• ضحك عليها واحد " عامل انه بتاع ربنا " .. وتبرع لها بفلوس العمرة وبعت معاها شنطة محشية مخدرات!

• تحقيقات في القاهرة .. كيف مرت هذه الحقيبة من المطار ؟

• سألوها في جده : الشنطة دي بتاعتك ؟ فردت : والنبي يابني ما عرف ان فيها الهباب ده 

• السفارة المصرية مهتمة بالقضية والسلطات السعودية  تتعامل معها برفق شديد.

مصريون في الكويت – احمد عفيفي 

هى حاليا محتجزة لدي السلطات السعودية .. إجراء عادي وطبيعي بعد ان اكتشفوا في مطار جدة انها تحمل حقيبة " مليانة " مخدرات .. سيدة مصرية بسيطة جدا ، عمرها 75 سنة .. هل يُعقل او أننا نصدق انها تاجرة مخدرات؟ .. واحدة غلبانة ربت عيالها بالحلال ، طفحت الدم عشانهم .. وأمنية حياتها انها تعمل " عمرة " وتزور النبي في المدينة .. لكن منين تجيب حق العمرة اللي ارتفع بشكل كبير .. 

واحد " ابن حرام " وعامل نفسه راجل خير وبتاع ربنا .. هكذا تقول ابنتها خلال استضافتها في برنامج " العاشرة مساء " .. عرف ان أمنية سعدية قبل ماتموت انها تعمل عمرة ، فتطوع بالتبرع لها كي تؤدي العمرة على حسابه الخاص .. فرحت طبعا الحاجة سعدية .. ودعت له من قلبها يجعله في ميزان حسناته ، عيالها صبيان وبنات زغردوا وهما بيودعوها في المطار .. إدعي لنا يامه .. ربنا يتقبل منك .. كان منى عينك تزوري الكعبة وقبر الرسول .. وربنا استجاب لك .. ولاد الحلال ماليين البلد .. ربنا يكتر من أمثالهم.

لكن اللي حصل للحاجة سعدية لا يدل ابدا على ان ولاد الحلال كتير .. فاللي تفتكره موسى يطلع فرعون  .. الراجل اللي عامل فيها بتاع قال الله وقال الرسول خدع الست سعدية وبعت معاها شنطة وقال لها حيقابلك واحد في المطار هناك حياخدها منك .. 

طيب فيها ايه الشنطة دي يابني ؟ تسأله بمنتهى السذاجة 

يرد : دي فيها شوية هدوم لواحدة قريبتي هناك .. وفتح الشنطة قصادها عشان تطمن .. أتاري الشنطة محشية بحبوب مخدرات في مواسيرها الحديدية .. فاتت ازاى من مطار القاهرة أساسا ؟ .. المباحث بتحقق في الموضوع ده حاليا .. لكن في مطار جده الجهاز كشف الشنطة وشك فيها ولقى جواها المخدرات .

ايه ده ياست سعدية ؟ .. بيسألوها .. سعدية مش فاهمة حاجة .. هو فيه ايه يابني وايه اللي انتم لقيتوه ده ؟

الضابط وقد شعر ان الست دي غلبانة ومضحوك عليها : دي مخدرات ياحاجة .. الشنطة دي بتاعتك ؟

ردت : لأ يا بني .. اللي طلّعني العمرة على حسابة قاللي اوصلها لواحد حياخدها مني في المطار. 

الضابط سألها : والواحد ده اللي حياخدها منك .. اسمه ايه .. تعرفي شكله ؟

ترد : ولا عمري شفته يا بني .. قال لي في مصر هو حيعرفك اول ما تخرجي من المطار وياخد منك الشنطة.

..... المسألة واضحة وضوح الشمس .. الست دي انضحك عليها .. واحد واطي استغل طيبتها وامنية حياتها ودفع لها فلوس العمرة عشان يبعت معاها – من غير ماتعرف – مخدرات سعرها نص مليون جنيه .

المهم .. الناس كلها عرفت حكاية الحاجة سعدية الغلبانة .. وبقت قضيتها قضية رأى عام .. والسفارة هناك مهتمة جدا بحكايتها .. وبنتها وناس كتير  في السعودية وفي مصر " كلهم مصريين طبعا " متعاطفين معاها ويطالبون الرئيس السيسي شخصيا بالتدخل لدي السلطات السعودية للإفراج عنها ، والمباحث هنا في مصر بتدوّر على الراجل بتاع ربنا اللي طلعّها العمرة .. اللي ميعرفش ربنا أبدا وحسابه عنده يوم القيامة رهيب.