قامت رابطة أبناء سوهاج العاملين في دولة الكويت بدعوة الوزير المفوض التجاري عبد الوهاب عبد العليم رئيس مكتب التمثيل التجاري لجمهورية مصر العربية في دولة الكويت لزيارة الرابطة والالتقاء مع أبناء سوهاج وأبناء الجالية المصرية وقد لبى سعادته الدعوة والتي كان لها الأثر الطيب على نفوس الحاضرين حيث تفاعل مع الحاضرين الذين قاموا بدورهم بالسؤال عن كل شئ خاص بالاستثمار وكان الحوار بديعاً إستمر قرابة الساعتين حضر اللقاء السيد / عثمان البدري رئيس مجلس إدارة رابطة أبناء سوهاج والسادة نواب الرئيس والأعضاء , كما حضرة المهندس / مصطفى شحاتة , والدكتور /حمدي الجميلي "مدير الجو معلوماتية بمركز الكويت للأبحاث العلمية" وفيما يلي أهم ما جاء في هذا اللقاء :
سعادة الوزير المفوض التجارى عبد الوهاب عبد العليم :
س : ماذا عن مناخ الاستثمار في مصر بشكل عام وهل مصر دولة تشجع المستثمرين أم أن البيروقراطية هي العنصر الأساسي في الموضوع ؟
ج : مصر من الدول التي تشجع الاستثمار على أراضيها بشكل عام خصوصاً للمستثمرين العرب وهي أكبر دولة عربية تحتضن المستثمرين من دول الخليج خصوصاً الكويت والإمارات والسعودية ولا يوجد في الاستثمار ما يسمى بيروقراطية فالجادين سواء من رجال أعمال كويتيين أو مصريين يمكنهم زيارتي في أي وقت لتسهيل كل شئ 0
س : هل هناك فرصة جيدة لرجال أعمال مصريين أو حتى للأشخاص العاديين من الاستثمار في سوهاج الجديدة وهي المنطقة التي تم فيها إنشاء مطار مبارك الدولي ؟
ج : الفرصة موجودة في كل وقت لكن الموضوع ليس فرصة فقط لكن عوامل كثير تؤثر في نجاح تلك الفرصة منها دراسات جدوى علمية ودراسة للسوق 00 الاستثمار ليس أراضي فقط لكن أشياء أخرى كثيرة وأكيد لدى المسئولين في سوهاج خريطة عن الاستثمار في هذه المنطقة الواعدة فوجود مطار دولي هناك بالتأكيد يزيد من فرص إقامة مجتمع صناعي هناك 0
س : من خلال خبرات سعادتك في المجال التجاري كيف نستطيع نحن أبناء سوهاج من تكوين كيان تجاري يهدف إلى الربح ؟
ج : هذا هو الكلام الجميل يمكنكم ذلك باستغلال ما حباكم به الله من إتحاد وتواصل وترابط فيما بينكم وتكوين شركة برأس مال بسيط يمكن تجميعه من حضارتكم في شكل أسهم على أن يدير هذه الشركة نخبة من إخوانكم المتخصصين و سوهاج أولى بأبنائها وأراضي سوهاج الجديدة يمكن بسواعدكم بنائها وهذا كلام ليس للاستهلاك المحلي بدليل إذا طلب منكم ذلك في الغربة لفعلتم 0
س : لكن ما قمت بتوضيحه سعادتك يحتاج لشركة نظامية إجراءاتها صعبة ومعقدة ؟
ج : يمكنك زيارتي في مكتبي لحين قيامك بشرب القهوة تكون لديك مستندات تكوين شركة تحت أي مسمى قانوني ترغب فيه 00 إذا توفرت العزيمة ليس هناك مستحيل ومن يدعي أن إجراءات الشركة تحتاج لوقت طويل قد جانبه الصواب ويا سيدي جرب وشوف 0
س : ماذا عن السيارات لو حبيت اشتري سيارة وانزلها مصر ؟
ج : شوف مصر فيها كل شئ غير زمان السيارة من مصر تقدر تشتريها عشان تستفيد بأشياء كثيرة منها الضمان المجاني وقطع الغيار ويمكن سعرها يكون أرخص لو حسبتها بعد الجمارك لكن لو أنت ضروري تشتري سيارة من هنا يبقى اشتريها أول ما تيجي الكويت تستخدمها بعد خمس أو ست سنوات تبقى سعرها في السوق ملاليم ساعتها تقدر تنزلها مصر يبقى استفدت منها هنا وهناك لكن أنصحك علشان الجمارك ما تدخلش في شريحة عالية في الجمارك اشتري السيارة حتى (1600 سي سي ) بيسموها حجم وسط والسيارات اللي تستحق إنك تنزلها ( تويوتا كورولا ) أو ( أوكتافيا إي 5 ) أو ( اللنسر الجديدة ) عموماً وللأمانة هناك بعض الناس تروح تشترى عربية ويروح معرض السيارات هنا فيقولة بتاع التسويق خلى بالك دة تقفيل اليابان واللى فى مصر تقفيلة اى كلام, والناس دى معروفة حافظة اسطوانة وبتقولها ما تصدقوش التقفيل في مصر أحسن من دول كتيرة الكورولا الموجودة دى كلها جاية من ماليزيا , كل الشركات العالمية تعطي رخصتها لدول تانية وخد مثال المرسيدس اللي في الكويت تقفيل مصري والباصات تقفيل مصري من غبور .
س : يعني بلاش نشتري عربية نوديها مصر ؟
ج : اللى عاوز يشترى عربية مخصوص علشان يوديها على مصر يبقى دة خسران 100% وممكن يجيلى واخلية يشوف بنفسة انه خسران , وليكن الكورولا بتتباع بحوالى 4700 د. ك يعنى حوالي 90 الف جنية , وجمركها 65 الف جنية يبقى وصلنا ل 150 الف جنية , هات 130 واجيبها لك من معرض أخبار اليوم ( اتو ماكس) ونفس المواصفات واتحداك لو تختلف , وطبعا دة بجانب إنها ممكن تتخبط وهى بتتشحن او يتسرق منها حاجة . عشان كده بانصح بانك ما تاخدش سيارة من هنا لان أقصى تخفيض هتاخدة 50% . واهم حاجة اقدر انصح بيها اللي عاوزين ياخدوا حاجة ويأكلوا عليها عيش إنهم ياخدوا ( راس تريلا ) عموماً انصح اى مصري واخد عربية ونازل بيها المطلوب منة ورقة واحدة بس اللي يعملها يجيب شهادة بيانات أو مالك أول من المرور اللي هو تابع ليه هنا ويختمها من الخارجية الكويتية والقنصلية المصرية ويبقى دة بس المطلوب .
س : يعني حضرتك ممكن تساعدنا بشكل شخصي لو حبينا نسأل عن أي حاجة استثمار أو جمارك ؟
ج : كل مواطن مصري يسأل عن أي شئ أو عاوز يعمل استثمارات او يشترى شقة يجى لي وانا أساعده واوجهة للطريق الصح ما عنديش مشاكل .
س : حضرتك تنصحنا بالشراء من المعارض العقارية وإيه رأيك فيها ؟ ج : المعارض العقارية كويسة لكن انصح الجميع محدش يشترى سمك فى مية , يعنى لازم تنزل مصر وتشوف المشروع بعينك وتتاكد منة قبل ما تدفع فلوسك .
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
حوار : د. حمدى الجميلى
)مدير مركز الجومعلوماتية بمركز الكويت للابحاث العلمية)
س : ما رأيك فى فكرة الاستثمار فى سوهاج ؟
ج : فكرة ان ابناء سوهاج وابناء مصر هم اللى يستثمروا ارضهم دى احسن حاجة لان سيكتب لاول واحد ينفذها ان هو سن سنة حسنة , لان كل الثروات موجودة فى مصر , ومن خلال اللى باشوفة من صور الاقمار الصناعية والخرائط والمعلومات هى مصر , فقط ينقصنا اتخاذ القرارات فى مصلحة البلد والمستثمر وحتى الانسان العادى , وكل المتطلبات للاستثمارات وعمل ثورة اقتصادية حقيقية متوفرة عندنا فى مصر .
س : ماذا ينقصنا اذا ؟
ج : ينقصنا القرار والعزيمة والادارة والعمل المشترك , فاذا ما اتفقت الجالية وفى سوهاج وغيرها ان يستثمروا فى سوهاج فرقم واحد علينا نشتغل صح .
س: كيف تستطيع مساعدة المستثمرين ؟
ج : انا مستعد بدون مقابل انا والشباب اللى بيشتغلوا معانا فى التكنولوجيا , اننا نجيب صور الاقمار الصناعية لسوهاج , ومثلا اذا كان الاستثمار زراعى نقدر نحدد ان المكان دة يصلح لهذا الاستثمار الزراعى و هكذا العمرانى والصناعى .. الخ بمعنى نحدد فرص الاستثمار بانواعها المختلفة والاماكن الصح بحيث لا تؤثر على البيئة وايضا البيئة والزمن لا يؤثرون عليها , بمعنى ان ممكن نعمل استثمار زراعى فى مكان وبعد فترة تبدأ الارض تملح والعمران يدخل عليها , فهنا دورنا اننا نتلاشى هذة الاشياء ونختار مكان تكون فية التربة من نوع معين والجغرافيا من نوع معين ويكون لها امتداد عمرانى فهناك معايير وعلم وتكنولوجيا , فنحن نملكها ونستطيع ان نطوعها لخدمة الاستثمار ولو نجحت فى سوهاج فسوف تقوم جميع المحافظات بتقليدها .
س: ممكن تقدر لنا المدة التى يتم فيها تقرير الاقمار الصناعية ؟
ج : احنا حسب الرابطة بمعنى كل ما ابناء الرابطة يستعجلوا احنا هنستعجل , بمعنى بدل ما نشتغل ساعة زمن سوف نشتغل 10 ساعات وفى كل نهاية اسبوع ليل نهار, وطبعا الاخوة فقط عليهم يتصلوا بالمحافظة ويجيبوا لنا من مركز المعلومات اللى هناك المعلومات المطلوبة واحنا علينا الباقى .
س: كم تكلفة التخطيط والتقرير من خلال الاقمار الصناعية ؟
ج : لو قلنا كام فالتكلفة غالية جدا , واحنا سنقدمها مجانا لابناء رابطة سوهاج , وطالما فية عمل حقيقى لخدمة الرابطة فلن نتقاضى اى مبالغ , ومساهمتنا لهم عبارة عن شرف لينا .
س : هل تقوم بهذا العمل بمفردك ؟
ج : احنا فريق عمل من الشباب المصرى , ونقدر نساعد اللى عاوز يقدم دراسة جدوى بدراسة محترفة واؤكد مرة اخرى ان كل هذا دون مقابل وبالمجان, وطبعا ستكون اول رابطة فى الكويت تستعين بالاقمار الصناعية وتكنولوجيا المعلومات هى رابطة ابناء سوهاج .
الوزير المفوض التجارى عبد الوهاب عبد العليم.
الوزير المفوض عبد الوهاب وأ. عثمان رئيس الرابطة.
د. حمدى الجميلى مدير الجومعلوماتية.
م. مصطغى شحاتة و الوزير المفوض عبد الوهاب.
أ. علاء سليم ود.عمرو الاسد والحاج لبيب.
أ. سمير هاتور وأ. عبد البارى ورجال العمال البرديسى والاصمعى.
الوزير المفوض يشرح بعض النقاط.
أ. مصطفى يسأل والحاج سمير يستمع.
د. حمدى الجميلى يدلى باقتراح علمى.
الحاج لبيب العكش يتوسط أعضاء الرابطة.
تهنئة على الكيكة.
الوزير المفوض عبد العليم يقص الكيكة.
الكل شارك فى تذوق الكيكة اللذيذة.
الحاج سمير هاتور وأ. عبد البارى.
حديث بين البدرى والجميلى وشحاتة.
الوزير المفوض التجارى يكتب تفرير.
ابناء سوهاج مرحبين بالوزير المفوض التجارى.
د. حمدى الجميلى متحدثا.
الوزير المفوض عبد الوهاب ورجل الاعمال برديسى.
أ. سمير هاتور نائب رئيس الرابطة.
أ. علاء سليم المستشار المالى.
م. شحاتة و الوزير المفوض عبد الوهاب وأ. فرغلى و أ. علاء.
مقررة اللجنة الاعلامية بالرابطة مع د. الجميلى وابناء سوهاج.
يطلع على التقارير.
د. عمرو والحاج لبيب والحاج سمير.
رجل الاعمال عادل البرديسى عضو مجلس الرابطة.
الحاج سمير والحاج لبيب مرحبين بالدكتور الجميلى.
اهل سوهاج يرحبون بالضيوف بكل سعادة.