طالب المخرج السينمائي، عمرو سلامة، رئيس الجمهورية، عبدالفتاح السيسي، بالإفراج عن الشباب المسجونين على خلفية قضايا رأي وقضايا سياسية.

 

وكتب سلامة، على صفحته على موقع التواصل الاجتماعي "فيس بوك" اليوم الاثنين، بأسلوب ساخر "سيادة الرئيس أتمنى أن يصلك كلامي التافه، مقدرين مشاغلك، وعدم حبك للانتقاد، وأنك في مكان أتيت له تنازلا وخدمة لنا وأننا مثقلين عليك، ونشكرك أنك بتحنوا علينا وبتمدلنا إيديك، اعذرنا، يمكن مش بنقول آمين كفاية، وفي شوارع مش ملزوق فيها لسة صورك، وغصب عن الاعلاميين في منهم مش بيعظمك يوماتي، والشباب من طيشهم مش مقدرين احتضانك ليهم، بس لو فيها سخافة وقلة ذوق، في كام واحد مسجونين كده لو طلعتهم يبقى كثر خيرك، وتبقى فعلا نعم الأب والأخ، إسراء الطويل وعلاء عبد الفتاح وغيرهم، شباب اتهوروا وحبوا بلدهم بطريقة يمكن سعادتك مش بتفضلها، بس احنا طمعانين في انك تزود على خدماتك لينا خدمة كمان".

 

وتابع سلامة، "أصل بيقولوا السجن والحبس صعب، طبعًا مش بصعوبة إنك تكون رئيس جمهورية مسؤول من شعب كامل، بس انت أسد قدها وقدود وهم يدوبك شباب ضعفاء هشين".

 

وأضاف "ولو ماطلعتهمش برضه تكون مشكور وأكيد عندك حكمة مش عندنا، وأكيد طلبي ده فيه قصر نظر أو إحنا غلطانين في تعاطفنا مع من لا يستحق التعاطف، ولو في انحطاط وتملق ورياء ممكن نوصله أكثر من كده وممكن يخلي الشباب دول يطلعوا ويناموا في بيوتهم مع أهاليهم إحنا مستعدين، أنت بس شاور".