نشرت الفنانة نشوى مصطفى عبر صفحتها الشخصية على موقع التواصل الاجتماعي «فيسبوك»، تعليقا حول مسلسل سجن النسا، بطولة الفنانة نيللي كريم، ومدى تأثير المسلسل عليها، ما جعلها تمنت المشاركة في العمل، عقب مشاهدتها إياه.

وقالت «مصطفى»: «سجن النسا من المسلسلات اللي اتسببت لى فى أزمة، كان حالة فنية مبهرة بالنسبة لى فى مستوى التمثيل، أتمنيت لو كنت معاهم فى حالة تقترب من الإكتمال، اللي عمل حتى مشهد واخد فى المسلسل ده كان مبهر، والحقيقة أول مرة فى حياتى أحس بإنى كممثلة لازم أرجع تانى أذاكر ماهية فن التمثيل من خلال مدارس جديدة».

تابع: «ابتديت اتفرج على تمثيل أكتر، تمثيل الخواجات كان بالنسبة لى المرجع، لأن عندهم دايماً تحديث، بس المسلسل ده وقعنى فى إشكالية تانية وهو إنى قررت إنى مش حامثل تانى غير اللي يمتعني، مش حامثل لمجرد إنى أكون موجودة وخلاص، مش حامثل غير وأنا واثقة إنى حاحقق نتيجة تسعد وجدانى، ليه بأقول كده؟، لأن رغم إنى بقالى حوالى تلات سنين ما اتعرضش عليا أدوار تحقق لى نتيجة تبسطنى وأصدقاء كتير».

استكمل: «قالوا لى يا نشوى اشتغلى علشان تبقى موجودة وخلاص، وما أكذبش عليكم كنت حتأثر بكلامهم، بس انحطيت فى موقف مافيهوش الحد الأدنى اللي يرضينى فلقيت نفسى بأقول لاء، كانت لاء صعبة عليا، بس قلتها، ومش ندمانة ابداً، بس بينى وبينكم خايفة أندم، خايفة أطلع غلط».