أعلن الفنان خالد الصاوى عن موعد عرض مسلسله "على كف عفريت" من خلال صفحته على الفيس بوك حيث قال:

"أصدقائى الأعزاء، يمكنكم متابعة مسلسل "على كف عفريت" يوميا فى الثامنة مساء على "أو إس أن" على محطة "يا هلا شباب"، مع ملاحظة أن المسلسل سيعرض على قناة النهار عقب انتهائه تماما، بعد شهر.

يمكن ده مش أنسب الأوقات للإعلان عن عروض فنية جديدة فى ظل الكابوس اللى طول علينا كلنا، ويمكن بالعكس ده الوقت المناسب لعروض فنية جديدة، أظن اللى حيجاوب على السؤال ده هو اللى حيقدر يتابع.. وحكون دايما فى انتظار تعليقه.

مسلسل "على كف عفريت" من أول يوم ولحد دلوقتى هو شخصيا عامل زى اللى كلنا عايشينه: على.. كف.. عفريت! اتأجل من رمضان، واجهته عقبات كثيرة بحكم الظروف العجيبة اللى كلنا بنمر بيها، ويدوب كنا حنخلص أيامه الأخيرة حصل لى تمزق فى التمرين، فركنت أسبوعين، وركن معايا تصوير العمل كله.. وحنكمل ثانى تصويره أثناء عرضه.. زى رمضان كده رغم أنه مش فى رمضان.

بس أنا بقى عشان مش طبيعى قوى يعنى فتلاقونى بتفائل دايما بأحلك الأوقات وبأخنق الحاجات.. بحس أن كل ما الاختبار زاد.. كل ما الإنسان بيكسب حاجة ما.. حتى لو خسر جنبها حاجات تانية".