اني قعدت في مصر وكلمة 'هتندمي' بقت تتقاللي كتير .. احب اقول كلمتين بس
اللي جرب الغربة هيعرف كويس اوي ان نار البلد دي ارحم كتيير اوي من جنة الغربة
عارف يعني ايه تكون متغرب بره بلدك !!
- الغربة يعني تتعلم تواجه اي صدمة في حياتك #لوحدك مهما كانت صعبة !
- غربة يعني تتفرج على كل اصحابك وهما عايشين حياتهم و تحاول تقنع نفسك انك في بالهم و تكتشف انك محدش فاكرك اصلا .
- غربة يعني تعد الايام والشهور على نزولك مصر من غير ما تزهق و يوم السفر بالنسبة ليك ده يوم #عيد !!
- غربة يعني كلمة نزول مصر #نهائي هي كل امنيتك في الحياة ..
- غربة يعني لما تزعل تطبطب على نفسك .. هتفرح افرح لوحدك .. هتشكي اشكي لنفسك .. ساعتها هتتعود انك عمرك ماتحتاج لحد بعد كده !!
- غربة يعني ممكن تشوف اكتر حد حبيته في حياتك زهق من كتر ما بتبعد عنه و قرر يكمل حياته ولا كانك موجود !!
- غربة يعني وجع محدش حس ولا هيحس بيه الا انت و بس .. !!
- غربة يعني تشتاق لبلدك و اقرب ناس ليك وهتموت وترجع ولما ترجع تلاقي كل حاجة اتغيرت !
#الغربة هي الحاجة الوحيدة اللي هتحسسك انك ميت بس فيك الروح ..
محدش بقى مجربش الغربة ولو يوم واحد يوجع دماغي بتعليقات ملهاش لازمة ارجوكو &<27995;